صدر آصف علی زرداری دا عالمی یوم برداشت تے پیغام

اسلام آباد۔16نومبر(اے پی پی) صدرِ مملکت آصف علی زرداری آکھیے جو پاکستان ہم آہنگی، آپت دے احترام اتے سارے شہریاں وچال پُرامن رل تے رہݨ کوں ودھاوݨ دے عزم تے قائم اے۔ موجودہ دور وچ جتھاں دنیا پہلے توں ودھ ہک ݙوجھے نال جُڑی ہوئی اے، ڈائیلاگ، ہمدردی اتے تعاون کوں ودھاوݨ ویلھے دی اہم لوڑھ اے۔ ایوان صدر دے پریس ونگ توں جاری بیان موجب صدر مملکت آصف علی زرداری عالمی یوم برداشت دے موقع تے اپݨے پیغام وچ آکھیا جو برداشت اتے رواداری دے اصول اسلام دی اعلیٰ تعلیمات دا بنیادی حصہ ہن، جیڑھے انسانیت کیتے رحم، عدل اتے احترام دا درس ݙیندن۔ بانیٔ پاکستان قائدِ اعظم محمد علی جناحؒ ہک ایہو جیھی ریاست دا تصور پیش کیتا ہئی جتھاں مختلف مذہباں اتے ثقافتی پس منظر رکھݨ آلے لوک برابری، احترام اتے ہم آہنگی نال زندگی گزار سڳن۔ ایں وژن کوں برقرار رکھݨ اساں ساریں دی سانجھی ذمہ واری اے۔ اقوامِ متحدہ دے عالمی اعلامیہ انسانی حقوق ہر انسان دے بنیادی حقوق کوں منیے، جنہاں دی روشنی وچ پوری دنیا دے آئین اتے قوانین بݨیے، جݙاں جو پاکستان دے آئین وچ وی ہر شہری کوں مذہبی آزادی حاصل اے۔ انہاں آکھیا جو حکومت پاکستان ایہو جیھے عناصر دے خاتمے کوں اپݨی پالیسیاں دا مرکز بݨایا اے جیڑھے سماجی یا مذہبی استحصال دا سبب بݨ سڳدن۔ حکومت بین المذاہب ہم آہنگی پالیسی اتے مذہبی رواداری دی حکمتِ عملی تے عمل کریندی پئی اے، جنہاں دی باضابطہ منظوری وفاقی کابینہ ݙے چُکی اے۔ انہاں آکھیا جو اقلیتاں دے حقوق دے تحفظ کیتے پارلیمان نیشنل کمیشن فار مائنارٹیز رائٹس ٻل 2025 منظور کیتے، جݙاں جو سینیٹ وچ “منارٹیز کاکس” دے قیام نال اقلیتاں دے آئینی حقوق، رواداری دے ودھارے اتے متعلقہ قوانین تے عملدرآمد کوں مزید تکڑا بݨایا ڳئے۔ انہاں سارے شہریاں، خاص کر نینگراں تے زور ݙتا جو او ہر طرح دے تعصب، امتیاز اتے نفرت دے خلاف آواز چاون۔ انہاں علمائے کرام، اقلیتی رہنماواں اتے میڈیا توں وی اپیل کیتی جو او محبت، رواداری، بھرپی اتے اتحاد دے پیغام کوں عام کرن تاں جو پاکستان کوں ہک ایہو جیہا ملک بݨایا ونڄ سڳے جتھاں سماجی ہم آہنگی اتے اتحاد قومی شناخت بݨ ونڄے۔ انہاں دعا کیتی جو اللہ تعالیٰ پاکستان دے شہریاں کوں برداشت، شفقت اتے انسانیت دیاں قدراں کوں مضبوط بݨاوݨ دی توفیق عطا فرماوے تاں جو ملک کوں زیادہ پُرامن اتے خوشحال مستقبل دی طرف گھن آیا ونڄ سڳے