قومی اسمبلی 27 ویں آئینی ترمیم کڄھ ترمیماں نال ݙو ترہائی اکثریت نال منظور کر ڳھدی

اسلام آباد۔ 12 نومبر(اے پی پی)قومی اسمبلی 27 ویں آئینی ترمیم کڄھ ترمیماں نال ݙو تہائی اکثریت نال منظور کر ڳھدی اے۔ اجلاس اچ سپیکر قومی اسمبلی سردار ایاز صادق دی پیش کیتی ڳئی 27 ویں ترمیم سینٹ توں منظور تھیوݨ آلی شکل اچ زیر غور گھن آوݨ دی تحریک منظوری کیتے پیش کیتی ڳئی، تحریک دے حق اچ 231 اتے مخالفت اچ 4 ممبراں رائے ݙِتی۔ ایں توں پہلے وفاقی وزیر قانون اعظم نذیر تارڑ گزریل ݙینہہ 27ویں ترمیم کوں سینٹ توں منظور تھیوݨ آلی صورت اچ زیر غور گھن آوݨ دی تحریک پیش کیتی ہئی، جیندے تے ایوان اچ کھلی بحث کرائی ڳئی۔ ایوان اچ وزیر قانون اعظم نذیر تارڑ ولوں 27ویں ترمیم دے بل اچ کڄھ ترمیماں پیش کیتاں ڳیاں، انہاں آرٹیکل 6 اچ ترمیم پیش کیتی جیںدی ایوان منظوری ݙِے ݙِتی، وزیر قانون ولوں نویں شق 2  اے پیش کیتی ڳئی، جیںدے مطابق آرٹیکل 10 اچ ترمیم کیتی ڳئی، ایوان ایںدی وی ݙو تہائی اکثریت نال منظوری ݙِتی۔ وزیر قانون ولوں شق 23 اچ ترمیم پیش کیتی ڳئی جو موجودہ چیف جسٹس آف پاکستان ہی آپݨی مدت دے دوران چیف جسٹس آف پاکستان رہسن۔ شق وار منظوری ویلھے 233 ممبراں شقاں دے حق اچ اتے 4 ممبراں مخالفت اچ ووٹ ݙتے۔ سنی اتحاد کونسل اتے آزاد اپوزیشن ارکان ایوان دا واک آئوٹ کیتا اتے ووٹنگ اچ حصہ نئیں ڳھدا۔ شق وار منظوری دے بعد وزیر قانون اعظم نذیر تارڑ ولوں بل منظوری کیتے پیش کیتا ڳیا جیںدے حق اچ 234 اتے مخالفت اچ 4 ووٹ پئے، ایوان ولوں ݙو تہائی اکثریت نال منظوری ݙِتی ڳئی۔ بل دے حق اچ 233 ووٹ پئن۔ ایں ترمیم دے بعد جوڈیشل اتے آئینی امور دی سماعت کیتے ہک انڄھ آئینی عدالت قائم کیتی ویسی، آرٹیکل 243 اچ ترمیم کر تے فیلڈ مارشل دا عہدہ تاحیات اتے تریے مسلح فوجاں دے سربراہ کیتے چیف آف ڈیفنس فورسز دا عہدہ کݙھیا ڳئے جیںدے تے تقرری وزیر اعظم دی ایڈوائس تے صدر مملکت کریسن، جݙاں جو چیئرمین جوائنٹس چیف آف سٹاف کمیٹی دا عہدہ 27 نومبر 2025 توں مُک ویسی۔ آرٹیکل 243 اچ ترمیم دے تحت وزیر اعظم ولوں چیف آف ڈیفنس فورسز دی سفارش تے نیشنل سٹرٹیجک کمانڈ دے کمانڈر دا تقرر کیتا ویسی۔ ترمیم دے مطابق اَز خود نوٹس دا اختیار مُکا ݙِتا ڳئے۔ ایں ترمیم دے تحت ہائی کورٹ دے ججاں دا ہݨ ہک ہائی کورٹ توں ٻئی ہائی کورٹ اچ تبادلہ کیتا ونڄ سڳسی۔ 27ویں ترمیم اچ کل 59 شقاں شامل ہن، صدر کوں عہدے توں سبکدوش تھیوݨ دے بعد استثنیٰ حاصل ہوسی ڄیکر او ولا کوئی پبلک آفس گھنسی تاں ایںدا استثنیٰ ختم سمڄھیا ویسی۔ آرٹیکل 209 اچ ترمیم دے تحت سپریم جوڈیشل کونسل دی ہیئت اے ہوسی جو وفاقی آئینی عدالت دا چیف جسٹس، سپریم کورٹ آف پاکستان دا چیف جسٹس، ݙوہاں عدالتاں دے ہک ہک موسٹ سینئر ججز، ݙو سالاں کیتے سپریم کورٹ اتے وفاقی آئینی عدالت دے چیف جسٹس صاحبان ولوں نامزد ہک جج، اتے ݙو سینئر ترین ہائی کورٹس دے چیف جسٹس صاحبان شامل ہوسن۔ سپریم کورٹ اتے وفاقی آئینی عدالت دے چیف جسٹس اچوں جیڑھا سینئر ہوسی او کونسل دا سربراہ ہوسی۔ آرٹیکل 206 اچ ترمیم دے تحت ہائی کورٹ دا کوئی جج جیڑھا وفاقی آئینی عدالت یا سپریم کورٹ آف پاکستان اچ بطور جج تعیناتی توں انکار کریسی یا سپریم کورٹ دا کوئی اینڄھا جج جیڑھا وفاقی آئینی عدالت اچ تعیناتی قبول نا کریسی او آپݨے عہدے توں سبکدوش ڳݨیا ویسی۔ آرٹیکل 239 اچ ترمیم دے تحت کوئی آئینی ترمیم تے کہیں عدالت ولوں سوال نا چاتا ونڄ سڳسی۔ آرٹیکل 260 اچ ترمیم دے تحت نویں شق 260 اے دے تحت سپریم کورٹ اتے وفاقی آئینی عدالت اچ پہلی مدت دے بعد جیڑھا ݙوہاں عدالتاں اچوں سینئر ہوسی او چیف جسٹس آف پاکستان سݙویسی۔ آرٹیکل 175 دے تحت وفاقی آئینی عدالت دا قیام ڳھن آیا ویسی، جیندے اچ سارے صوبیاں توں ججاں دی مساوی نمائندگی ہوسی اتے گھٹ توں گھٹ ہک جج اسلام آباد ہائی کورٹ توں گھدا ویسی۔ ججاں دی تعیناتی کیتے ضروری اے جو او سپریم کورٹ دا جج ہووے یا رہیا ہووے، ہائی کورٹ اچ بطور جج 5 سال تئیں خدمات سرانجام ݙِتیاں ہوون، ہائی کورٹ یا سپریم کورٹ دا 20 سال دا بطور وکیل تجربہ ہووے۔ وفاقی آئینی عدالت دے چیف جسٹس دا حلف صدر مملکت گھنسی جݙاں جو ممبر ججاں توں چیف جسٹس وفاقی آئینی عدالت حلف گھنسن۔ آئین دے آرٹیکل 199 دے تحت سپریم کورٹ یا آئینی بنچز کولو ایں ترمیم دی منظوری تئیں ساریاں پٹیشنز، اپیلاں، ایں آرٹیکل دے تحت پاس احکامات تے نظر ثانی دیاں درخواستاں، التواء دیاں درخواستاں وفاقی آئینی عدالت کوں منتقل کیتاں ویسن۔ وفاقی آئینی عدالت دے ججاں کیتے عمر68  سال مقرر کیتی ڳئی اے۔