وفاقی وزیر عطاء اللہ تارڑ دی سیکرٹری جنرل ڈی ایٹ اسیاکا عبدالقادر امام نال ملاقات

باکو۔22 نومبر(اے پی پی) وفاقی وزیر اطلاعات و نشریات عطاء اللہ تارڑ سوشل میڈیا پلیٹ فارمز تے موثر حکمت عملی دے تحت فیکٹ چیکنگ دا نظام وضع کرݨ دی لوڑھ تے زور ݙیندے آکھیے جو کوڑیاں خبراں دنیا دا ساریں توں وݙا چیلنج اے، ڈی ایٹ دے رُکن ملکاں کوں آپݨی متفقہ میڈیا پالیسی دے ذریعے غلط معلومات دا مقابلہ کرݨا ہوسی۔ اے ڳالھ انہاں اتھاں سیکریٹری جنرل ڈی ایٹ برائے اقتصادی تعاون ایمبیسیڈر اسیاکا عبدالقادر امام نال ملاقات دے دوران ڳالھ کریندے آکھی۔ ملاقات اچ ڈی ایٹ رُکن ملکاں وچال سانجھے تعاون، خاص کر میڈیا دے شعبے اچ تعلقات، فیک نیوز سودھے اہم عالمی امور تے ڳالھ مہاڑ تھئی ۔ وفاقی وزیر اطلاعات آکھیا جو فیک نیوز تے مکمل کنٹرول توں بغیر ڈی ایٹ ملکاں دا مشترکہ بیانیہ مضبوط نی تھی سڳدا، انہاں کوں آپݨی متفقہ میڈیا پالیسی دے ذریعے غلط معلومات دا مقابلہ کرݨا ہوسی۔ ملاقات اچ ڈی ایٹ ملکاں وچال ثقافتی رابطیں دے ودھارے تے وی تفصیلی ڳالھ مہاڑ تھئی ۔ وفاقی وزیر آکھیا جو ثقافتی تعاون نال خطے اچ ہم آہنگی اتے مثبت امیج دا ودھارا ممکن اے، ثقافت، ابلاغ اتے ٹیکنالوجی دے اشتراک نال ڈی ایٹ ملکاں دے عوام کوں مزید نیڑے گھن آیا ونڄ سڳدے۔ وفاقی وزیر اطلاعات عطاء اللہ تارڑ عالمی سطح تے اقتصادی ترقی اتے خطے دے امن کیتے ڈی ایٹ دے سیکریٹری جنرل دے موثر کردار دی تعریف کریندے آکھیا جو انہاں دی رہنمائی اتے تجربے نال ڈی ایٹ دے مقاصد دی تکمیل اچ بھرپور کردار ادا کریسوں۔ سیکریٹری جنرل ایمبیسیڈر اسیاکا عبدالقادر امام آکھیا جو ڈی ایٹ دے رُکن ملکاں دی کامیابی دا دارومدار ایں ڳالھ تے ہے جو او ہک ݙوجھے دی ترقی اچ کتھاں تئیں مددگار ثابت تھیندن۔ انہاں آکھیا جو میڈیا دے شعبے اچ ہک ݙوجھے دے تجربیں توں سکھݨ، مشترکہ ٹریننگز اتے ورکشاپس دا انعقاد ناگزیر اے۔ انہاں مزید آکھیا جو عالمی سطح تے ہک مضبوط، مثبت بیانیہ دی تشکیل کیتے ڈی ایٹ دے پلیٹ فارم تے تعاون کوں پکا کرݨا ہوسی