میثاق جمہوریت اچ آئینی عدالت دے قیام دا خواب 19 سال بعد پورا تھئے، فتنہ الخواج اتے دشمناں پاکستان کوں پہلے وی مُنہ توڑ جواب ݙِتا ہئی اتے ہݨ وی مُنہ توڑ جواب ݙیسوں، وزیراعظم محمد شہباز شریف دا قومی اسمبلی اچ خطاب

اسلام آباد۔ 12 نومبر(اے پی پی)وزیراعظم محمد شہباز شریف آکھیے جو میثاق جمہوریت اچ آئینی عدالت دے قیام دا خواب 19 سال بعد شرمندہ تعبیر تھئے، افغانستان آپݨی سرزمین کوں پاکستان دے خلاف استعمال کرݨ توں روکے، فتنہ الخواج اتے دشمناں پاکستان کوں اطمینان اتے پوری قوت نال آکھݨ چاہندے ہیں جو انہاں دیاں حرکتاں دا ساکوں چنڳے طریقے نال پتا اے، پہلے وی مُنہ توڑ جواب ݙِتا ہئی اتے ہݨ وی مُنہ توڑ جواب ݙیسوں، چاہندے ہیں جو پاکستان سودھا پورا خطہ ترقی اتے خوشحالی دا گہوارہ بݨ ونجے، قومی یکجہتی اتے وفاق کیتے 100 کالا باغ ݙیم وی قربان ہین۔ ٻُدھ کوں قومی اسمبلی دے اجلاس اچ 27ویں آئینی ترمیم دی منظوری دے بعد آپݨیں خطاب اچ وزیراعظم آکھیا جو اڄ ایں ایوان اچ یکجہتی کریندے قومی اتحاد اتے یگانگت کوں فروغ ݙِتا ڳئے جیںدے تے ساریاں سیاسی جماعتاں اتے انہاں دے قائدین دا شکر گزار ہیں۔ انہاں سینیٹر عرفان صدیقی مرحوم کوں خراجِ عقیدت پیش کیتا۔ انہاں وانا اتے اسلام آباد اچ تھیوݨ آلے دہشت گرد حملیاں دی مذمت کیتی اتے آکھیا جو وانا دے واقعے اچ خوارج، جیںدے اچ بدقسمتی نال افغانستان دے لوک شامل ہَن، جہنم رسید تھئن اتے سارے کیڈٹس اتے ٹیچرز کوں بحفاظت کڈھیا ڳیا۔ انہاں مسلح افواج دا شکریہ ادا کیتا جنہاں اعلیٰ پائے دی پیشہ وارانہ ذمہ داریاں دی ادائیگی ݙکھائی۔ انہاں آکھیا جو اے کوئی لُکی ڳالھ کائنی جو انھاں واقعات اچ خارجی ہتھ نمایاں اے اتے ہندوستانی ہتھ شامل اے اتے پڑوسی ملک افغانستان دے فٹ پرنٹ ݙسدن۔ انہاں پچھلے حملیاں دے ثبوت دنیا دے سامݨے رکھݨ دا ذکر کیتا جنہاں کوں چیلنج نی کیتا ڳیا۔ وزیراعظم فتنہ الخوارج اتے دشمناں پاکستان کوں مُنہ توڑ جواب ݙیوݨ دا عزم دہراوݨ دے نال آکھیا جو پاکستان دی ترقی اتے خوشحالی دی راہ اچ انہاں کوں رکاوٹاں نا سٹݨ ݙِتیاں ویسن۔ انہاں افغانستان دی عبوری حکومت توں ہک ہی شرط رکھݨ دا ذکر کیتا جو ٹی ٹی پی، بی ایل اے اتے دہشت گرد گروپاں کوں افغانستان دی سرزمین پاکستان دے خلاف استعمال کرݨ توں روکیا ونجے۔ انہاں آکھیا جو پاکستان ولوں افغان ٻھیݨ ٻھراواں دی 40 سال تئیں کیتی ڳئی مہمان نوازی دا جیڑھا صلہ ݙِتا ڳئے او پوری دنیا ݙیھدی پئی اے۔ وزیراعظم آئینی ترمیماں دی منظوری تے صدر مملکت آصف علی زرداری، قائد میاں محمد نواز شریف، بلاول بھٹو زرداری اتے ٻئیاں سیاسی جماعتاں دے رہنماواں دا شکریہ ادا کیتا۔ انہاں آکھیا جو میثاق جمہوریت اچ آئینی عدالت دے قیام دا وعدہ اڄ 19 سال بعد شرمندہ تعبیر تھیا اَتے یقین اے جو شہید بے نظیر بھٹو صاحبہ دی رُوح کوں تسکین مِلدی پئی ہوسی۔ انہاں چیف جسٹس آف پاکستان یحییٰ آفریدی دا وی شکریہ ادا کیتا جنہاں آئین دے دائرے اچ رہ تے بھرپور معاونت کیتی اَتے ریونیو دے کیسز تے نوٹس گھِدا جیںدے نال قومی خزانے اچ ارباں روپے آئن۔ وزیراعظم فیلڈ مارشل دا اعزاز ݙیوݨ اتے ایں کوں آئینی تحفظ ݙیوݨ دے فیصلے دی حمایت کریندے ہوئیں آکھیا جو قوماں آپݨے ہیروز کوں ایویں ہی عزت ݙیندن۔ انہاں قومی یکجہتی اتے اتحاد تے زور ݙِتا اتے آکھیا جو صوبے مضبوط ہوسن تاں وفاق مضبوط ہوسی۔