پاکستان دا افغان طالبان توں دہشت گرد گروپاں دی حمایت بند کرݨ دے مطالبے دا اعادہ، مقبوضہ کشمیر اتے فلسطین اچ انسانی حقوق دی مسلسل خلاف ورزیاں دی مذمت، عالمی برادری نوٹس گھنّے، ترجمان دفتر خارجہ دی پریس بریفنگ

اسلام آباد۔ 21 نومبر (اے پی پی) پاکستان افغان طالبان توں دہشت گرد گروپاں دی حمایت بند کرݨ دے آپݨے مطالبے کوں دوہریندیں ہوئیں واضح کیتا جو سرحد کھولوݨ، تجارت بحال کرݨ دے نال نال بین الاقوامی رابطیاں دے منصوبیاں تے عملدرآمد اچ تاخیر دی ذمہ داری افغان حکومت تے عائد تھیندی اےِ۔ پاکستان اسرائیلی قابض فوجاں اتے انتہا پسند آباد کاراں ولوں مقبوضہ مغربی کنارے اچ فلسطینیاں دے خلاف انسانی حقوق دی مسلسل خلاف ورزیاں دی شدید مذمت کریندے۔ پاکستان عالمی برادری جئیں اچ اقوام متحدہ، انسانی حقوق کونسل اتے اقوام متحدہ دے ہائی کمشنر برائے انسانی حقوق شامل ہن، توں مطالبہ کریندے جو او مقبوضہ کشمیر اچ انسانی حقوق دی سنگین صورتحال دا نوٹس گھنّن، انسانی حقوق دی خلاف ورزیاں تے بھارت دی جوابدہی کوں یقینی بݨاون اتے انسانی حقوق دی معتبر بین الاقوامی تنظیماں کوں آزادانہ اتے غیر جانبدارانہ تحقیقات کرݨ دی اجازت ݙیوݨ۔ دفتر خارجہ دے ترجمان طاہر اندرابی آپݨی ہفتہ وار پریس بریفنگ اچ میڈیا کوں ݙسیا جو پاکستان افغان طالبان حکومت دی طرفوں “فتنہ الہندوستان” اتے “فتنہ الخوارج” دی حمایت دی وجہ توں سرحدی لنگھݨ دی جاہ بند کر رکھی اے اتے افغانستان نال ساری تجارت معطل کر ݙتی اےِ۔ ترجمان آکھیا جو سرحدی لنگھݨ دی جاہ کھولݨ، تاپی اتے کاسا 1000 جیہے منصوبیاں تے عملدرآمد اچ تاخیر دی ذمہ داری افغان طالبان تے عائد تھیندی اےِ۔ ترجمان ایں گالھ کوں دوہرایا جو افغانستان کوں پاکستان دے اندر دہشت گرد حملیاں کیتے آپݨی سرزمین دا غلط استعمال بند کرݨا چاہیدے۔ انہاں میڈیا کوں ݙسیا جو پاکستان افغانستان نال رابطے اچ رہݨ دی کوشش کیتی لیکن اُونکوں جانی نقصان چاوݨا پیا۔ انہاں آکھیا جو ایں توں پہلے پاکستان تجارت اتے سلامتی کوں انڄ کر ݙتا ہا، لیکن صبر دا مظاہرہ کیتا جئیں دی ہک حد ہوندی اےِ۔ ترجمان آکھیا جو میݙے خیال اچ صبر دی او حد ٹپ ڳئی اےِ، اساں تجارت کوں ایویں نئی تھیوݨ ݙے سڳدے جیویں افغان سرزمین توں پاکستانیاں دے قتل دا لائسنس ݙے تے تجارت کیتی ویندی پئی اے۔ ترجمان ہک افغان رہنما دے پاکستان کیتے 4000 بمبار تیار کرݨ دے اعلان بارے پُچھیے ڳئے سوال تے تبصرہ کریندیں ہوئیں آکھیا جو ایں بیان ثابت کر ݙتے جو پاکستان دا موقف درست اے جو افغان سرزمین پاکستان دے اندر دہشت گردانہ حملیاں کیتے استعمال تھیندی پئی اے۔ امریکی صدر ڈونلڈ ٹرمپ دی بھارتی وزیر اعظم مودی نال گالھ مہاڑ بارے پُچھیے ڳئے سوال جئیں اچ یقین ݙیوایا ڳیا ہا جو او پاکستان نال جنگ نہ کریسن، تے تبصرہ کریندیں ہوئیں ترجمان آکھیا جو ایں یقین دہانی کوں اساں واضح طور تے شک دی نگاہ نال ݙیکھݨے ، ایندی تائید بھارت توں آوݨ آلے بیاناں اچ نئی ݙٹھی ڳئی۔ انہاں آکھیا جو بھارتی سیاسی تے عسکری قیادت جنگ دی گالھیں جاری رکھے ہوئےِ اتے جارحانہ بیان جاری کریندی پئی اےِ۔ ہک سوال دے جواب اچ ترجمان آکھیا جو ایرانی جوہری مسئلے تے پاکستان دا موقف اصولی اتے مستحکم اے کیوںجو پاکستان بین الاقوامی قانون دے تحت ایرانیاں دے حقوق اتے ذمہ داریاں دے مطابق جوہری افزودگی دے حق کوں منیے۔ امریکی کانگریس دی رپورٹ تے تبصرہ کریندیں ہوئیں ترجمان آکھیا جو ایں رپورٹ دے چھیکڑ تے پاکستان دی زبردست کامیابی دا حوالہ ݙتا ڳیا جو رپورٹ دا “کافی معنی خیز” نتیجہ اے۔ ایں توں پہلے ترجمان دفتر خارجہ طاہر اندرابی میڈیا کوں ہفتے دے دوران سفارتی مصروفیات توں باخبر کیتا جئیں اچ نائب وزیر اعظم اتے وزیر خارجہ اسحاق ڈار دے روس دے دورے کوں اُجاگر کیتا، جِتھاں انہاں ایس سی او کونسل آف ہیڈز آف گورنمنٹ اجلاس اچ شرکت کیتی اتے برسلز اچ پاکستان-یورپی یونین سٹریٹجک ڈائیلاگ دے ستویں اجلاس دی سانجھی صدارت کیتے شرکت کیتی اتے چوتھے یورپی یونین انڈو-پیسیفک وزارتی فورم اچ شرکت کیتی جِتھاں انہاں مختلف ملکاں دے اسيں منصباں اتے سربراہان نال وی ملاقاتاں کیتی۔ انہاں آکھیا جو پاکستان اتے ہنگری ہنگریکم وظیفہ پروگرام 2026-2028 دے فریم ورک دے تحت تعاون دی مفاہمت دی تجدید تے وی دستخط کیتن جئیں دے تحت پاکستان دے شہریاں کوں ہنگری اچ اعلیٰ تعلیم حاصل کرݨ کیتے 400 سکالرشپس ݙتی ویسن۔ طاہر اندرابی آکھیا جو پاکستان اسرائیلی قابض فوجاں اتے انتہا پسند آباد کاراں ولوں مقبوضہ مغربی کنارے اچ فلسطینیاں دے خلاف انسانی حقوق دی مسلسل خلاف ورزیاں دی شدید مذمت کیتی جئیں اچ مسجد اقصیٰ تے ولا ولا دھاوا بولݨ اتے نماز پڑھݨ آلے لوکاں دے خلاف اشتعال انگیزی شامل اے۔ ترجمان دفتر خارجہ آکھیا جو اساں ݙو ریاستی حل تے مبنی ہک منصفانہ، جامع اتے دیرپا امن دی حمایت اچ آپݨے اصولی موقف کوں دوہریندوں جئیں دے نتیجے اچ ہک آزاد، خودمختار، قابل عمل اتے جُڑیا ہویا فلسطین دی ریاست قائم کیتی ونجے جو جون 1967ء توں پہلے دی سرحداں تے مبنی ہووے اتے جئیں دا دارالحکومت القدس الشریف ہووے۔طاہر اندرابی بھارت دے غیر قانونی طور تے زیر تسلط جموں تے کشمیر اچ انسانی حقوق دی مسلسل اتے سنگین صورتحال تے تشویش دا اظہار کریندیں ہوئیں آکھیا جو وݙے پیمانے تے نظربندیاں، مرضی نال گرفتاریاں اتے بنیادی آزادیاں تے وݙی پابندیاں دی مروجہ پالیسیاں مقبوضہ کشمیر دی آبادی کوں اجتماعی سزا ݙیوݨ دے برابر ہن۔ ایجھے اقدامات کشمیری عوام دے بین الاقوامی سطح تے تسلیم شدہ حق خودارادیت حاصل کرݨ کیتے انہاں دے پائیدار عزم کوں کمزور نئی کر سڳدے۔ترجمان آکھیا جو پاکستان عالمی برادری جیں ءچ اقوام متحدہ، انسانی حقوق کونسل اتے اقوام متحدہ دے ہائی کمشنر برائے انسانی حقوق شامل ہن، توں مطالبہ کریندے جو او مقبوضہ کشمیر اچ انسانی حقوق دی سنگین صورتحال دا نوٹس گھنّن۔ ترجمان آکھیا جو اقوام متحدہ دی سلامتی کونسل دی متعلقہ قرارداداں اتے کشمیری عوام دی امنگاں دے مطابق تنازعہ جموں تے کشمیر دا منصفانہ، پرامن اتے پائیدار حل جنوبی ایشیا اچ پائیدار امن اتے استحکام کیتے ضروری اے۔ بنگلہ دیش دے سابق وزیر اعظم دے مقدمے اچ سݨائی ڳئی سزا تے تبصرہ کریندیں ہوئیں ترجمان آکھیا جو اے بنگلہ دیش دا اندرونی معاملہ اےِ، بنگلہ دیش دی عوام آپݨے مسئلیاں کوں آپݨے جمہوری اتے آئینی عمل دے مطابق حل کرݨ دی مکمل صلاحیت رکھیندن۔