سینیٹ توں 27ویں آئینی ترمیم اچ ٻئی ترامیم ݙو تہائی اکثریت نال منظور کر ڳھدی ڳئی

اسلام آباد۔13نومبر (اے پی پی) سینیٹ توں 27ویں آئینی ترمیم اچ ٻئی ترامیم ݙو تہائی اکثریت نال منظور کر ڳھدی ڳئن، ترامیم دے حق اچ 64 جݙاں جو مخالفت اچ 4 ووٹ آئے۔ خمیس کوں سینیٹ دا اجلاس چیئرمین سینیٹ یوسف رضا گیلانی دی سربراہی اچ تھیا جئیں اچ وفاقی وزیر قانون اعظم نذیر تارڑ 27ویں آئینی ترمیم اچ ٻئی ترامیم قومی اسمبلی توں منظور تھیوݨ دی صورت اچ پیش کرݨ دی تحریک پیش کیتی۔ تحریک دی منظوری دے بعد انہاں ترمیمی مسودہ ایوان اچ پیش کیتا۔ چیئرمین سینیٹ یوسف رضا گیلانی ایوان توں ترامیم دی شق وار منظوری ڳھدی۔ آئینی ترمیم دی شق وار منظوری دے بعد تقسیم نال ووٹنگ دا عمل کیتا گیا اتے سینیٹ اچ 5 منٹ تئیں گھنٹیاں وجائی ڳئی جݙاں جو ایں دوران سینیٹ ہال دے اندر آوݨ اتے ٻاہر ونڄݨ دے راہ بند کر ݙتے گئے۔ ووٹنگ دے دوران 64 ووٹ بل دی حمایت اچ اتے 4 مخالفت اچ آئے۔ بعد اچ چیئرمین سینیٹ نتائج دا اعلان کریندیں ہوئیں ݙسایا جو 27ویں ترمیم دی نوی ترامیم دی ووٹنگ دے دوران 64 ووٹ بل دی حمایت اچ اتے 4 مخالفت اچ آئے۔ چیئرمین سینیٹ یوسف رضا گیلانی ترامیم دی ݙو تہائی اکثریت نال منظوری دا اعلان کیتا۔ ترامیم دی منظوری دے دوران اپوزیشن ایوان اچ شورشرابہ جاری رکھیا جئیں تے چیئرمین سینیٹ انہاں کوں نعرے بازی توں منع کیتا۔ سینیٹ توں منظور 27ویں آئینی ترمیم اچ 6 اضافی ترامیم منظور کیتی ڳئی۔ آرٹیکل 6 دی شق 2 اے اچ ترمیم کر تے عدالت عظمیٰ اتے عدالت عالیہ دے نال وفاقی آئینی عدالت کوں شامل کر ڳھدا گیا جݙاں جو آرٹیکل 10 سودھے ݙوجھیاں پنج آئینی ترامیم اچ چیف جسٹس آف پاکستان دے عہدے کوں شامل کیتا گئے۔ ترمیم دے تحت چیف جسٹس آئینی عدالت اتے چیف جسٹس سپریم کورٹ اچوں سینئر چیف جسٹس آف پاکستان ہوسن۔ ترمیم دے تحت صدر مملکت، چیف الیکشن کمشنر اتے اٹارنی جنرل توں حلف گھنݨ دے مجاز چیف جسٹس آف پاکستان ہوسن۔ 27ویں آئینی ترمیم دے تحت وفاقی آئینی عدالت دا قیام عمل اچ آندا ویسی جݙاں جو چیف جسٹس آئینی عدالت دا تقرر ترائے سال کیتے کریسن اتے ججز دی ریٹائرمنٹ دی حد 68 سال ہوسی۔