شہباز شریف دی قومی ایئر لائن دی نجکاری دے مراحل تیکھے اتے شفاف انداز اچ پورے کرݨ دی ہدایت

اسلام آباد۔ 20 نومبر(اے پی پی) وزیراعظم محمد شہباز شریف قومی ایئر لائن دی نجکاری دے سارے مراحل تیکھی رفتار اتے شفاف طریقے نال پورے کرݨ دی ہدایت کیتی اے۔ وزیر اعظم محمد شہباز شریف دی صدارت اچ پاکستان انٹرنیشنل ایئر لائنز (پی آئی اے) دے معاملیاں بارے اہم اجلاس تھیا۔ اجلاس اچ وزیر دفاع خواجہ محمد آصف، وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وزیراعظم دے مشیر برائے نجکاری محمد علی اتے متعلقہ حکام شامل ہن۔ وزیراعظم قومی ایئر لائن دی نجکاری دے سارے مراحل تیکھی رفتار اتے شفاف طریقے نال پورے کرݨ، پی آئی اے دے فلیٹ اچ اُݙ سڳݨ آلے جہازاں دی گݨتری ودھاوݨ کیتے لائحہ عمل بݨاوݨ اتے پی آئی اے دیاں پروازاں دی ویلھے سر اُݙاری یقینی بݨاوݨ دی ہدایت کیتی۔ اجلاس اچ پی آئی اے دی نجکاری اتے ایں حوالے نال بزنس پلان تے تفصیلی بریفنگ ݙتی ڳئی، جیںدے اچ ݙسیا ڳیا جو پی آئی اے دی نجکاری کیتے 4 پارٹیز کوں پری-کوالیفائی کیتا ڳئےِ، جلدی ہی پی آئی اے دی نجکاری دے حوالے نال بڈنگ تھیسی، پی آئی اے دے 75 فیصد شیئرز دی نجکاری تھیسی۔ نجکاری دے حوالے نال اے شرط رکھی ڳئی اے جو نجکاری دے بعد پی آئی اے دا ناں اتے ایندی تھیم نہ بدلی ویسی، بزنس پلان دے تحت 2029ء اچ پی آئی اے دے فلیٹ اچ اُݙ سڳݨ آلے جہازاں دی گنتی 18 توں ودھا تے 38 کیتی ویسی۔ وزیر اعظم کوں ݙسیا ڳیا جو ایں ویلھے قومی ایئر لائن 30 توں ودھ شہراں اچ سروس ݙیندی پئی اےِ، بزنس پلان دے تحت 2029ء تئیں پی آئی اے دیاں سروسز 40 توں ودھ شہراں تئیں ودھائیاں ویسن