جمہوریت دے ثمرات تلویں سطح تے منتقل کرݨ وچ بنیادی جمہوری اتے مقامی حکومتاں دا کلیدی کردار اے، خالد مقبول صدیقی

اسلام آباد۔12نومبر (اے پی پی) وفاقی وزیر تعلیم و پیشہ وارانہ تربیت خالد مقبول صدیقی آکھیے جو جمہوریت دے ثمرات نِکی سطح تے منتقل کرݨ وچ بنیادی جمہوری اتے مقامی حکومتاں دا کلیدی کردار اے، 18ویں ترمیم دے تحت اختیارات دی تلویں سطح تے منتقلی ضروری اے۔ قومی اسمبلی وچ 27ویں آئینی ترمیم تے بحث وچ حصہ گھندے خالد مقبول صدیقی آکھیا جو آئین کوں بݨئے 52 سال تھی چکِن۔ امید کیتی ویندی پئی اے جو 27ویں ترمیم مُلک دی بقاء اتے خوشحالی دی ضامن ہوسی، پاکستان دی خوشحالی دا مقصد 25 کروڑ عوام دی خوشحالی اے، اساں پاکستان دی سلامتی، دفاع اتے جمہوریت دی مضبوطی کیتے ایں شرط تے ایں ترمیم دا ساتھ ݙیوݨ دا فیصلہ کیتے تاں جو جمہوریت دے ثمرات عام آدمی تئیں پُڄائے ونڄن۔انہاں آکھیا جو آئین وچ بنیادی جمہوریت کوں تحفظ ݙتا ڳئے، آرٹیکل 140 اے وچ ایں ڳالھ کوں یقینی بݨایا ڳئے جو انسانی حقوق اتے لوکاں دیاں بنیادی ضرورتاں کوں پورا کیتا ویسی، ایں تے سپریم کورٹ دا فیصلہ وی موجود اے۔ انہاں آکھیا جو 18ویں آئینی ترمیم دے بعد اختیارات مرکز توں صوبیں تئیں منتقل تھی ڳئے پر صوبیں توں تلویں سطح تے اختیارات دی منتقلی نئیں تھی سڳی ، اساݙیاں ساریاں کوششاں دے باوجود بنیادی حقوق اتے جمہوریت دے ثمرات عوام تئیں پُڄاوݨ دے انتظامات نی تھی سڳئے۔ انہاں آکھیا جو جنہاں لوکاں آرٹیکل140 اے کوں لاگو کرݨ دی مخالفت کیتی اے انہاں عوام دشمنی کیتی اے، ترقی یافتہ معاشریں اتے ملکاں وچ شہری حکومتاں ہی عوام کوں خدمات ݙیندِن۔