پاکستان اپ سکیلنگ گرین پاکستان پروگرام دے تحت جنگلات دی بحالی، شجرکاری دے فروغ اتے ماحولیاتی نظام کوں مضبوط بݨاوݨ کیتے نمایاں کامیابیاں حاصل کیتن، ڈاکٹر مصدق ملک

اسلام آباد۔ 20 نومبر (اے پی پی) وزیرِ موسمیاتی تبدیلی تے ماحولیاتی ہم آہنگی ڈاکٹر مصدق ملک آکھیا جو پاکستان اپ سکیلنگ گرین پاکستان پروگرام (UGPP) دے تحت جنگلات دی بحالی، شجرکاری دے فروغ اتے ماحولیاتی نظام کوں مضبوط بݨاوݨ کیتے نمایاں کامیابیاں حاصل کیتن۔ او خمیس کوں COP30 دے موقع تے وزارتِ موسمیاتی تبدیلی ولوں تھیوݨ آلے سائیڈ ایونٹ “Upscaling the Green Pakistan Programme (UGPP): A Success Story)” توں خاص وڈیو سنیھے دے ذریعے خطاب کریندے پئے ہن۔ تقریب دا مقصد پاکستان دے جنگلاتی تحفظ، بنجر زمیناں دی بحالی، اتے شجرکاری دے وݙے منصوبیاں بارے پیشرفت کوں عالمی برادری دے سامݨے اُچا کرݨ ہا۔ ایونٹ اچ بین الاقوامی ماہرینِ ماحولیات، ترقیاتی اداریاں دے نمائندے اتے عالمی ماحولیاتی تنظیماں دے رُکن شرکت کیتی، جݙاں جو جنگلاتی بحالی اتے موسمیاتی لچک تے ہک خاص پینل ڈسکشن وی منعقد تھئی اے۔ آپݨے خطاب اچ ڈاکٹر مصدق ملک آکھیا جو عالمی سطح تے موسمیاتی مباحثے دا مرکز گرین ہاؤس گیساں اچ کمی اے، جنہاں کوں بنیادی طور تے کاربن ڈائی آکسائیڈ دے اخراج دے ذریعے ماپیا ویندے۔ انہاں آکھیا جو “اصل لوڑھ کاربن ڈائی آکسائیڈ دے اخراج اچ کمی دے نال ایہو جیہے قدرتی نظاماں دے فروغ دی اے جیڑھے وݙی مقدار اچ کاربن جذب کرݨ دی صلاحیت رکھیندے ہوون۔ درخت دراصل اُو فیکٹریاں ہن جیڑھیاں ماحول توں کاربن ڈائی آکسائیڈ کوں جذب اتے آکسیجن پیدا کریندن ۔ وزیرِ موسمیاتی تبدیلی آکھیا جو درخت نہ صرف اخراج اچ کمی (Mitigation) کیتے ضروری ہن بلکہ موسمیاتی موافقت (Adaptation) کیتے وی بہوں اہم کردار ادا کریندن ۔ ایونٹ دے دوران وزارت دی تیار کیتی ڳئی ہک مختصر دستاویزی فلم وی ݙیکھائی ڳئی جئیں اچ پروگرام دے تحت شجرکاری، کمیونٹی شمولیت اتے ماحول دوست اقدامات کوں اُجاگر کیتا گیا۔