شنگھائی تعاون تنظیم دے رکن ملک اقتصادی تعاون کوں تیکھا کرݨ اتے سانجھیدار ملکاں نال رابطے ودھاو، نائب وزیر اعظم اتے وزیر خارجہ اسحاق ڈار دا ایس سی او سربراہی اجلاس نال خطاب

اسلام آباد۔18نومبر(اے پی پی)نائب وزیر اعظم اتے وزیر خارجہ سینیٹر محمد اسحاق ڈار شنگھائی تعاون تنظیم (ایس سی او) دے رکن ملکاں تے زور ݙتے جو او اقتصادی تعاون کوں تیکھا کرن، سانجھیدار ملکاں نال رابطیاں کوں وسعت ݙیون اتے ابھردے ہوئے عالمی اتے علاقائی چیلنجز نال نبڑݨ کیتے تنظیم کوں نواں بݨاون۔ اے ڳالھ انہاں ماسکو اچ ایس سی او کونسل آف ہیڈز آف گورنمنٹ دے اجلاس نال خطاب اچ آکھی۔ نائب وزیراعظم آکھیا جو سربراہی اجلاس اچ منظور کیتے ڳئے سانجھے اعلامیہ اتے دستاویزات علاقائی خوشحالی دے پاسے اجتماعی کوششاں دی رہنمائی کرݨ اچ ٻہوں اہم ثابت تھیسن۔ انہاں آکھیا جو شنگھائی تعاون تنظیم دا تجارت، معیشت، ثقافت اتے انسانی ہمدردی تے کھنڈیا ہویا تعاون دا ایجنڈا ہک پُختہ مستقبل تے مبنی تنظیم دی بنیاد رکھدے۔ نائب وزیر اعظم محمد اسحاق ڈار حالیہ تیانجن سربراہی اجلاس دے نتیجیاں دا ذکر کریندے آکھیا جو ایس سی او ڳھاٹے اقتصادی انضمام دے پاسے ٹُردی پئی اے۔ انہاں تجارتی تعاون، بہتر انفراسٹرکچر کنکٹیویٹی، سرمایہ کاری دی سانجھیداری اتے ایس سی او دے خطے اچ پائیدار ترقی دے اہم ستوناں دے طور تے ڈیجیٹل معیشتاں دے ودھارے دا وی آکھیا۔ انہاں انسانی ہمدردی دے تعاون اتے آفتاں نال نبڑݨ کیتے شنگھائی تعاون تنظیم دی صلاحیت دا وی ذکر کیتا اتے آکھیا جو پاکستان “ٹیکنالوجی نال آراستہ فعال ڈیزاسٹر مینجمنٹ سسٹم”  ٻݨائے۔ انہاں علاقائی تیاریاں کوں مضبوط بݨاوݨ کیتے رکن ملکاں نال فرضی مشقاں کرݨ تے پاکستان دی رضامندی دا اظہار کیتا۔ انہاں شنگھائی تعاون تنظیم دے مبصر اتے سانجھیدار ملکاں نال مضبوط مشغولیت تے زور ݙیندے آکھیا جو ایس سی او اڳو تے ودھے اتے انہاں ملکاں کوں انہاں دی مہارت دے مطابق پروجیکٹ تے مبنی اقدامات اچ شامل کرے۔ انہاں انگریزی کوں “ورکنگ لینگوئیج” دے طور تے متعارف کراوݨ دا وی خیرمقدم کیتا اتے ایس سی او دی عالمی رسائی ودھاوݨ کیتے ٹرانسلیشن یونٹس دے قیام دی تجویز پیش کیتی۔ نائب وزیر اعظم عملی تعاون کیتے کئی تجویزاں دا خاکہ وی پیش کیتا جیںدے اچ ایس سی او انٹربینک کنسورشیم جھیں مالیاتی ٹولز کوں فعال کرݨ اتے ایس سی او ڈویلپمنٹ بینک کیتے کنکٹیویٹی اتے تکنیکی تعاون دے منصوبیاں دی مدد کیتے منصوبیاں کوں اڳو تے ودھاوݨ شامل اے۔ نائب وزیر اعظم سینیٹر محمد اسحاق ڈار انسانی سرمائے دی ترقی دی اہمیت تے زور یندیں ہوئیں ایس سی او یونیورسٹی نیٹ ورک کوں ہک کنسورشیم اچرلاوݨ دی حمایت کیتی جیڑھا جو لاگو علم تے مرکوز ہووے۔ انہاں آکھیا جو ایہو جیھا اقدام انفارمیشن ٹیکنالوجی، مصنوعی ذہانت، زراعت، آبی وسائل دے انتظام اتے ٹیلی میڈیسن سودھے اہم شعبیاں وچ طالب علماں دے تبادلے اتے سانجھی تحقیق کوں فروغ ݙیسی۔ علاقائی رابطیاں کوں مضبوط بݨاوݨ کیتے پاکستان دے عزم دا اعادہ کریندیں ہوئیں انہاں آکھیا جو ایس سی او کوں “سانجھی کامیابی کیتے لانچ پیڈ” دے طور تے کم کرݨا چاہیدے جیڑھا رکن ملکاں وچال زیادہ جدت، آپسی ربط اتے انضمام کوں فروغ ݙیوݨ وچ کردار ادا کرے۔