وزیراعظم دی زیر صدارت ملکی ٹیکس نظام وچ اصلاحات تے ہفتہ وار جائزہ اجلاس

اسلام آباد۔15نومبر(اے پی پی) وزیراعظم محمد شہباز شریف آکھیے جو ٹیرف اصلاحات دی وجہ توں مثبت رجحانات اتے ایف بی آر کوں جدید، شفاف اتے بہتر بݨاوݨ دے حکومتی اقدامات دے درست تھیوݨ دا پکا ثبوت اے، نویں معاشی اعدادوشمار، حکومتی معاشی اصلاحات کوں درست ثابت کریندے پئن، معاشی ترقی دی رفتار ہر ݙینھ بہتر تھیندی پئی اے، ایف بی آر سودھے فنانس دی پوری ٹیم کوں شاباش، اصلاحات دے عمل تے مؤثر عملدرآمد دی رفتار مزید تکھی کیتی ونڄے تاں جو پاکستان معاشی مشکلات دے گرداب توں نجات پاوے اتے پائیدار ترقی دے اہداف کوں حقیقی طور تے پورا کرݨ وچ کامیاب تھیوے۔ وزیراعظم دفتر دے میڈیا ونگ توں جاری بیان موجب اے ڳالھ وزیراعظم محمد شہباز شریف اپݨی زیر صدارت ملکی ٹیکس نظام وچ اصلاحات تے ہفتہ وار جائزہ اجلاس اچ آکھی ۔ وزیراعظم آکھیا جو ٹیرف اصلاحات دی وجہ توں مثبت رجحانات اتے ایف بی آر کوں جدید، شفاف اتے بہتر بݨاوݨ دے حکومتی اقدامات دے درست تھیوݨ دا پکا ثبوت اے۔ وزیراعظم آکھیا جو نویں معاشی اعدادوشمار، حکومتی معاشی اصلاحات کوں درست ثابت کریندے پئن جنہاں دے نتیجے وچ معاشی ترقی دی رفتار ہر ݙینھ بہتر تھیندی پئی اے جیں دے ثبوت وی کاروباری برادری اتے قوم دے سامݨے آندے پئے ہن۔ ایں موقع تے وزیراعظم شہباز شریف کوں بریفنگ دے دوران ݙسایا گیا جو ایں سال تھیوݨ آلی ٹیرف اصلاحات دا ریونیو وصولی تے کوئی منفی اثر نی پیا بلکہ درآمدی سطح تے ڈیوٹیاں اتے ٹیکس دی وصولی وچ 25 فیصد وادھا تھیے۔ اجلاس کوں بریفنگ دے دوران ݙسایا گیا جو اے وادھا ڈیوٹی لڳݨ آلی مصنوعات دی مقدار وچ صرف3.6  فیصد وادھا دے باوجود سامݨے آیا اے۔ جیں نال اے خطرہ وی کُوڑا ثابت تھیا جو ٹیرف گھٹاوݨ نال ریونیو وصولی وچ کمی تھی ویسی۔ بریفنگ وچ آکھیا گئے جو ڈیوٹی فری درآمدات وچ  41.5 فیصد وادھا تھیے جیں دا مطلب اے جو درآمدات وچ وݙا وادھا انہاں مصنوعات وچ تھیے جیڑھی خام مال اتے انٹرمیڈیٹ دے درجے وچ آندن۔ ایں کوں تلویں سطح تے پیداواری اثرات وچ نمایاں بہتری دی علامت قرار ݙتا ونڄ سڳدے۔ بریفنگ دے دوران ݙسایا گیا جو ٹیرف وچ کمی اتے ٹیکس نظام دی بہتری سودھے جاری معاشی اصلاحات دا مقصد مینوفیکچرنگ اتے برآمدات وچ وادھا کرݨا اے تاں جو ملک وچ سرمایہ کاری کیتے ماحول کوں مزید سازگار بݨایا ونڄ سڳے۔ ڈیوٹی فری امپورٹ دے زمرے وچ آوݨ آلی شئیں دی درآمد وچ وادھا ݙیکھݨ وچ آیا جیڑھا حکومت دے ٹیرف کوں معقول بݨاوݨ دے قدماں دے مؤثر تھیوݨ دی علامت اے۔ ٹیرف اصلاحات دا مقصد اے ہا جو مینوفیکچرنگ دے شعبے وچ استعمال تھیوݨ آلے خام اجزاء دی قیمت وچ کمی آوے تاں جو ملکی برآمدات دا حجم ودھے اتے عالمی منڈی وچ مسابقت ممکن تھی سڳے۔ بریفنگ دے دوران ݙسایا گیا جو نویں اعداد و شمار توں ثابت تھیندے جو حکومت دی اے پالیسی کامیاب رہی اے۔ کسٹمز اصلاحات توں ملݨ آلے نتائج وچ ایف بی آر کوں جدید، شفاف اتے بہترین ادارہ بݨاوݨ دی کامیاب حکومتی حکمت عملی دے اثرات وی شامل ہن۔ وزیراعظم ٹیکس چوری روکݨ، تمباکو، ٹائلز اتے ݙوجھے وݙے شعبیں وچ ٹیکس وصولی دے نظام وچ موجود خامیاں کوں مرحلہ وار مؤثر انداز وچ ختم کرݨ کیتے انتظامی اتے ادارہ جاتی قدم چاوݨ دی ہدایت کیتی۔ وزیراعظم شہباز شریف ایف بی آر سودھے فنانس دی پوری ٹیم کوں شاباش ݙتی اتے زور ݙتا جو اصلاحات دے عمل تے مؤثر عملدرآمد دی رفتار مزید تکھی کیتی ونڄے تاں جو پاکستان معاشی مشکلات دے گرداب توں نجات پاوے اتے پائیدار ترقی دے اہداف کوں حقیقی طور تے پورا کرݨ وچ کامیاب تھیوے۔ اجلاس وچ وفاقی وزیر خزانہ محمد اورنگزیب، وفاقی وزیر موسمیاتی تبدیلی ڈاکٹر مصدق ملک، وفاقی وزیر پٹرولیم علی پرویز ملک، وزیر مملکت خزانہ بلال اظہر کیانی، سارے صوبیں دے چیف سیکرٹریز، چیئرمین ایف بی آر اتے ݙوجھے متعلقہ سرکاری عہدے داراں شرکت کیتی۔