وزیراعظم دا پاکستان ریلوے کوں جدید طرز تے بݨاوݨ دا عزم، نویں شالیمار ایکسپریس اتے کراچی کینٹ سٹیشن دی اپ گریڈ سہولتاں دا افتتاح

کراچی ۔17نومبر (اے پی پی) وزیراعظم محمد شہباز شریف آکھیا جو پاکستان ریلوے دی ڈیجیٹائزیشن اتے جدید سہولتاں دی فراہمی ملکی معیشت کوں مضبوط بݨاوݨ اچ اہم کردار ادا کریسی، وفاقی حکومت، سندھ حکومت دے تعاون نال کراچی سرکلر ریلوے (کے سی آر) دی جدیدیت اتے صوبے سودھے ملک بھر دے ریلوے سٹیشناں دی اپ گریڈیشن کوں یقینی بݨیسی۔ انہاں اے ڳالھیں سنوار کوں اتھاں کراچی دے دورے اچ نویں شالیمار ایکسپریس اتے کراچی کینٹ ریلوے سٹیشن دے اپ گریڈ شدہ ویٹنگ ایریاز اتے لاؤنجز دی افتتاحی تقریب نال خطاب کریندیں ہوئیں کیتا۔ وزیراعلیٰ سندھ سید مراد علی شاہ، وفاقی وزیر ریلوے محمد حنیف عباسی، وفاقی وزیر اطلاعات تے نشریات عطاء اللہ تارڑ اتے ݙوجھی شخصیات وی تقریب اچ موجود ہن۔ وزیراعظم آکھیا جو وفاقی وزیر ریلوے حنیف عباسی عہدہ سنبھالݨ دے بعد ملک دے ریلوے نظام دی بہتری کیتے بھرپور محنت کیتی، لاہور ریلوے سٹیشن دی جدیدیت دے بعد کراچی کینٹ سٹیشن کوں وی جدید سہولتاں نال آراستہ کر ݙتا ڳئے۔ انہاں آکھیا جو سندھ حکومت دے تعاون نال صوبے دے سارے ریلوے سٹیشن جدید طرز تے بݨائے ویسن تاںجو مسافراں کوں بہتر سفری سہولتاں مِل سڳن۔ وزیراعظم آکھیا جو کراچی توں لاہور شالیمار ایکسپریس کوں نویں، اپ گریڈ شکل اچ چلایا ویندا پئے۔ انہاں کراچی کوں ملک دا معاشی مرکز اتے “پاکستان دا دل” قرار ݙتا۔ انہاں آکھیا جو پنجاب، سندھ، خیبرپختونخوا اتے بلوچستان دی حکومتاں دے نال نیڑے تعاون جاری رکھیا ویسی تاںجو ریلوے نیٹ ورک دی بہتری دے ذریعے قومی معیشت کوں مضبوط بݨایا ونڄ سڳے۔ انہاں وفاقی وزیر ریلوے حنیف عباسی دی کارکردگی دی تعریف کریندیں ہوئیں آکھیا جو انہاں پراݨے ریلوے نظام کوں جدید طرز تے بݨاوݨ اچ کلیدی کردار ادا کیتے۔ وزیراعظم آکھیا جو وفاقی حکومت سارے صوبیاں دے نال رَل تے ریلوے نیٹ ورک کوں وسطی ایشیا تئیں کھلیج ݙیسی اتے ازبکستان-افغانستان-پاکستان ریلوے لائن منصوبہ خاص اہمیت رکھیندے پئن۔ انہاں اسلام آباد-استنبول ریل روٹ دی بحالی تے وی زور ݙتا۔ وزیراعظم آکھیا جو وفاقی وزیر ریلوے ایشیائی ترقیاتی بینک دے نال پاکستان ریلوے دی بہتری کیتے ݙو ارب ڈالر دی فنانسنگ تے گالھ مہاڑ کیتی۔ وزیراعلیٰ سندھ ولوں کے سی آر کوں سی پیک اچ شامل کرݨ دی تجویز تے وزیراعظم پورا تعاون دی یقین دہانی کرائی اتے اونکوں اہم منصوبہ قرار ݙتا۔ وزیراعظم آکھیا جو 154 ریلوے سٹیشن پہلے ای جدید بݨائے ڳئن اتے جݙاں سارے وݙے اتے چھوٹے سٹیشن اپ گریڈ تھی ویسن تاں او وزیر ریلوے کیتے صدارتی ایوارڈ دی سفارش کریسن۔ ایں توں پہلے وفاقی وزیر ریلوے محمد حنیف عباسی آکھیا جو وزیراعظم دی رہنمائی اچ اٹھ مہینے دے گھٹ ویلھے اچ نمایاں بہتری حاصل کیتی ڳئی اے جنہاں اچ کراچی کینٹ سٹیشن دی جدیدیت اتے شالیمار ایکسپریس دی بحالی شامل اے۔ انہاں آکھیا جو روہڑی سٹیشن دی اپ گریڈیشن تے ہک ارب روپے خرچ کیتے ویندے پئن جݙاں جو کراچی سٹی سٹیشن تے وی کم جاری اے۔ انہاں آکھیا جو حکومتی پالیسی دے تحت 14 ٹریناں آؤٹ سورس کیتی ویندی پئن جݙاں جو ریلوے دے ہسپتال اتے سکول وی نجی شعبے دے حوالے کیتے ویندے پئن جڈانجو ریلوے ملازمین دے حقوق دا تحفظ یقینی بݨایا ویسی۔ ایم ایل-1 منصوبے تے وی کم جاری اے۔ وزیراعلیٰ سندھ سید مراد علی شاہ وزیراعظم دا کراچی آوݨ تے خیرمقدم کیتا اتے صوبائی حکومت ولوں پورے تعاون دی یقین دہانی کرائی۔ بعد اچ وزیراعظم کراچی کینٹ سٹیشن تے نویں شالیمار ایکسپریس دا افتتاح کیتا اتے اپ گریڈ ویٹنگ ایریا، سی آئی پی لاؤنج، جدید ڈائننگ ہال اتے کمپیوٹرائزڈ ٹکٹنگ سسٹم دا معائنہ کیتا۔ ایں موقع تے وفاقی وزراء، سینئر ریلوے حکام، آئی جی ریلوے اتے غیر ملکی سفارتکار وی موجود ہن۔