حکومت معیشت کوں بحران توں ترقی اتے خارجہ پالیسی کوں کلہیپے توں عالمی اہمیت دے پاسے ٹوریے، دوست ملکاں نال ݙو طرفہ تجارت سودھا مختلف شعبیاں اچ تعاون ودھدا پئے، عطاء اللہ تارڑ

اسلام آباد۔17نومبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو حکومت معیشت کوں بحران توں ترقی اتے خارجہ پالیسی کوں کلہیپے توں عالمی اہمیت دے پاسے ٹوریے، دوست ملکاں نال ݙو طرفہ تجارت سودھا مختلف شعبیاں اچ تعاون ودھدا پئے، اے ڳآلھ انہاں صنوبر انسٹیٹیوٹ ولوں “بدلدی دنیا اچ پاکستان دا کردار” دے عنوان تے  تھیوݨ آلے مباحثے نال خطاب اچ آکھی۔ وفاقی وزیر اطلاعات آکھیا جو پی ٹی آئی دے دور اچ دوست ملک ناراض ہن ٻھل موجودہ دور حکومت اچ پاکستان نہایت گھٹ ویلھے اچ خارجہ پالیسی دے معاملے تے ودھ اہمیت ڳھن ڳھدی اے، گزریل ݙو سالاں دے واقعات خاص کر مئی دی جنگ دے بعد دی صورتحال ساݙے قومی تشخص کوں ہک نویں سنڄاݨ ݙتی اے۔ وفاقی وزیر آکھیا جو پہلگام واقعہ دے بعد وزیراعظم محمد شہباز شریف ایں سانحے دی غیر جانبدار اتے شفاف تحقیقات دی پیشکش کیتی، پاکستان تے اکثر ایہو ڄھیں دہشت گردانہ حملیاں دا الزام لایا ویندا رہیا حالانکہ حقیقت اے ہے جو دہشت گردی توں ساریں توں ودھ متاثر تھیوݨ دے باوجود پاکستان دے خلاف باقاعدہ پروپیگنڈا کیتا ڳیا اتے ساکوں ہی دہشت گردی دا ذمہ دار ٹھہرایا ویندا رہیا۔ انہاں آکھیا جو پاکستان دہشت گردی دے خلاف ٻہوں قربانیاں ݙتیاں ہن، اساں 90 ہزار جاناں دی قربانی ݙتی اے، دنیا دے کہیں ملک دہشت گردی دے خلاف اتنی وݙی قربانی نئیں ݙتی۔ انہاں آکھیا جو پاکستان دہشت گردی دے خلاف جنگ اچ ارباں ڈالر دا نقصان برداشت کیتا، اساں دہشت گرداں اتے باقی دنیا وچال ہک ݙھال دا کردار ادا کریندے پئے ہن اتے جݙاں کوئی پاکستانی اپݨی جان قربان کریندے تاں اے صرف مادر وطن کیتے نئیں ٻھل دنیا کوں محفوظ بݨاوݨ کیتے وی اے۔ انہاں آکھیا جو اتنی قربانیاں رائیگاں ونجݨ ممکن نئیں، ہݨ ویلھا آ ڳئے جو دنیا ساݙی کہانی سُݨے اتے ایکوں صحیح انداز اچ سمجھے۔ انہاں آکھیا جو جنگ توں پہلے تحقیقات دی پیشکش کر تے اساں اے سنیہا ݙتا جو ساݙے ہتھ صاف ہن اتے ساݙا موقف دنیا قبول کیتا، ایں موڑ تے ساݙے دوستاں اتے اتحادیان نال تعلقات مزید مضبوط تھئے۔ وفاقی وزیر آکھیا جو تحقیقات دی پیشکش کر تے پاکستان ہک موثر سفارتی قدم چاتا جیںدی دنیا بھر اچ تعریف کیتی ڳئی، ایںدے بعد وزیراعظم، فیلڈ مارشل اتے نائب وزیراعظم دی سطح تے وݙے سفارتی رابطے تھئے جنہاں پاکستان دے بیانیے کوں دنیا دے سامݨے رکھݨ اچ اہم کردار ادا کیتا۔ مسلسل سفارتی رابطیاں پاکستان کوں دنیا دے سامݨے اپݨا موقف موثر طریقے نال پیش کرݨ اچ مدد ݙتی۔ انہاں آکھیا جو دنیا بدلدی پئی ہائی اتے پاکستان وی بدلیا، اساں ہک فعال سفارتی تبدیلی ݙٹھی کیوں جو پاکستان سفارت کاری کوں ٻہوں سنجیدگی نال ڳھدا۔ اساں بیانیے کوں موثر انداز اچ پیش کرݨ تے توجہ ݙتی، پاکستان دے موقف کوں عالمی میڈیا تے پڄاوݨ میری ذمہ داری ہائی اتے اساں ہر ممکن کوشش کیتی جو اے سنیہا دنیا تئیں پڄے۔ انہاں آکھیا جو ساݙے کولو سچ دی طاقت ہائی، ایں بنیاد تے جݙاں پاکستان اپݨی کہانی صحیح انداز اچ پیش کیتی تاں دنیا ایکوں سُݨیا اتے ایںدا اثر تھیا۔ موثر سفارت کاری دے نال صحیح معلومات تے مبنی مہم دے ذریعے معلومات اتے پروپیگنڈے دا کامیابی نال مقابلہ کیتا ڳیا۔ انہاں آکھیا جو پاکستان ہر محاذ تے موجود ہا اتے صحیح معلومات ݙیوݨ تے ڈی جی آئی ایس پی آر دے نال قائم مثالی ہم آہنگی قابل تعریف ہائی جیںدے بغیر اے کامیابی ممکن نہ ہائی۔ انہاں آکھیا جو بیانیے دے محاذ تے پاکستان کامیاب رہیا اتے سفارتی محاذ تے وی اساں کوں کامیابی حاصل تھئی، جݙاں حقیقت اچ معاملہ کارروائی تئیں پڄا تاں اللہ دے فضل نال اساں ست بھارتی طیارے ڈھوائے ہن۔ انہاں آکھیا جو جݙاں پاکستان کوں جارحیت دا سامݨا کرݨا پیا تاں ایںدا بھرپور جواب ݙتا جیئں ساݙی عسکری طاقت کوں صاف طور تے ثابت کیتا اتے بیانیے دی جنگ اتے سفارتی محاذ ݙوہاں اچ کامیابی حاصل تھئی اتے جݙاں اصلی جنگ دی واری آئی تاں پاکستان شاندار کارکردگی ݙکھائی اتے صرف چار گھنٹیاں اچ ہی بھارت کوں جنگ بندی دی درخواست کرݨی پئی جیںدے توں اے صاف تھیا جو پاکستان واقعی بدل چُکیے۔ انہاں آکھیا جو ہک قوم دے طور تے جیڑھا اتحاد اساں ݙکھایا ایکوں منّݨا ہوسی، پاکستانی عوام دی حوصلہ مندی اتے یکجہتی اختلافاں کوں پچھے پا ݙتا اتے میں ایوان اچ آکھیا ہا جو اڄ کوئی سیاسی پوائنٹ سکور کرݨ دا موقع نئیں، اساں سارے ہک پیج تے ہاسے اتے رَل تے دشمن دا مقابلہ کرݨ کیتے پُرعزم ہاسے اتے الحمداللہ ایہو تھیا اتے اے اتحاد جاری اے۔ انہاں آکھیا جو سوشل میڈیا تے نہایت سنجیدہ صورتحال ہائی، ساݙے نینگر ایہو جھیں میمز بݨیندے پئے ہن جنہاں دشمن کوں لاجواب کر ݙتا۔ جنگ سنجیدگی دا معاملہ ہوندے ٻھل ساݙی نوجوان نسل اپݨے انداز اچ دشمن دے خلاف ہک موثر محاذ سنبھالیا۔ انہاں آکھیا جو نینگراں خود ذمہ داری ڳھندے ایں ڈیجیٹل محاذ تے پاکستان کیتے جنگ لڑی۔ انہاں آکھیا جو ڈیجیٹل دنیا اچ لوک ݙو قسماں دے ہوندن، ہک ڈیجیٹل نیٹیوز اتے ݙوجھے ڈیجیٹل امیگرینٹس۔ بعض اوقات ڈیجیٹل امیگرینٹس کوں ڈیجیٹل میڈیا دیاں حقیقتاں کوں سمجھݨ اچ ویلھا لڳدے ٻھل ڈیجیٹل دور اچ پیدا تھیوݨ آلے نیٹیوز ایکوں اساں ساریں توں بہتر سمجھدن۔ ایہا وجہ اے جو ڈیجیٹل نیٹیوز اپݨی وکھری حکمت عملی اپنائی اتے ایںدے نال ایں محاذ تے کامیابی حاصل کیتی۔ انہاں آکھیا جو پوری ہم آہنگی اتے یکجہتی پاکستان کوں کامیابی ݙیوائی اتے اج پاکستان عالمی سطح تے اہمیت حاصل کر چُکیے۔ غزہ دی صورتحال اتے جنگ بندی دے معاملیاں اچ پاکستان انہاں عرب و اسلامی ملکاں اچ شامل اے جنہاں امن قائم کرݨ اچ ثالثی اتے مذاکرات اچ حصہ ڳھن تے آخر کار جنگ بندی ممکن بݨائی۔ انہاں آکھیا جو اے پاکستان کیتے ہک وݙی کامیابی اے جو دنیا دے ملکاں ایکوں سنجیدگی نال ڳھدا اتے قبول کیتا جو ساݙے مشورے اتے موقف نہایت اہم اتے متعلقہ ہن۔ ایں سال پاکستان اچ کئی اعلیٰ سطح دورے تھئے۔ گزریل ݙیݙھ سال اچ پاکستان دیاں سفارتی مصروفیات عروج تے رہیاں، ایں دوران اساں ایس سی او سمٹ دی میزبانی کیتی اتے 14 سال بعد 12 وزرائے اعظم پاکستان دے دورے تے آئے۔ اسلام آباد آوݨ آلے حکومتی سربراہان سٹریٹجک تعلقات، علاقائی تعاون، انسداد دہشت گردی اتے علاقائی رابطیاں تے گالھ کیتی اتے اے سارے معاملے مسلسل زیر غور ہین۔ وفاقی وزیر آکھیا جو عالمی تعلقات سانڳے پاکستان 2027ء اچ ایس سی او ہیڈ آف اسٹیٹ سمٹ دی میزبانی کریسی جیڑھا ہک وݙا ایونٹ ہوسی۔ انہاں آکھیا جو سعودی عرب دے نال سٹریٹجک میوچل ڈیفنس ایگریمنٹ پاکستان کیتے اہم تاریخی قدم ثابت تھیا، عوام ایںدے تےماݨ کریندن جݙاں جو ریاض اچ25 کلومیٹر دے فاصلے تئیں پاکستانی پرچم اُچا اتے مسلسل لہراندا رہے۔ انہاں آکھیا جو گزریل دورے اچ اقتصادی تعاون دے فریم ورک دے آغاز پاکستان دی معیشت دی بحالی دے حوالے نال سعودی عرب دے نال تعلقات مزید مضبوط کیتے۔ اقتصادی بہتری دے حوالے نال اے ہک اہم کامیابی اے کیوں جو پاکستان دی ریٹنگز اتے میکرو اکنامک اشاریے بہتر تھئن اتے عالمی مالیاتی ادارے پاکستان دی اقتصادی کارکردگی دی تعریف کریندے پئن۔ انہاں آکھیا جو حکومت معیشت کوں بحران توں ترقی دی راہ تے پا ݙتے اتے خارجہ تعلقات کوں تنہائی توں عالمی اہمیت تئیں پُڄایا، اے ݙو نعرے حکومت دی کارکردگی کوں چنڳی طرحاں بیان کریندن جو الحمداللہ اساں معیشت اتے خارجہ پالیسی ݙوہاں وچ نمایاں پیشرفت کیتی اے۔ وفاقی وزیر آکھیا جو پاکستان دا مستقبل روشن اے۔ انہاں آکھیا جو افغانستان دے معاملے اچ وی پاکستان کولو نہ رد کرݨ آلے ثبوت موجود ہن جیڑھے افغان سرزمین دہشت گردی کیتے استعمال تھیندی رہی اے۔ ہر وݙے واقعے دی تحقیقات اچ کہیں نہ کہیں مقام تے افغان شہری دا تعلق ضرور سامݨے آندے اتے ایں صورتحال نال پاکستان نمٹدا پئے۔ ایں حوالے نال پاکستان دا ٻہوں صاف اتے مضبوط موقف اے۔ انہاں آکھیا جو موجودہ صورتحال اچ پاکستان دی معیشت، غیر ملکی سرمایہ کاری، سٹریٹجک تعلقات جیںدے اچ علاقائی اتے بین الاقوامی تجارت اتے کاروبار شامل ہن، ٻہوں حوصلہ افزا ہین۔ انہاں آکھیا جو پچھلے مہینے ساݙا ملائیشیا دا نمایاں دورہ وی تھیا۔ ملائیشیا دے نال پاکستان دے تجارتی اتے سرمایہ کاری دے شعبیاں وچ سٹریٹجک تعلقات مزید مضبوط تھیندے پئن۔ انہاں آکھیا جو مجموعی طور تے موجودہ بدلدی ہوئی صورتحال اچ پاکستان صحیح طریقے نال اقدامات چاتن۔ انہاں آکھیا جو دوحہ تے حملے دے بعد پاکستانی وفد دوحہ پڄݨ آلے پہلے وفداں اچ شامل ہا جئیں قطر دی قیادت نال یکجہتی کیتی۔ انہاں آکھیا جو پاکستان نہ صرف صحیح اقدامات چاتن ٻھل اینڄھی پالیسی وی اپنائی جیںدے تحت ایکوں سفارتی میدان اچ کئی کامیابیاں ملین۔ اے کامیابیاں سول و فوجی قیادت جیںدے اچ وزیراعظم شہباز شریف اتے فیلڈ مارشل سید عاصم منیر وچال موجود مثالی ہم آہنگی دا نتیجہ ہن۔ انہاں آکھیا جو ملک اچ استحکام پاکستان کوں ٻاہرلے ملک موثر انداز اچ اپݨا موقف پیش کرݨ دی طاقت ݙتی۔ ݙوجھے ملک وی پاکستان دے نال تعلقات مضبوط کرݨ دے خواہشمند ہن۔ وفاقی وزیر آکھیا جو امریکہ دے صدر ڈونلڈ ٹرمپ کئی واری پاکستان، وزیراعظم اتے فیلڈ مارشل دی تعریف کیتی اتے ول ول ست طیاریاں دا ذکر کیتا۔ انہاں آکھیا جو اے غور کرݨ دی گالھ اے جو پاکستان دا امریکہ دا دورہ انتہائی کامیاب رہیا، تعلقات اچ نمایاں بہتری آئی، ایویں ہݨ دورہ چین وی اہم رہیا۔ پاکستان دے ہر ملک دے نال تعلقات دی اپݨی منفرد نوعیت اے ایں پاروں ہک تعلق کہیں ݙوجھے تعلق دی قیمت تے قائم نئیں تھی سڳدا۔ انہاں آکھیا جو ساݙی خارجہ پالیسی دی کامیابی دا ایہو راز اے، ایں سانڳے اساں مستقبل کیتے ہک مضبوط، موثر اتے عملی خارجہ پالیسی اپناوݨ چاہندے ہیں جیڑھی نہ صرف پاکستان کوں عالمی سطح تے عزت ݙیوے ٻھل ساݙی معیشت کوں وی نویں بلندیاں تئیں ڳھن ونڄے۔