سکیورٹی فورسز دی خیبر پختونخوا اچ ݙو مختلف کارروائیاں، بھارتی پراکسی فتنہ الخوارج توں تعلق رکھݨ آلے 13 دہشت گرد ہلاک

راولپنڈی۔ 21 نومبر (اے پی پی) سکیورٹی فورسز صوبہ خیبر پختونخوا اچ ݙو مختلف کارروائیاں اچ بھارتی پراکسی فتنہ الخوارج توں تعلق رکھݨ آلے 13 خوارج کوں ہلاک کر ݙتا۔ جمعہ کوں پاک فوج دے شعبہ تعلقات عامہ (آئی ایس پی آر) توں جاری بیان دے مطابق سکیورٹی فورسز 20-21 نومبر دے دوران صوبہ خیبر پختونخوا اچ ݙو انڄ انڄ کارروائیاں اچ بھارتی پراکسی فتنہ الخوارج نال تعلق رکھݨ آلے 13 خوارج کوں ہلاک کر ݙتا۔ خوارج دی موجودگی دی اطلاع تے سکیورٹی فورسز اتے قانون نافذ کرݨ آلے اداریاں ضلع لکی مروت دے علاقے پہاڑ خیل اچ انٹیلی جنس دی بنیاد تے سانجھا آپریشن کیتا۔ آپریشن دے دوران سکیورٹی فورسز خوارج دے ٹکاݨے کوں مؤثر طریقے نال نشانہ بݨایا اتے شدید فائرنگ دے تبادلے دے بعد ݙاہ خوارج کوں جہنم واصل کر ݙتا۔ انٹیلی جنس دی بنیاد تے ہک ٻیا آپریشن ڈیرہ اسماعیل خان اچ کیتا ڳیا جِتھ فائرنگ دے تبادلے اچ سکیورٹی فورسز ترائے خوارج کوں جہنم واصل کر ݙتا۔ ہلاک تھیوݨ آلے بھارتی حمایت یافتہ خوارج توں اسلحہ اتے گولہ بارود وی برآمد تھیا۔ اے خوارج سکیورٹی فورسز، قانون نافذ کرݨ آلے اداریاں اتے معصوم شہریاں دی ٹارگٹ کلنگ سودھا بہوں ساریاں دہشت گردانہ سرگرمیاں اچ ملوث ہن۔ آئی ایس پی آر آکھیا جو سکیورٹی فورسز اتے قانون نافذ کرݨ آلے ادارے عزم استحکام دے ویژن دے تحت علاقے اچ کہیں وی بھارتی حمایت یافتہ خوارج دی موجودگی دے خاتمے کیتے آپریشن جاری رکھے ہوئن تاںجو دہشت گردی دے خطریاں کوں منڈھوں مُکایا ونجے۔