وفاقی وزیر مواصلات عبدالعلیم خان دی زیر صدارت این ایچ اے دا جائزہ اجلاس

اسلام آباد۔15نومبر(اے پی پی) وفاقی وزیر مواصلات عبدالعلیم خان نیشنل ہائی وے اتھارٹی (این ایچ اے) دے تنظیمی ڈھانچے دی نویں سروں تشکیل ݙیوݨ دا اعلان کیتے جیں دے تحت پنجاب ریجن وچ انتظامی تبدیلیاں گھن آندے اونکوں چار زونز جنوبی پنجاب، شمالی پنجاب، وسطی پنجاب اتے ہک وَکھرا لاہور ریجن وچ ونݙیا ویسی۔ اتھاں ملݨ آلی پریس ریلیز دے موجب وفاقی وزیر مواصلات عبدالعلیم خان دی زیر صدارت این ایچ اے پنجاب اتے بلوچستان دے معاملیں دا جائزہ اجلاس تھیا۔ ایں موقع تے انہاں آکھیا جو این ایچ اے دے نویں ڈھانچے دے تحت پورے ملک وچ نویں ممبرز تعینات کیتے ویسن تاں جو نگرانی کوں مؤثر بݨایا ونڄ سڳے اتے عملی کارکردگی وچ بہتری گھن آئی ونڄ سڳے۔ وفاقی وزیر مواصلات کوں موٹروے ایم-5 دی بحالی تے بریفنگ وچ ݙسایا گیا جو جلال پور پیروالا سیکشن (ہک پاسے) دی مکمل بحالی 30 نومبر تئیں کر ݙتی ویسی۔ اجلاس وچ این ایچ اے دے ممبر بلوچستان صوبے دے وݙے شاہراہی نیٹ ورک اتے جاری منصوبیں تے تفصیلی بریفنگ ݙتی۔ وفاقی وزیر مواصلات ہدایت کیتی جو گزریل ہک سال دے دوران تھیوݨ آلے کہیں وی مالی ضیاع دا جائزہ ڳھدا ونڄے اتے سارے ریجنز وچ سخت احتساب کوں یقینی بݨایا ونڄے۔ عبدالعلیم خان آکھیا جو پورے ملک وچ نویں ٹول پلازیں دے ڈیزائن کوں ہک جھا رکھا ونڄے اتے انہاں کوں صرف انہاں جاہواں تے بݨایا ونڄے جتھاں ٹریفک دے بہاؤ نال مناسب آمدݨ دا جواز موجود ہووے۔ انہاں سیکریٹری مواصلات کوں مؤثر مانیٹرنگ کیتے ہفتہ وار فیلڈ دے دوریں دی ہدایت وی کیتی۔ معیار اتے یکسانیت تے زور ݙیندیں وفاقی وزیر آکھیا جو او این ایچ اے وچ یکساں سٹینڈرڈز نافذ کرݨ کیتے پُرعزم ہن، اتے اسلام آباد-مری ایکسپریس وے تے جاری کم کوں مستقبل دے منصوبیں کیتے ہک ماڈل قرار ݙتا۔ انہاں آکھیا جو آمدݨ محنت طلب کم اے، لیکن خرچے کلہپ جھپکی وچ تھی ویندن، ایں پاروں خرچے تے سخت نگرانی ٻہوں ضروری اے۔ انہاں آکھیا جو کجھ ول ول تھیوݨ آلے معاملے جیڑھے جو “پیچ ورک” اتے گھاء دی کٹائی دا مؤثر آڈٹ اوکھا اے اتے اکثر غیر ضروری وی ہوندن۔ انہاں متعلقہ ارکان کوں ہدایت ݙتی جو او رَل تے ٻہہ تے ہک صاف اتے شفاف میکنزم تیار کرن تاں جو ہر خرچے دی پوری جانچ پڑتال ممکن تھی سڳے۔ عبدالعلیم خان آکھیا جو این ایچ اے کوں ہک معزز اتے باوقار ادارہ بݨایا ونڄݨا چاہیدے، جیں تے مالی بے ضابطگیاں دا کوئی سایہ نہ ہووے۔ انہاں ݙسایا جو این ایچ اے دے دفتراں دی حالت اتے ظاہری معیار بہتر بݨاوݨ کیتے وی قدم چاتے ویندے پئن، تاں جو ادارے دا وقار پورے ملک وچ اُچا تھیوے۔ اجلاس وچ سیکرٹری مواصلات اتے پنجاب و بلوچستان ریجن دے ارکان شرکت کیتی۔