پاکستان اچ سکھ برادری دے مقدس مقامات دی ݙیکھ بھال اتے ہر ممکن سہولتاں ݙتیاں وینداں پین، وزیراعظم دی امریکہ اچ وسݨ آلی سکھ برادری دی تنظیم دے صدر جسدیپ سنگھ نال ڳالھ مہاڑ

اسلام آباد۔18نومبر(اے پی پی)وزیراعظم محمد شہباز شریف آکھیے جو پاکستان اچ سکھ برادری دے مقدس مقامات اتے گردواراں دی ݙیکھ بھال اتے ہر ممکن سہولتاں کوں یقینی بݨایا ویندا پئے۔ انہاں اے ڳالھ امریکہ اچ رہݨ آلی سکھ برادری دی تنظیم دے صدر جسدیپ سنگھ نال گالھ مہاڑ اچ آکھی ڄئیں انہاں نال اسلام آباد اچ ملاقات کیتی۔ وزیراعظم آفس دے میڈیا ونگ ولوں جاری بیان دے مطابق ملاقات اچ وفاقی وزیر قانون و انصاف اعظم نذیر تارڑ اتے پاکستانی نژاد امریکی کاروباری شخصیت ساجد تارڑ وی موجود ہن۔ وزیراعظم پاکستان آوݨ تے جسدیپ سنگھ دا خیرمقدم کریندے آکھیا جو پاکستان اچ سکھاں دے ٻہوں سارے مقدس مذہبی مقامات موجود ہن، دنیا بھر توں سکھ برادری دے لوک مذہبی رسماں دی ادائیگی کیتے آندن اتے پاکستان انہاں دی سوھݨی مہمان نوازی کریندے۔ انہاں آکھیا جو اساں پاکستان آوݨ آلی سکھ برادری کوں ہر ممکن سہولتاں ݙیوݨ کیتے کوشش کریندے پئے ہیں، اے ساݙے کیتے وݙے ماݨ دی ڳالھ اے جو پاکستان سکھ برادری دے مقدس مقامات اتے گُردواراں دی ݙیکھ بھال اتے اتھاں ہر ممکن سہولتاں کوں یقینی بݨیندا پئے۔ وزیراعظم آکھیا جو اساں پاکستان اچ رہݨ آلی سکھ برادری دی فلاح و بہبود اتے دنیا بھر توں سکھ یاتریاں کوں مزید سہولتاں دی فراہمی دے حوالے نال حکمت عملی ترتیب ݙیسوں۔ سمندر پار پاکستانیاں دا ذکر کریندے وزیراعظم آکھیا جو بیرون ملک پاکستانی ملک دی ترقی و خوشحالی اتے ملک دا ناں روشن کرݨ دے حوالے نال اہم کردار ادا کریندے پئن۔ جسدیپ سنگھ پاکستان اچ بہترین میزبانی اتے سکھ یاتریاں دی مہمان نوازی تے وزیراعظم اتے حکومت پاکستان دا شکریہ ادا کیتا۔