کیڈٹ کالج وانا تے حملے دی منصوبہ بندی اتے کنٹرول افغانستان توں کیتا گیا ہا، وزارت اطلاعات و نشریات

اسلام آباد۔13نومبر(اے پی پی) وزارت اطلاعات و نشریات آکھیے جو کیڈٹ کالج وانا تے حملے دی منصوبہ بندی اتے کنٹرول افغانستان توں کیتا گیا ہا۔ وزارت اطلاعات و نشریات کیڈٹ کالج وانا تے دہشت گرداں دے حملے دے حوالے نال سوشل میڈیا ایکس تے اپݨے بیان اچ آکھیا جو کیڈٹ کالج وانا تے حملے دی منصوبہ بندی اتے کنٹرول افغانستان توں کیتا گیا ہا. وزارت اطلاعات و نشریات واضح کیتے جو حملے دی منصوبہ بندی افغانستان اچ خارجی زاہد کیتی اتے ایںدی آخری منظوری خارجی نور ولی محسود ݙتی ہئی۔ بیان توں واضح اے جو حملے اچ شامل سارے لوک افغان ہن اتے حملے دے تانے بانے افغانستان اچ موجود خارجی نور ولی محسود نال مِلدن، وانا اچ حملے کیتے سازوسامان امریکی ساخت دا ہا جیڑھا افغانستان توں ڳھن آیا گیا ہا۔ خارجی نور ولی محسود دے حکم تے ٹی ٹی پی توں حملے دی ذمہ داری ہٹا تے “جیش الہند” ناں دی تنظیم تے پا ݙتی گئی۔ وزارت اطلاعات و نشریات آکھیا جو افغان طالبان پاکستان اتے دوست ملکاں دے اعتراض پاروں فتنہ الخوارج تے حملیاں دی ذمہ داری قبول نہ کرݨ کیتے دباؤ پیندن، کیڈٹ کالج وانا تے حملے دا مقصد بھارتی ایجنسی “را” دے مطالبے تے پاکستان اچ سکیورٹی خطراں کوں ودھاوݨا ہا، حملے اچ ماریے ونڄݨ آلے افغان دہشت گرداں دی شناخت نال افغانستان توں تھیوݨ آلی دہشت گردی صاف طور تے ثابت تھیندی اے۔ ایں توں پہلے وزیر داخلہ وی بیان جاری کیتا ہا جو اسلام آباد کچہری اچ خودکش دھماکہ کرݨ آلے عثمان عرف قاری دا تعلق وی افغانستان توں ہا.