وفاقی وزیر اطلاعات عطاء اللہ تارڑ دی سری لنکا دے نائب وزیر برائے امور نوجوانان تے کھیڈ سوگاتھ تھلا کراتھنے نال ملاقات، ݙوہیں مُلکاں دا کھیݙاں دے شعبے اچ سانجھ ودھاوݨ تے اتفاق

اسلام آباد۔ 20 نومبر (اے پی پی) وفاقی وزیر اطلاعات تے نشریات عطاء اللہ تارڑ نال سری لنکا دے نائب وزیر برائے امور نوجوانان تے کھیڈ سوگاتھ تھلا کراتھنے ملاقات کیتی ۔ ایں موقع تے سری لنکا دے ہائی کمشنر رئیر ایڈمرل فریڈ سینویراتھنے، ڈپٹی ہائی کمشنر کرسٹی روبن اتے منسٹر قونصلر (ڈیفنس) بریگیڈیئر جی اے کے آر گنارتنے وی انہاں دے نال ہن۔ ملاقات اچ کرکٹ دے فروغ، کھیݙاں اچ آپسی تعاون اتے ݙو پاسہ رابطیاں تے تفصیلی گالھ مہاڑ تھئی ۔ ݙوہیں مُلکاں ولوں کھیݙاں کوں عوامی سطح تے رابطیاں دے فروغ دا موثر ذریعہ قرار ݙیندیں ہوئیں ایں شعبے اچ سانجھ کوں ٻیا وسعت ݙیوݨ تے اتفاق کیتا گیا ۔ وفاقی وزیر اطلاعات آکھیا جو پاکستان اتے سری لنکا دے تعلقات اعتماد، احترام اتے سانجھیاں قدراں تے قائم ہن، کھیݙاں دے میدان اچ تعاون نہ صرف نینگر نسل کوں نیڑے گھن آندے بلکہ ݙوہیں مُلکاں دی عوام وچال تعلقات کوں ٻیا مضبوط کریندے۔ انہاں آکھیا جو پاکستان خطے اچ سپورٹس ڈپلومیسی کوں ودھاوݨ کیتے سنجیدہ اقدامات کریندا پئے۔ وفاقی وزیر اطلاعات کھیݙاں اچ تعاون دے فروغ تے سری لنکا دی حکومت اتے قیادت دا شکریہ ادا کریندیں ہوئیں آکھیا جو سری لنکن پارلیمنٹ دے بجٹ اجلاس دے باوجود سری لنکا دے نائب وزیر دا دورہ پاکستان ݙوہیں مُلکاں دے دیرینہ دوستانہ اتے بااعتماد تعلقات دا واضح ثبوت اے، امید اے دورہ ݙو پاسہ تعلقات خاص کر کھیݙاں اتے نینگر طبقے دے شعبے اچ نویں راہ کھولیسی ۔ سری لنکا دے وفد وزیر داخلہ محسن نقوی ولوں ٹرائی نیشن سیریز کیتے بہترین انتظامات دی تعریف کیتی ۔ واضح رہے جو وزیراعظم شہباز شریف گزریل ݙینہہ ٹرائی نیشن ٹیماں دے اعزاز اچ ݙتے ڳئے ظہرانے دے دوران سری لنکن کرکٹ ٹیم اتے سری لنکا دی حکومت دا شکریہ ادا کیتے۔ سری لنکا دے وفد پاکستان دی میزبانی دے اُچے معیار اتے سپورٹس ڈپلومیسی دے فروغ دے عزم دی تعریف کیتی ۔ سری لنکن وفد پاکستان اچ تھیوݨ آلے ٹرائی نیشن سیریز دے میچز وی ݙیکھسن۔