پاکستان-ایران ݙو طرفہ سیاسی مشاورت دا تیرہواں دور، ݙو طرفہ تعلقات دے سارے پہلوواں تے ڳالھ مہاڑ

اسلام آباد۔17نومبر(اے پی پی) پاکستان-ایران ݙو طرفہ سیاسی مشاورت (بی پی سی) دے تیرہویں دور اچ ݙوہاں پاسوں ݙو طرفہ تعلقات دے سارے پہلوواں تے جامع گالھ مہاڑ کیتی ڳئی اتے گزریل ݙو طرفہ سیاسی مشاورتی مذاکرات اچ ڳھدے ڳئے فیصلیاں تے عملدرآمد دی صورتحال دا جائزہ ڳھدا ڳیا۔ ترجمان دفتر خارجہ ولوں جاری بیان دے مطابق پاکستان اتے ایران دے ݙو طرفہ سیاسی مشاورتی مذاکرات (بی پی سی) دا تیرہواں دور 17 نومبر 2025ء کوں اسلام آباد اچ تھیا۔ پاکستانی وفد دی قیادت سیکرٹری خارجہ آمنہ بلوچ کیتی جݙاں جو ایرانی وفد دی سربراہی سیاسی امور دے نائب وزیر ماجد تخت روانچی کریندے پئے ہن۔ ݙوہاں پاسوں دے اعلیٰ عہدیداراں مشاورتی مذاکرات اچ شرکت کیتی۔ ݙوہاں فریقاں ݙو طرفہ تعلقات دے سارے پہلوواں تے جامع گالھ مہاڑ کیتی اتے گزریل ݙو طرفہ سیاسی مشاورتی مذاکرات اچ ڳھدے ڳئے فیصلیاں تے عملدرآمد دی صورتحال دا جائزہ ڳھدا۔ ݙو طرفہ تجارت کوں ودھاوݨ اتے ایںدے اچ تنوع ڳھن آوݨ نال ہی توانائی، نقل و حمل دے رابطے، تعلیم اتے عوام توں عوام دے تعلقات دے شعبیاں اچ تعاون کوں ودھاوݨ تے اتفاق کیتا ڳیا۔ ݙوہاں فریقاں اہمیت دے حامل علاقائی اتے عالمی واقعات و رجحانات تے وی الایا۔ فریقین آپسی فائدے دے شعبیاں اچ نیڑے دے تعاون کوں ودھاوݨ کیتے سانجھے اقتصادی کمیشن (جے ای سی) اتے سانجھی تجارتی کمیٹی (جے ٹی سی) سودھا مختلف اداراتی میکانزم دے باقاعدہ اجلاساں دی اہمیت تے زور ݙتا۔ ݙوہاں فریقاں اقوام متحدہ، اسلامی تعاون دی تنظیم (او آئی سی) اتے اقتصادی تعاون دی تنظیم (ای سی او) سودھا بین الاقوامی فورمز تے تعاون جاری رکھݨ اتے سانجھے عالمی و علاقائی مسئلیاں تے گالھ مہاڑ کوں مضبوط بݨاوݨ دے اپنڑے عزم دا پکا ارادہ کیتا۔ اے مشاورتی مذاکرات پاکستان اتے ایران وچال سانجھی تاریخ، ثقافت اتے عقیدے تے مبنی نیڑے دے تعلقات دی عکاسی کریندن۔ ݙو طرفہ سیاسی مشاورتی مذاکرات دا اڳلا دور تہران اچ آپسی طور تے مناسب تاریخاں دے تعین دے بعد کرݨ تے اتفاق کیتا ڳیا۔