ستاویویں آئینی ترمیم دے ذریعے میثاق جمہوریت دے ادھورے وعدیں کوں پورا کیتا ویندا پئے، آئینی عدالت دا قیام اساݙی تاریخی کامیابی اے، بلاول بھٹو زرداری دی قومی اسمبلی اچ ڳالھ مہاڑ

اسلام آباد۔12نومبر (اے پی پی) پاکستان پیپلز پارٹی دے چیئرمین بلاول بھٹو زرداری آکھیے جو 27ویں آئینی ترمیم دے ذریعے میثاق جمہوریت دے ادھورے وعدیں کوں پورا کیتا ویندا پئے، آئینی عدالت دا قیام اساݙی تاریخی کامیابی اے، 18ویں آئینی ترمیم نال پاکستان وچ علیحدگی پسندی دی سیاست دا خاتمہ کرݙِتا ڳئے۔ قومی اسمبلی وچ 27ویں آئینی ترمیم تے بحث وچ حصہ گھندے بلاول بھٹو زرداری آکھیا جو ملک دے مختلف حصیں وچ دہشت گردی دے اڄوکے واقعیں دی اساں مذمت کریندوں اتے یاد ݙیواوݨ چاہندوں جو سیاسی، نظریاتی اختلاف تھی سڳدن پر مُلک دی سلامتی دے تحفظ اتے دہشت گرداں دے خلاف بطور قوم رَل تے مقابلہ کرݨا ہوسی۔انہاں آکھیا جو 27ویں ترمیم دے تحت میثاق جمہوریت دے ادھورے وعدیں کوں پورا کریندے پئے ہیسے، بھارت کوں شکست ݙیوݨ دے بعد وزیراعظم آرمی چیف کوں فیلڈ مارشل قرار ݙیوݨ دا فیصلہ کیتا، ایں عہدے کوں تحفظ ݙیوݨ کیتے آرٹیکل 243 وچ ترمیم کیتی ویندی پئی اے، اساں سمجھدوں جو کہیں وی ترمیم یا قانون سازی دی طاقت اے نئیں ہوندی جو او کتنی وݙی اکثریت نال منظور تھیندی اے، قانون سازی دی طاقت اتفاق رائے نال ہوندی اے۔بلاول بھٹو آکھیا جو پاکستان دے فیلڈ مارشل اتے اساݙیاں مسلح افواج دی دنیا اچ تعریف تھیندی پئی اے ، اساݙی مسلح افواج مودی سرکار کوں عبرت ناک شکست ݙتی اے، بھارت دے چھی جہاز ڈھائے اتے بھارت دی ایں شکست نال دنیا وچ پاکستان دی نویں سنڄاݨ بݨ ڳئی اے اتے قوم کوں طاقت مِلی اے۔ انہاں آکھیا جو آئینی عدالت دے قیام دی تجویز منݨ تے اساں حکومت دے شکر گزار ہیسے، اے ہک تاریخی کامیابی اے، آئینی عدالت وچ سارے صوبیں کوں ہکو سویں نمائندگی مِلسی اتے ایں نال وفاق مضبوط تھیسی۔انہاں آکھیا جو پی پی پی، مسلم لیگ (ن) دیاں جمہوری حکومتاں افتخار چوہدری دے ازخود نوٹسز کوں بھوگیے، ایں اختیار دے تحت منتخب وزیراعظم دی توہین کیتی ویندی ہئی، ایں آئینی ترمیم دے بعد اے رستہ بند کرݙِتا ڳئے۔بلاول بھٹو زرداری آکھیا جو اساں کوں میثاق جمہوریت دے باقی نقطیں تے وی عملدرآمد کرݨا پوسی، اساں کوں ٹروتھ اینڈ ری کنسلیشن کمیشن دے ول ودھݨا ہوسی، اپوزیشن اختلاف کرے اتے احتجاج کرے پر سیاسی میدان اتے پارلیمان نہ چھوڑے، ڈیڈلاک توں نکلݨ کیتے مذاکرات دے دروازے کھولݨے ہوسن۔انہاں آکھیا جو صوبیں دی خودمختاری دے خلاف شقاں دی اساں حمایت نی کرسڳدے، اساں مُلک دی معاشی ترقی چاہندوں پر ایں کیتے صوبائی خودمختاری تے کوئی سمجھوتہ نی کرسڳدے، 18ویں آئینی ترمیم نال پاکستان وچ علیحدگی پسندی دی سیاست دا خاتمہ کرݙِتا ڳیا ہئی ایں کیتے ایجھا کوئی فیصلہ نہ کیتا ونڄے جئیں نال علیحدگی پسنداں کوں ولا آوݨ دا موقع مِلے۔ انہاں آکھیا جو عدلیہ وچ اصلاحات کیتے اساݙیاں تجویزاں کوں منیا ڳئے جئیں تے اساں حکومت دے شکرگزار ہیسے، ہݨ کہیں جج کوں زبردستی ریٹائرڈ نہ کیتا ونڄ سڳسی۔۔الیکشن کمیشن دے حوالے نال ڈیڈلاک کوں جمہوری انداز اچ ختم کریسوں۔میݙی حکومت توں درخواست اے جو ہائوس اتے سیاسی جماعتاں ایندی طاقت ہن ،ساریاں سیاسی جماعتوں دی سفارشات اتےتجویزاں توں حکومت کوں فیدہ تھیسی۔