لاہور۔16نومبر(اے پی پی) وفاقی وزیرداخلہ محسن نقوی اتے وفاقی وزیر اوورسیز پاکستانیز چوہدری سالک حسین علامہ اقبال ائیرپورٹ دا اچانک دورہ کیتا۔ ݙوہیں وزراء 2 گھنٹے تئیں ائیرپورٹ تے موجود رہیے اتے امیگریشن پراسیس دا مشاہدہ کیتا۔ وزیر داخلہ محسن نقوی امیگریشن کاؤنٹر تے رش ݙیکھ تے کاوڑ کیتی اتے پراسیس وقتی نبیڑݨ دے احکامات ݙتے۔ ݙوہیں وزراء ٻاہرلے ملک ونڄݨ آلے مسافراں نال ڳالھ مہاڑ کیتی اتے امیگریشن پراسیس …
وفاقی وزیرداخلہ محسن نقوی دا سالک حسین دے نال علامہ اقبال ائیرپورٹ دا دورہ
لاہور۔16نومبر(اے پی پی) وفاقی وزیرداخلہ محسن نقوی اتے وفاقی وزیر اوورسیز پاکستانیز چوہدری سالک حسین علامہ اقبال ائیرپورٹ دا اچانک دورہ کیتا۔ ݙوہیں وزراء 2 گھنٹے تئیں ائیرپورٹ تے موجود رہیے اتے امیگریشن پراسیس دا مشاہدہ کیتا۔ وزیر داخلہ محسن نقوی امیگریشن کاؤنٹر تے رش ݙیکھ تے کاوڑ کیتی اتے پراسیس وقتی نبیڑݨ دے احکامات ݙتے۔ ݙوہیں وزراء ٻاہرلے ملک ونڄݨ آلے مسافراں نال ڳالھ مہاڑ کیتی اتے امیگریشن پراسیس بارے پُچھیا۔ وفاقی وزیر سالک حسین سفری دستاویزات تے پروٹیکٹر سٹیکرز چیک کیتے۔ پروٹیکٹر دے تحت ڈرائیوردی نوکری کیتے ٻاہرلے ملک ونڄݨ آلے نینگرکوں ڈرائیونگ لائسنس نہ ہووݨ تے سفر توں روک ݙتا ڳیا۔ وفاقی وزیر سالک حسین کاوڑ کیتی اتے ایں واقع دی انکوائری دا حکم ݙتا۔ ایف آئی اے اہلکار دی مبینہ ملی بھگت نال ٻاہرلے ملک ونڄݨ آلے مسافر کوں امیگریشن عملے کاؤنٹر تے روک ڳھدا۔ وزیر داخلہ آف لوڈ کیتے ونڄݨ آلے مسافر کوں نجی کمپنی کوں ادا کیتی ڳئی رقم واپس ݙیوݨ دا یقین ݙیوائے۔ وزیر داخلہ محسن نقوی ݙوہیں نینگراں کوں روکݨ آلے امیگریشن اہلکاراں کوں سݙیا تے شاباش ݙتی اتے اپݨی جیب توں انعام ݙتا۔ وزیر داخلہ ݙوہیں اہلکاراں کوں تعریفی سرٹیفکیٹس وی ݙیوݨ دا اعلان کیتا۔ محسن نقوی آکھیا جو ضروری دستاویزات توں بغیر کہیں وی مسافر کوں سفر دی اجازت بالکل نہ ݙتی ونڄے۔ غیر قانونی امیگریشن بالکل برداشت نہ ہوسی۔ ملک دی بدنامی دا سبب بݨݨ آلے کہیں مسافر کوں سفر دی اجازت بالکل نہ ݙتی ویسی۔ ایف آئی اے یا کہیں وی ادارے دے شامل اہلکاراں دے خلاف سخت ایکشن ڳھدا ویسی۔ چوہدری سالک حسین آکھیا جو پروٹیکٹر دے تحت مسافراں دی متعلقہ نوکری دی مستند دستاویزات دی تصدیق ہر صورت کیتی ونڄے۔
