وفاقی وزیر ڈاکٹر مصدق ملک نال کینیڈا دے ہائی کمشنر برائے پاکستان طارق علی خان دی ملاقات

اسلام آباد۔13نومبر(اے پی پی) وفاقی وزیر موسمیاتی تبدیلی و ماحولیاتی ہم آہنگی سینیٹر ڈاکٹر مصدق ملک نال کینیڈا دے ہائی کمشنر برائے پاکستان طارق علی خان ملاقات کیتی۔ ملاقات وچ پاکستان اتے کینیڈا وچال جاری تعاون اتے مستقبل دیاں سانجھی ترجیحاں تے ڳالھ مہاڑ کیتی ڳئی۔ ترجمان وزارتِ موسمیاتی تبدیلی موجب ہائی کمشنر طارق علی خان خیبر پختونخوا دے علاقے وانا وچ کیڈٹ کالج تے اڄوکے افسوسناک حملے تے ݙُکھ اتے افسوس دا اظہار کیتا اتے خطے وچ امن و استحکام دی خواہش دا پکا ارادہ کیتا۔ ہائی کمشنر کینیڈین کینولا آئل دی درآمد دے عمل وچ تعاون تے وفاقی وزیر دا شکریہ وی ادا کیتا۔ ملاقات وچ آپت دے دلچسپی دے مختلف شعبیں، خاص کر سماجی بہبود، ماحولیاتی طور تے موزوں زراعت اتے پائیدار اقتصادی ترقی وچ تعاون کوں ودھاوݨ تے ڳالھ مہاڑ کیتی گئی۔ ہائی کمشنر وفاقی وزیر کوں ݙسیا جو کینیڈین کمرشل کمیشن پاکستان کوں حکومتی سطح تے (جی ٹو جی) تعاون دے تحت کینیڈین چیزاں اتے سہولتاں ݙیوݨ وچ مدد ݙے سڳدے۔ انہاں مزید آکھیا جو کینیڈا ماحولیاتی تبدیلی نال ہم آہنگ جدید زرعی ٹیکنالوجی کوں ودھاوݨ تے کم کریندا پئے اتے ایں سلسلے وچ پاکستان نال سانجھ کرݨ چاہندے۔ ڈاکٹر مصدق ملک عالمی ماحولیاتی بحث وچ کینیڈا دے کردار دی تعریف کیتی اتے آکھیا جو توانائی دے شعبے وچ کینیڈا دی متوازن پالیسی پاکستان کیتے ہک اہم ماڈل دی حیثیت رکھیندی اے۔ وفاقی وزیر ہائی کمشنر کوں پاکستان وچ گرین کلسٹرز قائم کرݨ بارے سرکاری منصوبے بارے وی ݙسیا، جیں دا مقصد نینگراں دی جدت طرازی، گرین اسٹارٹ اپس، اتے سبز معیشت دی ترقی کوں ودھاوݨا اے۔ ملاقات وچ ݙوہیں پاسوں ایں عزم دا اظہار کیتا جو پاکستان اتے کینیڈا آپت دے تعاون، صاف توانائی کوں ودھاوݨ، اتے پائیدار ترقی دے سانجھے اہداف کوں حاصل کرݨ کیتے رابطیں کوں مزید مضبوط بݨیسن۔