وفاقی وزیر داخلہ محسن نقوی نال یوکے دی نیشنل کرائم ایجنسی دے ڈی جی گرائم بیگر دی ملاقات، منشیات دی روک تھام سودھے ٻئے شعبیاں اچ تعاون ودھاوݨ تے اتفاق

اسلام آباد۔13نومبر (اے پی پی) وفاقی وزیر داخلہ محسن نقوی نال برطانیہ دی نیشنل کرائم ایجنسی (این سی اے) دے ڈائریکٹر جنرل گرائم بیگر ملاقات کیتی جئیں اچ منشیات دی روک تھام اتے این سی سی آئی اے سودھے مختلف اداریاں دے افسراں کیتے تربیتی کورسز اچ آپسی تعاون ودھاوݨ، بالاں دی آن لائن ہراسانی کوں روکن کیتے آپسی اشتراک کار تے کوآرڈینیشن کوں مؤثر ٻݨاوݨ اتے ایکسٹراڈیشن دے حوالے نال ݙوپاسہ مدد ودھاوݨ تے اتفاق کیتا گیا۔ خمیس کوں وزارت داخلہ ولوں جاری بیان موجب، ملاقات اچ برطانوی ہائی کمشنر جین میریٹ، نیشنل کوآرڈینیٹر نیکٹا، ڈی جی این سی سی آئی اے، ڈی جی نیشنل فرانزک ایجنسی، ایڈیشنل سیکرٹری داخلہ، چیف کمشنر اتے آئی جی اسلام آباد وی موجود ہن۔ ملاقات اچ دہشت گردی و منشیات دی روک تھام، انسانی سمگلنگ، فرانزک، امیگریشن اتے پولیس ٹریننگ دے شعبیاں اچ تعاون ودھاوݨ تے تفصیل نال گالھ مہاڑ کیتی گئی جڈاں جو منشیات دی روک تھام، این سی سی آئی اے سودھے مختلف اداریاں دے افسراں کیتے تربیتی کورسز اچ آپسی تعاون ودھاوݨ، بالاں دی آن لائن ہراسانی کوں روکن کیتے آپسی اشتراک کار تے کوآرڈینیشن کوں مؤثر ٻݨاوݨ دا فیصلہ اتے ایکسٹراڈیشن دے حوالے نال ڈوپاسہ مدد ودھاوݨ تے اتفاق کیتا گیا۔ برطانیہ اتے پاکستان اچ ایکسٹراڈیشن اتے ڈوجھے شعبیاں اچ تعاون دے حوالے نال 5 ایم او یوز کوں جلدی حتمی شکل ݙتی ویسی۔ ڈی جی این سی اے گرائم بیگر اسلام آباد اچ خودکش حملے دی مذمت کریندیں ہوئیں جانی نقصان تے افسوس دا اظہار کیتا۔ وزیر داخلہ محسن نقوی آکھیا جو دہشت گردی دے سارے تانے بانے ہمسایہ ملک نال ملدن، دہشت گردی دے خلاف جنگ اچ پاکستان دے عزم و استقامت دی مثال دنیا ڈیوݨ توں قاصر اے۔ انہاں آکھیا جو جدید فرانزک اتے ٹریننگ نال قانون نافذ کرݨ آلے اداریاں دی صلاحیتاں اچ ٻیا ودھارا ممکن اے، اپسکیل دے تعاون نال غیر قانونی امیگریشن روکݨ کیتے مؤثر قدم چاتے ویندے پئن۔ ڈی جی برطانوی نیشنل کرائم ایجنسی گرائم بیگر آکھیا جو حکومت پاکستان نال مختلف شعبیاں اچ تعاون کریندی پئی اے۔ انہاں منشیات دی روک تھام بارے پاکستان دی کوششاں دی تعریف کیتی۔