اڄوکی اَٹھ آئینی ترامیم ویلھے دی لوڑھ اے، پارٹی کوں آپݨی پالیسی دی خلاف ورزی کرݨ آلے ممبر دے خلاف کارروائی دا حق حاصل اے، قائد ایوان بالا

اسلام آباد۔13نومبر (اے پی پی) قائد ایوان بالا، نائب وزیراعظم تے وزیرخارجہ سینیٹر محمد اسحاق ڈار آکھیا جو اڄوکی اَٹھ آئینی ترامیم ویلھے دی لوڑھ اے، اتے پارٹی کوں آپݨی پالیسی دی خلاف ورزی کرݨ آلے ممبر دے خلاف کارروائی دا حق حاصل اے۔ انہاں آکھیا جو او سینیٹر علی ظفر دا ذاتی طور تے بہوں احترام کریندن اتے او انہاں دے والد نال پارلیمنٹ اچ بہوں ویلھے کم کیتے۔ انہاں آکھیا جو سینیٹر علی ظفر اے بھُل گئن جو جݙاں عدم اعتماد دی تحریک پیش تھئی ہئی تاں کینویں کجھ منٹاں اچ اسمبلی توڑ ݙتی گئی ہئی۔ خمیس کوں سینیٹ دے اجلاس اچ ڳالھ مہاڑ کریندیں ہوئیں سینیٹر اسحاق ڈار آکھیا جو ستاویویں آئینی ترمیم اچ موجود خامیاں کوں ٹھیک کرݨ دا عمل صحیح رُخ اچ قدم اے۔ انہاں آکھیا جو حالیہ اَٹھ آئینی ترامیم ویلھے دی ضرورت ہن تاںجو پارلیمانی نظام ٻیا مضبوط تھیوے اتے آئین دی روح دے مطابق فیصلے تھیون۔ انہاں اپوزیشن کوں تنقید دا نشانہ ٻݨیندیں ہوئیں آکھیا جو جݙاں پنجاب حکومت ݙہاوݨ دی گالھ آندی اے تاں عدالتاں دے فیصلے یاد نئی رہندے۔ انہاں دا آکھݨ ہا جو اَگر کمیٹی اچ شامل نہ تھیوݨ دی وجہ کہیں “ریمورٹ کنٹرول” دی ہدایت ہئی تاں اے پارلیمانی روایتاں دے خلاف اے۔ سینیٹر اسحاق ڈار آئین دے آرٹیکل 63 دی وضاحت کریندیں ہوئیں آکھیا جو اے آپوں آپ نافذ نئی تھیندا۔ انہاں آکھیا جو اَگر کوئی ممبر ضمیر دے مطابق ووٹ ݙیندے تاں انھاں دا ووٹ گݨیا ویسی، لیکن ایں دے بعد پارٹی کوں اے حق حاصل اے جو او آپݨی پالیسی دی خلاف ورزی کرݨ آلے ممبر دے خلاف کارروائی کرے۔ لیڈر آف دی ہاؤس واضح کیتا جو جݙاں تئیں پارٹی نوٹس جاری نئی کریندی اتے سݨݨ دا موقع نئی ݙیندی، تݙاں تئیں او ممبر آپݨی حیثیت برقرار رکھیندے۔