لکی مروت دے علاقے سلطان خیل اچ سکیورٹی فورسز دی وݙی کامیابی، ٻہوں مطلوب8 خوارجی جہنم واصل ، گزریل چار ݙینھ اچ افغان طالبان دے بھیجے ڳئے ہلاک خوارجیاں دی تعداد 102 تھی ڳئی

راولپنڈی۔17اکتوبر(اے پی پی) لکی مروت دے علاقے سلطان خیل اچ سکیورٹی فورسز وݙی کامیاب کارروائی کریندے 8 خوارجی جہنم واصل کر ݙتے، گزریل چار ݙینھ اچ افغان طالبان دے بھیجے ڳئے 102 خوارجی جہنم واصل کیتے ڳئن۔ تفصیل موجب 16 اکتوبر 2025 کوں لکی مروت دے علاقے سلطان خیل اچ پاک فوج انٹیلی جنس اطلاعات دی بنیاد تے ہک کامیاب کارروائی کریندے 8 ٻہوں مطلوب خوارجیاں کوں جہنم واصل کر ݙتا۔ سکیورٹی ذرائع موجب علاقے اچ افغان طالبان دی پراکسی خوارجیاں دی موجودگی دی اطلاع تے کارروائی کیتی ڳئی۔ فورسز سلطان خیل اتے طوفان آلا دے علاقیں اچ فضائی اتے زمینی نگرانی شروع کیتی، نگرانی دے دوران خوارجیاں دی نقل و حرکت دی نشاندہی تھیوݨ تے وقتی کارروائی کیتی ڳئی، آپریشن دے دوران دہشت گرداں دے قبضے توں باری مقدار اچ اسلحہ اتے بارود وی برآمد تھئے۔ سکیورٹی ذرائع موجب گزریل چار ݙینھ اچ افغان طالبان دے بھیجے ڳئے 102 خوارجی دوزخ واصل کیتے ڳئن۔ نیشنل ایکشن پلان دے تحت عوام اتے سکیورٹی فورسز دی طرفوں دہشت گرداں دے خلاف بلا امتیاز اتے مسلسل کارروائیاں جاری ہن۔