تحمل و برداشت دے عالمی ݙینھ تے وزیراعظم شہباز شریف دا پیغام

اسلام آباد۔16نومبر(اے پی پی) وزیراعظم محمد شہباز شریف آکھیے جو پاکستان دا آئین و قوانین اتے انسانی حقوق دے عالمی کنونشنز دی بنیادی روح، دہشت گردی اتے انتہا پسندی دے خلاف اتے تحمل و برداشت دا پیغام ڳھن آئی اے، تحمل و برداشت صرف معاشرتی حُسن نی بلکہ اے اسلامی تعلیمات دے وی عین موجب اے، آئین پاکستان وی ہر شہری کوں برابری اتے تحفظ ݙیندے اتے ہر شہری دا وی اے فرض عین اے جو او بین المذاہب ہم آہنگی اتے ہک ݙوجھے دے نال برداشت و بردباری دیاں اقداراں کوں ودھاوے، حکومتی پالیسی کوں بݨیندیں ویلھے سماجی و مذہبی ونݙ کوں ختم کرݨا اتے سارے طبقیں خاص کر اقلیتاں دی قومی دھارے وچ ہر ممکن شمولیت حکومت دی ترجیحات وچ شامل اے۔ وزیراعظم دفتر دے میڈیا ونگ توں جاری بیان دے موجب اے ڳالھ وزیراعظم محمد شہباز شریف تحمل و برداشت دے عالمی ݙینھ دے موقع تے اپݨے پیغام وچ آکھی۔ وزیراعظم آکھیا جو اج تحمل و برداشت دے عالمی ݙینھ تے پاکستان اقوام عالم دے نال ہم آواز تھی تے انسانی کردار دی ایں خاصیت کوں اُجاگر کریندا پئے۔ انہاں آکھیا جو پاکستان اتے عالمی برادری ہمدردی، پُرامن رل تے رہݨ، احترام اتے تحمل و برداشت دی سانجھی انسانی خاصیت نال وابستہ ہن۔ اے ݙینھ انسانی کردار دے ایں خاصے دی اہمیت کوں اُجاگر کریندے جو برداشت کرݨ دا رویہ کمزوری نی بلکہ حکمت، صبر، انسانیت اتے کردار دی مضبوطی دا مظہراے۔ وزیراعظم آکھیا جو پاکستان دا آئین و قوانین اتے انسانی حقوق دے عالمی کنونشنز دی بنیادی روح، دہشت گردی اتے انتہا پسندی دے خلاف اتے تحمل و برداشت دا پیغام ڳھن آئی اے۔ انہاں آکھیا جو تحمل و برداشت صرف معاشرتی حُسن نی بلکہ اے اسلامی تعلیمات دے وی عین موجب اے۔ اسلامی تعلیمات اساکوں مختلف عقیدیں، مذاہب ، تہذیب و تمدن کوں برداشت کرݨ اتے انہاں دے نال عزت و وقار نال ورتاؤ کرݨ دی ترغیب ݙیندی اے۔ وزیراعظم آکھیا جو پیغمبر آخر الزماں رحمت اللعالمین حضرت محمد صلی اللہ علیہ وآلہ وسلم دی سیرت، رواداری و برداشت دی اسلامی تعلیمات دا عملی نمونہ ہئی، اسلامی اصول اتے سارے عالمی قوانین، بنیادی انسانی اقداراں دی اہمیت کوں اڳوں رکھدیں رنگ و نسل دی تفریق توں بغیر انساناں کیتے برابری دے حقوق دی ترغیب ݙیندے ہن۔ انہاں آکھیا جو پاکستان وچ کئی پاسوں دی ثقافت، تہذیب و روایات اتے مختلف زباناں اپݨی پوری رونق نال قائم ہن اتے اے ہی بحیثیت قوم پاکستان دا حُسن اے۔