سکیورٹی فورسز دیاں صوبہ خیبر پختونخوا اچ 3 مختلف کارروائیاں، فتنۃ الخوارج دے 7 دہشت گرد ہلاک

راولپنڈی۔ 20 نومبر(اے پی پی)سکیورٹی فورسز صوبہ خیبر پختونخوا اچ 3 مختلف کارروائیاں کیتن جیندے اچ بھارتی حمایت یافتہ فتنۃ الخوارج دے 7 دہشت گرد ہلاک کر ݙتے ڳن۔ پاک فوج دے شعبہ تعلقات عامہ (آئی ایس پی آر) توں جاری بیان موجب، سکیورٹی فورسز دیاں صوبہ خیبر پختونخوا اچ 3 کارروائیاں اچ ہندوستانی پراکسی فتنہ الخوارج دے ست خوارج ماریے ڳئن۔ ݙسایا ڳئے جو خوارج دی موجودگی دی اطلاع تے سکیورٹی فورسز ضلع مہمند اچ انٹیلی جنس دی بنیاد تے آپریشن کیتے جیندے اچ خوارج دے ٹھکانے کوں مؤثر طریقے نال نشانہ بݨایا ڳئے اتے شدید فائرنگ دے تبادلے دے بعد چار خوارج جہنم واصل تھئن۔ ہک ٻیا آپریشن ضلع لکی مروت:اچ کیتا ڳئے جتھاں فائرنگ اچ ݙو خوارج ماریے ڳن۔ ایویں ہی ضلع ٹانک:اچ مقابلے دے دوران سکیورٹی فورسز ہک ٻئے خارجی کوں کامیابی نال ہلاک کیتے۔ آئی ایس پی آر آکھیے جو سکیورٹی فورسز اتے قانون نافذ کرݨ آلے ادارے عزم استحکام دے وژن دے تحت علاقے اچ کہیں وی بھارتی حمایت یافتہ خوارج دی موجودگی مکاوݨ کیتے آپریشن کریندے پین تاں جو مُلکی اتے غیر مُلکی حمایت یافتہ دہشت گردی دے خطرات کوں منݙھو مکایا ونڄے۔