اسلام آباد کچہری حملے دی تحقیقات اچ وݙی پیشرفت، سہولت کار گرفتار

اسلام آباد۔14نومبر (اے پی پی) اسلام آباد جی الیون جوڈیشل کمپلیکس دھماکے دی تحقیقات اچ اہم پیشرفت سامݨے آئی اے۔ انٹیلی جنس بیورو اتے سی ٹی ڈی دی سانجھی کارروائی اچ خودکش حملے دے سہولت کار اتے دہشت گرد نیٹ ورک دے چار اہم ارکان کوں گرفتار کر ڳھدا گئے۔ تفصیلات دے مطابق گرفتار دہشت گرد ٹی ٹی پی/فتنہ الخوارج دے ایں سیل نال جڑے ہن جیڑھا جوڈیشل کمپلیکس جی الیون اسلام آباد تے خودکش حملے اچ شامل ہا. تفتیش دے دوران انکشاف تھیا جو افغانستان اچ موجود ٹی ٹی پی دے کمانڈر سعید الرحمن عرف داد اللہ ٹیلیگرام دے ذریعے پاکستان اچ حملے دی ہدایت ݙتی۔ گرفتار ہینڈلر ساجد اللہ عرف شینا اعتراف کیتا جو اونکوں داد اللہ ولوں خودکش بمبار عثمان عرف قاری دی تصویراں بھیجی ڳئی تاںجو او اونکوں پاکستان اچ وصول کرے۔ خودکش بمبار دا تعلق شینواری قبیلے توں ہا اتے او افغانستان دے علاقے اچین، ننگرہار دا رہائشی ہا۔ ساجد اللہ اعتراف کیتا جو عثمان کوں پاکستان پجݨ تے اسلام آباد دے ٻاہرلے علاقے اچ رکھیا ڳیا۔ بعد اچ داد اللہ دی ہدایت تے پشاور دے اکھن بابا قبرستان توں خودکش جیکٹ حاصل کر تے اسلام آباد منتقل کیتی ڳئی۔ دھماکے دے ݙینہ ساجد اللہ خودکش بمبار کوں جیکٹ پِوائی جئیں دا مقصد قانون نافذ کرݨ آلے اداریاں کوں ودھ توں ودھ جانی نقصان پڄاوݨ ہا۔ تفتیشی ذرائع دے مطابق افغانستان اچ موجود ٹی ٹی پی دی اعلیٰ قیادت مسلسل ایں نیٹ ورک دی رہنمائی کریندی پئی ہئی۔ اوݙوں حکام دا آکھݨ اے جو حملے اچ شامل پورا سیل گرفتار کر ڳھدا ڳئے جݙاں جو آپریشنل کمانڈر سودھے ترائے دہشت گرد ساتھیاں کوں وی حراست اچ ڳھدا گئے۔ تحقیقات جاری ہن اتے ٻئی گرفتاریاں اتے انکشافات متوقع ہن۔