وفاقی وزیر مواصلات دا جلالپور پیر والا اچ چھل متاثرہ موٹروے دا دورہ، رہ ونڄݨ آلا کم تیکھے مکمل کرݨ دی ہدایت

ملتان۔ 17 نومبر(اے پی پی)وفاقی وزیر مواصلات عبد العلیم خان جلالپور پیر والا اچ سیلابی پاݨی توں شدید متاثرہ موٹروے دا دورہ کیتا اتے اتھاں جاری بحالی دے کم دا تفصیلی جائزہ ڳھدا۔ وفاقی وزیر متاثرہ موٹروے تے تھیوݨ آلے کماں کوں ݙیہدے متعلقہ افسراں اتے عملے توں بریفنگ ڳھدی، جیںدے اچ کم دی موجودہ پیشرفت، بحالی دے مرحلیاں تے تفصیلی معلومات ݙتی ڳئی۔ وفاقی وزیر موقع تے موجود افسراں کوں ہدایت کیتی جو متاثرہ موٹروے دی بحالی دے کم کوں ہر ممکن تیزی نال پورا کیتا ونڄے تاں جو آمد و رفت اچ شہریاں کوں گھٹ توں گھٹ اوکھ دا سامݨا کرݨا پووے۔ دورے دے موقع تے وفاقی وزیر مواصلات عبد العلیم خان دا آکھݨ ہا جو سیلاب دے بعد متاثرہ علاقیاں اچ تیکھے اقدامات ٻہوں ضروری ہن، حکومت پاکستان سیلاب متاثرین کوں ہر ممکن مدد ݙیندی پئی اے۔ حکومت سیلاب توں متاثرہ علاقیاں اچ انفراسٹرکچر دی بحالی تے توجہ ݙیندی پئی اے اتے شہریاں دی سہولت اتے محفوظ آمد و رفت سانڳے اقدامات کیتے ویندے پین۔ انہاں متعلقہ افسراں کوں ہدایت کیتی جو ساری مشینری، مواد اتے عملہ ویلھے تے اتے مؤثر انداز اچ تعینات کیتا ونڄے تاں جو کم جلدی پورا تھیوے اتے موٹروے دی بحالی ممکن تھی سڳے۔