ریلوے دا نظام کہیں وی ملک دی معیشت اتے مواصلات دے حوالے نال ریڑھ دی ہݙی دی حیثیت رکھیندے، ریلوے نظام دی بحالی دی طرف چاتے ونڄݨ آلے اقدامات قابل تحسین ہن، وزیر اعظم محمد شہباز شریف

اسلام آباد۔22 نومبر (اے پی پی) وزیر اعظم محمد شہباز شریف آکھیے جو ریلوے دا نظام کہیں وی ملک دی معیشت اتے مواصلات دے حوالے نال ریڑھ دی ہݙی دی حیثیت رکھیندے، ریلوے نظام دی بحالی دی طرف چاتے ونڄݨ آلے اقدامات لائق تحسین ہن۔ وزیر اعظم محمد شہباز شریف دی زیر صدارت پاکستان ریلویز دے امور تے اہم اجلاس منعقد تھیا جیں اچ وزیراعظم پاکستان ریلوے دی بحالی اتے اپ گریڈیشن دے حوالے نال وزیر ریلوے حنیف عباسی اتے انہاں دی ٹیم دی تعریف کیتی۔ وزیر اعظم پاکستان ریلوے خاص کر علاقائی رابطیں اتے بین الاقوامی ٹرین لنکس دے منصوبیں دے حوالے نال بین الاقوامی معیار دے قانونی اتے معاشی ماہرین دی خدمات حاصل کرݨ دی ہدایت کیتی اے۔ وزیر اعظم ریلوے دی پراپرٹی اتے زمین دے معاملیں تے پبلک پرائیویٹ پارٹنرشپ ماڈل اختیار کرݨ دی ہدایت کریندے اجلاس کوں پاکستان ریلوے دی بہتری دے حوالے نال چاتے ونڄݨ آلے اقدامات تے تفصیلی بریفنگ ݙتی ڳئی۔ ایں موقع تے ݙسایا ڳیا جو پاکستان ریلوے دی ڈیجیٹائزیشن دے حوالے نال “رابطہ” دے 7 ڈیجیٹل پورٹلز کم کریندے پئن، 56 ٹریناں کوں رابطہ تے منتقل کیتا ڳئے جݙاں جو 54 ریلوے سٹیشناں کوں ڈیجیٹائز کیتا ڳئے ، کراچی، لاہور، راولپنڈی اتے فیصل آباد دے ریلوے سٹیشناں تے مفت وائی فائی دی سہولت ݙتی ڳئی اے جݙاں جو مزید 48 ریلوے سٹیشناں تے ایں سال 31 دسمبر تئیں مفت وائی فائی ݙتا ویسی، فریٹ آن لائین بکنگ سسٹم متعارف کرایا ڳئے، کراچی سٹی ریلوے سٹیشن توں ڈیجیٹل وہیئنگ برج دا پائلٹ پراجیکٹ شروع کیتا ڳئے، اڳلے مرحلے اچ اے سہولت پپری، کراچی چھاؤنی، پورٹ قاسم، لاہور اتے راولپنڈی دے ریلوے سٹیشناں کوں وی ݙتی ویسی۔ راولپنڈی ریلوے سٹیشن اچ مصنوعی ذہانت نال کم کرݨ آلے 148 سرویلنس کیمرے نصب کیتے ڳئن اتے ریلوے سٹیشناں تے بینکاں دی اے ٹی ایم مشیناں نصب کیتیاں ویندیاں پئن، ریلوے سٹیشناں دے صفائی ستھرائی دے معیار کوں بہتر بݨاوݨ کیتے آؤٹ سورسنگ کیتی ڳئی اے، وݙے ریلوے سٹیشناں تے مسافراں کیتے اعلیٰ معیار دی انتظار گاہیں بݨائیاں ڳئن، مسافراں دی سہولت کیتے ریلوے سٹیشناں تے انفارمیشن ڈیسک بݨائے ڳئن۔ اجلاس اچ ݙسایا ڳیا جو ریلوے سٹیشناں تے کھاوݨ پیوݨ دی چیزاں کوں بہتر بݨاوݨ دے حوالے نال چارے صوبیں دی فوڈ اتھارٹیاں کوں رسائی ݙتی ڳئی اے، 4 ٹریناں کوں آؤٹ سورس کیتا ڳئے جݙاں جو تکھے ہی مزید 11 ٹریناں کوں آؤٹ سورس کیتا ویسی ایں حوالے نال اشتہار جاری تھی چُکیے، ایں آؤٹ سورسنگ دی وجہ توں 8.5 ارب روپے دا اضافی ریونیو متوقع اے، 40 لگیج اتے بریک وینز کوں وی آؤٹ سورس کیتا ڳئے جیں دی وجہ توں 820 ملین روپے دا اضافی ریونیو متوقع اے، 2 کارگو ایکسپریس ٹریناں دی آؤٹ سورسنگ وی تھیندی پئی اے جیں دی وجہ توں 6.3 ارب روپے دا اضافی ریونیو متوقع اے۔ لاہور، کراچی، ملتان، پشاور، کوئٹہ اتے سکھر اچ ریلوے ہسپتالاں دی آؤٹ سورسنگ تے کم جاری اے، ریلوے دے سکولاں، کالجاں، اتے ریسٹ ہاؤسز دی آؤٹ سورسنگ تے وی کم جاری اے۔ دوران اجلاس ݙسایا ڳیا جو لاہور، اسلام آباد اتے اذاخیل اچ قائم ریلوے دے ڈرائی پورٹس وی آؤٹ سورس تھیندے پئن، 155 ریلوے سٹیشناں کوں شمسی توانائی تے منتقل کیتا ونڄ چُکیے، ریلوے کنسٹرکشنز پاکستان لمیٹڈ، پاکستان ریلوے فریٹ ٹرانسپورٹیشن کمپنی اتے پاکستان ریلوے ایڈوائزری اینڈ کنسلٹینسی سروس کوں بند کیتا ڳئے، ریلوے دی مین لائین ون دے کراچی-کوٹری سیکشن، اتے مین لائین تھری دی اپ گریڈیشن دے حوالے نال لائحہ عمل ترتیب ݙتا ویندا پئے، تھر ریل کنیکٹی ویٹی دے منصوبے دے حوالے نال حکومت سندھ دے نال رل تے کم کیتا ویسی، اسلام آباد-تہران-استنبول ٹرین دا تکھے آغاز تھیسی، قازقستان-ازبکستان-افغانستان-پاکستان ریل منصوبے دے حوالے نال وی ابتدائی کم تھیندا پئے، وزیراعظم محمد شہباز شریف دی زیر صدارت پاکستان ریلویز دے امور تے اے اہم اجلاس وزیراعظم ہاؤس، اسلام آباد اچ منعقد تھیا۔ اجلاس اچ وفاقی وزیر ریلوے حنیف عباسی، وفاقی وزیر اقتصادی امور احد خان چیمہ اتے متعلقہ اعلیٰ سرکاری افسراں شرکت کیتی۔