وفاقی وزیر اطلاعات عطاء اللہ تارڑ ڈی ایٹ میڈیا فورم اچ شرکت کیتے باکو پُڄ ڳئن

باکو۔ 20 نومبر(اے پی پی)وفاقی وزیر اطلاعات و نشریات عطاء اللہ تارڑ آذربائیجان حکومت دی دعوت تے ڈی ایٹ میڈیا فورم اچ شرکت کیتے خمیس کوں باکو پُڄ ڳئن۔ حیدر علیوف انٹرنیشنل ایئر پورٹ باکو پڄݨ تے آذربائیجان دی میڈیا ڈویلپمنٹ ایجنسی دے ایگزیکٹو ڈائریکٹر احمد اسماعیلوف وفاقی وزیر اطلاعات دا استقبال کیتا۔

آذربائیجان اچ تھیوݨ آلے ڈی ایٹ فورم دا موضوع ”مباحثے، تعاون اتے علاقائی یکجہتی کوں ودھارا ݙیوݨ ”  اے۔ ڈی ایٹ میڈیا فورم اچ پاکستان سودھا آذربائیجان، بنگلہ دیش، مصر، انڈونیشیا، ایران، ملائیشیا، نائجیریا اتے ترکیہ دے میڈیا ماہرین اتے پالیسی ساز شرکت کریندے پئن۔ فورم اچ ڈی ایٹ ملکاں وچال اتحاد پیدا کرݨ، تجربیاں دے تبادلے اتے سانجھے تعاون دے نویں موقعے ڳولیے ویسن۔ وفاقی وزیر اطلاعات فورم اچ پاکستان دی نمائندگی کریندے پئن اتے میڈیا فورم اچ میڈیا تعاون، حقائق تے مبنی رپورٹنگ، ڈیجیٹل میڈیا دے شعبے اچ سانجھے لائحہ عمل سانڳے پاکستان دا موقف پیش کریسن۔ دورے اچ وزیر اطلاعات دی ڈی ایٹ دے سیکریٹری جنرل، ممبر ملکاں دے وزرائے اطلاعات، میڈیا سربراہان اتے مختلف عالمی ماہرین نال ملاقاتاں وی کریسن۔ وفاقی وزیر اطلاعات عطاء اللہ تارڑ اتے آذربائیجان دی پریزیڈنشل ایڈمنسٹریشن اچ خارجہ امور دے سربراہ حکمت حاجیوف وچال ملاقات وی تھیسی۔ وفاقی وزیر اطلاعات آذربائیجان دے سرکاری ٹی وی دا وی دورہ کریسن۔ ایں موقع تے ݙوہاں ملکاں وچال سانجھے تعاون کوں اڳوں ودھاوݨ سودھا میڈیا تعاون دے حوالے نال تعلقات کوں نویں دور اچ رلاوݨ کیتے وی ڳالھ مہاڑ تھیسی