وزیراعظم شہباز شریف اتے اردن دے شاہ عبداللہ دوم دی ملاقات

سٹریٹجک اتے اقتصادی تعلقات دے ودھارے اتے علاقائی و عالمی فورمز تے سانجھے تعاون کوں ودھاوݨ دے عزم دا پکا ارادہ

اسلام آباد۔16نومبر(اے پی پی) وزیراعظم محمد شہباز شریف اتے اردن دے شاہ عبداللہ دوم پاکستان اتے اردن وچال سٹریٹجک اتے اقتصادی تعلقات دے ودھارے، علاقائی اتے بین الاقوامی فورمز تے سانجھے مفید تعاون کوں وسعت ݙیوݨ دے عزم دا پکا ارادہ کریندیں تجارت، سرمایہ کاری، صحت، سائنس و ٹیکنالوجی، تعلیم دے نال نال دفاعی شعبیں وچ تعاون ودھاوݨ دے موقع لبھݨ دی ضرورت تے زور ݙتے۔ وزیراعظم دفتردے میڈیا ونگ توں جاری بیان موجب وزیراعظم محمد شہباز شریف اتے اردن دے شاہ عبداللہ دوم ابن الحسین وچال وزیراعظم ہاؤس وچ ملاقات تھئی۔ نائب وزیراعظم اتے وزیر خارجہ سینیٹر محمد اسحاق ڈار، فیلڈ مارشل سید عاصم منیر، وفاقی وزیر اطلاعات و نشریات عطاء اللہ تارڑ، وفاقی وزیر موسمیاتی تبدیلی مصدق ملک اتے اعلیٰ سرکاری افسران وی ملاقات وچ موجود ہن۔ ملاقات وچ علاقائی سلامتی، امن دے اقدامات تے وی تفصیلی ڳالھ مہاڑ تھئی۔ ݙوہیں رہنماواں ملاقات دے دوران ڳالھ مہاڑ وچ ݙو طرفہ تعلقات کوں مزید گھاٹا کرݨ دے نال نال معیشت، تجارت، سرمایہ کاری، صحت، سائنس و ٹیکنالوجی، تعلیم دے نال نال دفاعی شعبیں وچ تعاون ودھاوݨ دے موقع لبھݨ دی ضرورت تے زور ݙتا۔ ݙوہیں رہنماواں پاکستان اتے اردن وچال اسٹریٹجک اتے اقتصادی تعلقات کوں ودھاوݨ، علاقائی اتے بین الاقوامی فورمز تے آپسی فیدہ ݙیوݨ آلے تعاون کوں وسعت ݙیوݨ دے عزم دا پکا ارادہ کیتا۔ وزیراعظم شاہ عبداللہ دوم ابن الحسین دے دورہ پاکستان دا خیر مقدم کریندیں اونکوں پاکستان اتے اردن وچال پائیدار دوستی دے ثبوت دے طور تے اُجاگر کیتا۔ شاہ عبداللہ دوم غزہ تنازعے دے نال نال جنگ بندی دے بعد غزہ وچ استحکام اتے انسانی ہمدردی دیاں کوششاں وچ اردن دے کردار کیتے پاکستان دی مسلسل حمایت دی تعریف کیتی۔ فلسطین دے معاملے تے ݙوہیں رہنماواں جنگ بندی دے بعد غزہ دے حوالے نال پاکستان اتے اردن دے اصولی موقف جیں وچ غزہ توں فلسطینیاں دی کہیں وی نقل مکانی دے حوالے نال کہیں وی سمجھوتے توں گریز کوں منیا۔ ݙوہیں رہنماواں شرم الشیخ وچ دستخط تھئے غزہ امن معاہدے دے حوالے نال اٹھ عرب اسلامی ملکاں، جیڑھے امریکہ دے نال رَل تے غزہ وچ جنگ بندی تے کم کریندے پئے ہن، وچال رابطے مزید ودھاوݨ تے اتفاق کیتا۔ وزیراعظم اردن دے شاہ عبداللہ دوم کوں پاکستان دے پڑوس خاص کر افغانستان اتے بھارت وچ تھیوݨ آلی اڄوکی پیش رفت  دا وی ݙسایا ۔ اردن دے شاہ عبداللہ دوم خطے وچ امن و استحکام کوں برقرار رکھݨ وچ پاکستان دے کلیدی کردار کوں منیا۔ شاہ عبداللہ دوم اپݨے دورہ پاکستان دے دوران گرمجوشی نال مہمان نوازی تے پاکستانی عوام اتے حکومت دا شکریہ ادا کیتا۔ ݙوہیں ملکاں وچال مختلف شعبیں وچ تعاون ودھاوݨ دے حوالے نال مفاہمتی یادداشتاں (ایم او یوز) دے تبادلے دی تقریب وی منعقد تھئی۔ تقریب وچ ݙوہیں رہنماواں شرکت کیتی۔ میڈیا، ثقافت اتے تعلیم دے شعبیں وچ مفاہمت دیاں یادداشتاں دا تبادلہ تھیا۔ وزیراعظم شاہ عبداللہ اتے انہاں دے نال آوݨ آلے وفد دے اعزاز وچ شام دے کھاݨے دا وی اہتمام کیتا ہئی