دانش سکولاں اچ پڑھݨ آلے ٻال پاکستان دا ناں اچا کریسن، وزیراعظم دا آزاد کشمیر دے علاقے ہاڑی گہل اچ دانش سکول دا منݙھ ٻدھݨ دی تقریب نال خطاب

باغ۔ 20 نومبر(اے پی پی)وزیراعظم محمد شہباز شریف پاکستان دی فتوحات دا دائرہ معاشی میدان تئیں ودھاوݨ دے عزم دوہریندے آکھیے جو چار ݙینہہ دی جنگ دے بعد بھارتی فوج گوݙیاں تے آ ڳئی ہئی، بھارت دے غیر قانونی زیر تسلط جموں و کشمیر دے عوام کوں انہاں دا حق مِلݨ تئیں پاکستان کشمیریاں دی اخلاقی، سفارتی اتے سیاسی حمایت جاری رکھیسی، دانش سکولاں توں پڑھ تے نِکلݨ آلے عام گھرانیاں دے طلباء و طالبات وی انجینئرز، ڈاکٹرز بݨ تے مُلک دا ناں اچا کریسن۔ اے ڳالھ انہاں آزاد کشمیر دے ضلع باغ دے علاقے ہاڑی گہل اچ دانش سکول دا منݙھ ٻدھݨ ویلھے تقریب نال خطاب اچ آکھی۔ ایں موقع تے وزیراعظم آزاد کشمیر فیصل ممتاز راٹھور، وفاقی وزراء انجینئر امیر مقام، احسن اقبال، وزیراعظم یوتھ پروگرام دے چیئرمین رانا مشہود احمد خان دے علاوہ معززین اتے اہل علاقہ دی وݙی تعداد موجود ہئی۔ وزیراعظم آکھیا جو باغ اچ باغ دانش دا سنگ بنیاد رکھدے ٻہوں خوشی اے، اے او دانش گاہ ہے جیںدا سفر اساں پنجاب توں شروع کیتا ہا، اڄ پورے پاکستان اچ اے دانش گاہواں ݙینہہ رات تعمیر و ترقی نال ودھدیاں پین، بھمبر اچ دانش سکول دا35 فیصد کم پورا تھی چُکیے جݙاں جو محکمہ تعلیم کوں باغ دے دانش سکول دا23  مارچ 2026ء کوں افتتاح کرݨ دی ہدایت کیتی اے، دانش سکول دا دائرہ کار وادی نیلم تئیں ودھایا ویسی۔ وزیراعظم آکھیا جو نویں چُݨیے ڳئے وزیراعظم آزاد کشمیر فارورڈ کہوٹہ اچ دانش سکول ٻݨاوݨ دا مطالبہ کیتے اتے میں ایں تحفے دا اعلان کرینداں، دانش سکول پاکستان دے مشہور تعلیمی اداریاں دے برابر ہن، جتھاں غریباں دے ٻال بہترین تعلیمی سہولتاں ڳھن سڳدن، میرٹ تے مفت اتے بہترین تعلیم ݙتی ویندی پئی اے۔ وزیراعظم آکھیا جو دانش سکولاں دا جیڑھا خواب ݙٹھا ہا، ایںدی تکمیل دا ویلھا آ ڳئے، عوام کوں ایجھیاں تعلیمی سہولتاں ݙیوݨ علامہ اقبال اتے قائداعظم دا وژن ہا، دانش سکولاں اچ پڑھݨ آلے ٻال پاکستان دا ناں اچا کریسن اتے ایکوں ہک عظیم مُلک بݨیسن۔ وزیراعظم آکھیا جو دانش سکولاں توں غریب اتے یتیم ٻالاں کوں وی انجینئرز، ڈاکٹر بݨݨ دے موقعے مِلے اتے کیمبرج جھیں اداریاں اچ وی اے ٻال پج تے اُچی تعلیم حاصل کریندے پئن اتے مُلک دا اچا کریندے پین۔ وزیراعظم امریکی کانگریس دی حالیہ رپورٹ دا خیر مقدم کیتے جئیں پاک-بھارت جنگ اچ پاکستان ولوں بھارت کوں زور دا چماٹ مارݨ تے مہر ثبت کیتی اے۔ وزیراعظم آکھیا جو امریکی صدر ڈونلڈ ٹرمپ وی ول ول بھارتی طیارے مار ݙھواوݨ دا ذکر کریندن، پاکستان کوں جیڑھی عزت اڄ مِلی اے اے اساݙے بہادر جواناں اتے شاہیناں دی بہترین کارکردگی دا نتیجہ اے، اساݙیاں بری افواج بھارت تے الفتح میزائل مار تے چار ݙینہہ اچ ایکوں گوݙیاں دے ٻھر آل ݙھوائے، فیلڈ مارشل سید عاصم منیر اتے سیاسی و عسکری قیادت دی مشاورت نال اساں بے خوف و خطر فیصلے کیتن۔ وزیراعظم آکھیا جو افواج پاکستان دی دلیری اتے فتوحات پاروں پاکستان دا دنیا اچ وقار اُچا تھئے۔ وزیراعظم آکھیا جو پاکستان دی عسکری و جنگی صلاحیتاں دا لوہا منواوݨ دے بعد معاشی میدان اچ وی فتوحات دا دائرہ ودھایا ویسی جیندے کیتے حکومت ݙینہہ رات محنت کریندی پئی اے، جیڑھیاں قوماں معاشی طور تے ترقی نئیں کریندیاں او کامیاب نی تھیندیاں۔ وزیراعظم آکھیا جو ہک ݙینہہ آسی جو بھارت دے غیر قانونی زیر تسلط جموں و کشمیر دے عوام کوں انہاں دا حق مِلسی اتے انہاں دے ٻال وی دانش سکولاں اچ تعلیم حاصل کریسن۔ انہاں پاکستان اتے آزاد کشمیر دی قیادت تے مشتمل کمیٹی دے فیصلیاں تے عملدرآمد دا یقین ݙیویندے آکھیا جو وزیراعظم آزاد کشمیر گورننس دا مثالی معیار قائم کرن، آزاد کشمیر دے عوام کوں بہترین سہولتاں ݙتیاں ویسن۔ ایں توں پہلے وزیراعظم آزاد کشمیر فیصل ممتاز راٹھور دانش سکولاں دا دائرہ آزاد کشمیر تئیں ودھاوݨ تے وزیراعظم پاکستان دا شکریہ ادا کیتا۔