امن عمل دی تشکیل اچ پاکستان دی شراکت اتے تعمیری کردار دا وݙے پیمانے تے اعتراف کیتا ویندا پئے، ترجمان دفتر خارجہ

اسلام آباد۔17اکتوبر(اے پی پی)ترجمان دفتر خارجہ شفقت علی خان آکھیے جو مصر دے صدر عبدالفتاح السیسی اتے امریکی صدر ڈونلڈ ٹرمپ دی سانجھی دعوت تے وزیراعظم محمد شہباز شریف 13 توں 14 اکتوبر تئیں شرم الشیخ دا اہم سفارتی دورہ کیتا۔ اتھاں پریس بریفنگ اچ انہاں آکھیا جو وزیراعظم /نائب وزیراعظم تے وزیرخارجہ دے نال کابینہ دے سینئر ارکان دے نال اعلیٰ سطحی کثیر الجہتی اقدام اچ حصہ ڳھدا جیں دا مقصد غزہ اچ بھیانک انسانی اتے سیکورٹی بحران نال نبݨݨ اے۔ انہاں آکھیا جو امن سفارت کاری اچ پاکستان دے فعال کردار عالمی امن اتے انصاف کیتے پرعزم ہک ذمہ وار ملک دے طور تے پاکستان دی پوزیشن کوں تقویت ݙتی اے۔ ترجمان آکھیا جو امن عمل دی تشکیل اچ پاکستان دی شراکت اتے تعمیری کردار دا وݙے پیمانے تے اعتراف کیتا ویندا پئے جݙاں جو علاقائی سلامتی اتے تعاون کیتے ہک سرکردہ مسلم ملک دے طور تے پاکستان دا امیج مضبوط کیتے۔ ترجمان آکھیا جو شرم الشیخ اچ تھیوݨ آلی سربراہی کانفرنس اچ برطانیہ دے وزیراعظم، جرمن چانسلر، ترک صدر، قطر دے امیر، انڈونیشیا دے صدر، کینیڈین وزیراعظم اتے مسلم اتے یورپی ملکاں دے کئی ݙوجھے رہنماواں سودھے 30 دے نیڑے رہنماواں شرکت کیتی۔ انہاں آکھیا جو تقریب اچ امن معاہدے دے ضامن دے طور تے امریکا، مصر، قطر اتے ترکیہ دی ولوں دستاویز تے دستخط کرݨ دی چار فریقی تقریب شامل ہئی۔ ترجمان آکھیا جو سربراہی اجلاس دے سرکاری شیڈول موجب دستخط دی تقریب دے بعد صرف صدر ٹرمپ اتے صدر السیسی کوں ہی بیان ݙیوݨا ہئی پر ایجنڈے دے برعکس صدر ٹرمپ وزیراعظم محمد شہباز شریف کوں تقریر دی دعوت ݙتی۔ آپݨے مختصر خطاب اچ وزیر اعظم محمد شہباز شریف صدر ٹرمپ دا شکریہ ادا کیتا جو انہاں ٻہوں سارے خطیں خاص طور تے غزہ اچ امن قائم کرݨ کیتے مثالی قیادت ݙتی۔ انہاں بھارت اتے پاکستان وچال جھیڑے کوں روکݨ تے صدر ٹرمپ دا شکریہ وی ادا کیتا۔