صدر مملکت آصف علی زرداری دی گوئٹے مالا دی سابق صدر اتے پارلیمان دی سپیکر جمی مورالیز نال ملاقات

اسلام آباد۔ 12 نومبر(اے پی پی)صدر مملکت آصف علی زرداری نال گوئٹے مالا دی سابق صدر اتے پارلیمان دی سپیکر جمی مورالیز ملاقات کیتی اَتے ݙو طرفہ تعلقات، تجارت، سرمایہ کاری اتے بین الپارلیمانی تعاون تے ڳالھ مہاڑ کیتی۔ ٻُدھ کوں ایوان صدر دے پریس ونگ توں جاری بیان دے مطابق، صدر مملکت آصف علی زرداری پاکستان اتے گوئٹے مالا وچال تجارت، سرمایہ کاری اتے عوامی رابطیاں کوں مزید تگڑا بݨاوݨ تے زور ݙِتا۔ انہاں آکھیا جو پاکستان اتے گوئٹے مالا کوں دیہی ترقی، ماحولیاتی چیلنجاں اتے معاشی جدیدیت جھیں مشترکہ مسئلیاں دا سامݨا اے جنہاں نال نٻݨݨ کیتے باہمی تعاون ویلھے دی لوڑھ اے۔ انہاں آکھیا جو ݙوہاں ملک زراعت، قابلِ تجدید توانائی اتے طبی سائنسز دے شعبیاں اچ عملی تعاون دے وݙے امکانات رکھیندن۔ انہاں جمی مورالیز کوں خصوصی سرمایہ کاری سہولت کونسل (ایس آئی ایف سی) دے فریم ورک توں آگاہ کیتا اتے گوئٹے مالا کوں ایں دے تحت مشترکہ سرمایہ کاری اتے منصوبیاں اچ شمولیت دی دعوت ݙِتی۔ صدر مملکت اقوامِ متحدہ اچ پاکستان دی حمایت تے گوئٹے مالا دا شکریہ ادا کریندے آکھیا جو ݙوہاں ملکاں کوں کثیر الجہتی فورمز تے تعاون جاری رکھݨا چاہیدے۔ جمی مورالیز پاکستان دی میزبانی اتے بین الپارلیمانی سپیکرز کانفرنس اچ شرکت دی دعوت تے صدر آصف علی زرداری دا شکریہ ادا کیتا۔ انہاں آکھیا جو گوئٹے مالا وسطی امریکہ دا سب توں وݙا ملک اے، اساں پاکستان دے ترقیاتی تجربیاں توں سِکھݨ دے خواہشمند ہیں۔ ملاقات اچ چیئرمین سینیٹ سید یوسف رضا گیلانی، سینیٹر شیری رحمان اتے سینیٹر سلیم مانڈوی والا وی موجود ہَن۔