سکیورٹی فورسز خیبر پختونخوا اچ ݙو کارروائیاں دے دوران بھارتی حمایت یافتہ فتنہ الخوارج دے 15 دہشت گرداں کوں ہلاک کر ݙتا، آئی ایس پی آر

راولپنڈی ۔18نومبر (اے پی پی) سکیورٹی فورسز خیبر پختونخوا اچ ݙو مختلف کارروائیاں اچ بھارتی حمایت یافتہ فتنہ الخوارج دے 15 دہشت گرداں کوں ہلاک کر ݙتے۔ پاک فوج دے شعبہ تعلقات عامہ (آئی ایس پی آر) توں جاری بیان دے مطابق 15 اتے 16 نومبر کوں خیبر پختونخوا اچ ݙو انڄ انڄ کارروائیاں اچ بھارتی پراکسی فتنہ الخوارج توں تعلق رکھݨ آلے 15 دہشت گرد ماریے ڳئے۔ پہلی کارروائی ضلع ڈیرہ اسماعیل خان دے علاقے کولاچی اچ دہشت گرداں دی موجودگی دی خفیہ اطلاع تے کیتی ڳئی۔ سکیورٹی فورسز دہشت گرداں دے ٹکاݨے کوں مؤثر انداز اچ نشانہ بݨایا۔ ایں آپریشن دے نتیجے اچ دہشت گرداں دے سرغنہ عالم محسود سودھے 10 خوارج جہنم واصل تھئے۔ شمالی وزیرستان دے علاقے دتہ خیل اچ ݙوجھی کارروائی اچ سکیورٹی فورسز ٻئے 5 دہشت گرداں کوں ہلاک کر ݙتا۔ علاقے اچ کلیئرنس اتے سینی ٹائزیشن دی کارروائیاں جاری ہن تاںجو کہیں ݙوجھے بھارتی حمایت یافتہ خوارج دی موجودگی کوں ختم کیتا ونڄ سڳے۔ سکیورٹی فورسز اتے قانون نافذ کرݨ آلے اداریاں ولوں وفاقی ایپکس کمیٹی دی منظور کیتی ڳئی حکمتِ عملی “عزمِ استحکام” دے تحت ملکی اتے غیر ملکی حمایت یافتہ دہشت گردی دے خلاف مہم پوری طاقت نال جاری رہسی۔