صدر مملکت آصف علی زرداری کوں چار نویں تعینات تھیوݨ آلے غیر ملکی سفیراں آپݨیاں سنداں پیش کرݙتن

اسلام آباد۔17اکتوبر(اے پی پی)پاکستان اچ نویں تعینات تھیوݨ آلے چار ملکاں دے سفیراں ایوان صدر اچ منعقدہ تقریب اچ صدر مملکت آصف علی زرداری کوں آپݨیاں سنداں سفارت پیش کرݙتن ۔ ایوان صدر دے پریس ونگ توں جاری بیان موجب جنہاں سفیراں سند سفارت پیش کیتیاں انہاں اچ کینیڈا دے ہائی کمشنر طارق علی خان، جمہوریہ لبنان دے سفیر عبدالعزیزعیسیٰ، نیدرلینڈز دے سفیر رابرٹ جان سیگرٹ اتے نیوزی لینڈ دے نان ریزیڈنٹ ہائی کمشنر ڈیوڈ پائن (جیڑھے کولمبو اچ مقیم ہن) شامل ہن۔ ایوان صدر آوݨ تے معزز سفیراں کوں پاکستانی مسلح افواج دے ہک چاق و چوبند دستے گارڈ آف آنر پیش کیتا۔ نویں سفیراں دا خیرمقدم کریندے صدر مملکت آصف علی زرداری انہاں کوں انہاں دی تعیناتی تے مبارخ ݙتی اتے اعتماد دا اظہار کیتا جو انہاں دیاں تقرریاں پاکستان دے انہاں دے ملکاں دے نال ݙو طرفہ تعلقات کوں مزید تکڑا بݨیسن۔ صدر مملکت کینیڈا دے نال پاکستان دے پراݨٖ اتے دوستانہ تعلقات تے روشنی پیندے اقتصادی، تجارتی اتے سرمایہ کاری دے تعاون کوں ودھاوݨ خاص طورتے انفارمیشن ٹیکنالوجی، توانائی اتے معدنیات دے شعبیں اچ تعاون دی لوڑھ تے زور ݙتا۔ انہاں عوام توں عوام دے تعلقات دی اہمیت کوں اُجاگر کیتا اتے کینیڈا اچ رہݨ آلے پاکستانی تارکین وطن دی ݙوہیں ملکاں وچال خوشگوار تعلقات کوں ودھارا ݙیوݨ دی اہمیت دی تعریف کیتی ۔ لبنان دے سفیر نال آپݨی ڳالھ مہاڑ اچ صدر مملکت لبنان دی حکومت اتے عوام دے نال پاکستان دی بھرپور یکجہتی دے عزم دا اظہار کیتا اتے اسرائیلی جارحیت دی سختی نال مذمت کیتی۔ انہاں لبنان دی خودمختاری اتے علاقائی سالمیت کیتے پاکستان دی مسلسل حمایت دا یقین ݙیوایا اتے ݙو طرفہ تجارت، سکیورٹی اتے دہشت گردی دے خلاف تعاون کوں ودھاوݨ دی لوڑھ تے زور ݙتا۔ نیدرلینڈز دے سفیر نال آپݨی ملاقات دے دوران صدر مملکت ݙو طرفہ تعلقات کوں مزید تکڑا بݨاوݨ دی اہمیت خاص طور تے تجارت، سرمایہ کاری، زراعت، اتے تعلیم دے شعبیں اچ تعاون ودھاوݨ دی لوڑھ تے زور ݙتا۔ انہاں پاݨی دے انتظام، موسمیاتی لچک اتے پائیدار ترقی جہیں شعبیں اچ نیدرلینڈز دے نال شراکت داری دی تعریف کیتی تے پاکستان اچ ہالینڈ دی سرمایہ کاری کوں ودھاوݨ دی پیشکش کیتی۔ نیوزی لینڈ دے نان ریزیڈنٹ ہائی کمشنر دے نال آپݨی ڳالھ مہاڑ اچ صدر مملکت ݙوہیں ملکاں وچال کامن ویلتھ دی سانجھی وراثت اتے جمہوری اقدار کوں اُجاگر کیتا۔ انہاں زراعت، لائیو سٹاک، ماہی گیری اتے صاف توانائی دے شعبیں اچ تعاون ودھاوݨ دے امکانات تے روشنی پاتی اتے پاکستان دی کثیر الجہتی اقدامات کیتے نیوزی لینڈ دی حمایت دی تعریف کیتی۔ صدر مملکت چارے سفیراں کیتے کامیاب اتے فیدہ مند مدت ملازمت کیتے نیک تمناواں دا اظہار کیتا اتے امید ظاہر کیتی جو انہاں دیاں کوششاں آپت دے فیدے کیتے تکڑے ݙو طرفہ اتے کثیر الجہتی شراکت داریاں دا سبب بݨسن۔ ایں موقع تے سینیٹر شیری رحمان، سینیٹر ندیم مانڈوی والا اتے سیکرٹری خارجہ وی موجود ہن