موسمیاتی بحران صرف مالی مدد دا معاملہ نی بلکہ موسمیاتی انصاف دا مطالبہ اے، وفاقی وزیر مصدق ملک دا کوپ 30 دے موقع تے ہائی لیول کلائمیٹ فنانس ڈائیلاگ توں خطاب

اسلام آباد۔16نومبر(اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو موسمیاتی بحران صرف مالی مدد دا معاملہ نی بلکہ موسمیاتی انصاف دا مطالبہ اے، اساں گرین ٹرانزیشن اتے موسمیاتی لچک تے مبنی ترقی کیتے پُرعزم ایسے۔ وزارت موسمیاتی تبدیلی اتے ماحولیاتی ہم آہنگی موجب اے ڳالھ انہاں برازیل دے شہر بیلیم وچ جاری کوپ-30 دے موقع تے منعقدہ ہائی لیول کلائمیٹ فنانس ڈائیلاگ وچ خاص ویڈیو پیغام دے ذریعے کلیدی خطاب کریندیں آکھی ۔ اپݨے خطاب وچ ڈاکٹر مصدق ملک آکھیا جو پاکستان ہندوکش۔قراقرم۔ہمالیہ دے خطے دے دامن وچ واقع اے جتھاں تقریباً 13 ہزار گلیشیئرز موجود ہن، اے دریائے سندھ دے نظام کوں پاݨی ݙیندن جیڑھا ملک دی ماحولیاتی اتے معاشی بنیاد اے۔ انہاں آکھیا جو پاکستان دی عالمی گرین ہاؤس گیسز وچ شرکت ہک فیصد توں وی گھٹ اے لیکن موسمیاتی خطریں وچ پاکستان مستقل طور تے دنیا دے ساریں توں ودھ متاثرہ ملکاں وچ شامل اے۔ ڈاکٹر مصدق ملک آکھیا جو موسمیاتی بحران صرف مالی مدد دا معاملہ نی بلکہ موسمیاتی انصاف دا مطالبہ اے۔ انہاں ݙسایا جو موجودہ عالمی موسمیاتی مالی مدد دا وݙا حصہ دراصل او قرضے ہن جیڑھے بنیادی طور تے تعلیم، صحت، انسانی ترقی اتے ݙوجھے پائیدار ترقیاتی اہداف (ایس ڈی جیز) کیتے مخصوص ہن لیکن انہاں کوں ہݨ قدرتی آفتاں نال نبڑݨ کیتے استعمال کرݨا پوندے جیں نال لمبے ویلھے دے ترقیاتی اہداف شدید متاثر تھیندے پئن۔ انہاں عالمی برادری تے زور ݙتا جو او موسمیاتی تبدیلی دے چیلنج نال نبڑݨ کیتے عزم دا مظاہرہ کرے اتے ایں ڳالھ کوں یقینی بݨاوے جو مناسب، رسائی دے قابل اتے منصفانہ موسمیاتی مالی مدد ݙتی ونڄے۔ ڈاکٹر مصدق ملک آکھیا جو اساں گرین ٹرانزیشن اتے موسمیاتی لچک تے مبنی ترقی کیتے پُرعزم ہیسے