وفاقی وزیر داخلہ محسن نقوی دا کیڈٹ کالج وانا دا دورہ

اسلام آباد۔15نومبر(اے پی پی) وفاقی وزیر داخلہ محسن نقوی کیڈٹ کالج وانا دا دورہ کیتا، جتھاں سیکورٹی فورسز ہݨے ہی دہشت گرداں دے حملے کوں ناکام بݨایا جیڑھے طلبا اتے استاداں کوں نشانہ بݨاوݨ چاہندے ہن، جݙاں جو وزیر داخلہ حکومت دے ایں عزم دا پکا ارادہ کیتا جو او مسلح افواج دے نال کھڑے رہسن اتے پورے علاقے وچ تعلیمی اداریں دی حفاظت کوں یقینی بݨیسن۔ جاری بیان موجب وانا پجݨ تے وزیر داخلہ دا استقبال انسپکٹر جنرل فرنٹیئر کور خیبر پختونخوا (جنوب) میجر جنرل مہر عمر خان کیتا۔ دورے دے دوران وزیر داخلہ پاکستان آرمی دے افسراں اتے سپاہیاں نال ملاقات کیتی جنہاں حملے کوں کامیابی نال ناکام بݨایا اتے سارے کیڈٹس اتے استاداں کوں محفوظ طریقے نال بچا ڳھدا۔ انہاں طلباء اتے فیکلٹی ممبران نال وی ڳالھ مہاڑ کیتی اتے واقعے دے بعد انہاں دی ہمت اتے اُچے حوصلے دی تعریف کیتی۔ وزیر داخلہ کوں حملے کوں ناکام بݨاوݨ اتے سارے طلباء اتے استاداں کوں بغیر کہیں جانی ضیان دے کڈھݨ بارے بریفنگ ݙتی ڳئی۔ وزیر داخلہ پاکستان آرمی اتے فرنٹیئر کور دی پیشہ ورانہ مہارت اتے بہادری دی تعریف کیتی، انہاں دے اقدم کوں ہمت اتے مہارت دی ہک مثال قرار ݙیندیں آکھیا جو اے صرف دہشت گرد نہ ہن، اے درندے ہن جنہاں دا انسانیت نال کوئی تعلق کائںی ، کوئی مذہب ٻالاں کوں نشانہ بݨاوݨ دی اجازت نی ݙیندا اتے اے دہشت گرد کہیں مذہب دی پیروی نی کریندے۔ انہاں کوں انسان آکھݨ انسانیت دی توہین اے۔ انہاں آکھیا جو حملہ آوراں دا ارادہ آرمی پبلک سکول جیھا سانحہ دُہراوݨ دا ہئی، لیکن سیکورٹی فورسز دی فوری اتے فیصلہ کن کارروائی دہشت گرداں کوں جہنم واصل کیتا اتے انہاں دی سازش کوں ناکام بݨایا۔ محسن نقوی آپریشن وچ شامل سارے افسراں اتے سپاہیاں کوں “قومی ہیرو” قرار ݙتا اتے اعلان کیتا جو کیڈٹ کالج وانا دی جلدی نال جامع تزئین و آرائش اتے بحالی یقینی بݨائی ویسی۔ وزیر داخلہ حکومت دے عزم دا پکا ارادہ کیتا جو او مسلح افواج دے نال کھڑے رہسن اتے پورے علاقے وچ تعلیمی اداریں دی حفاظت کوں یقینی بݨیسن۔