پاکستان اتے یورپی یونین دے 7 ویں سٹریٹجک ڈائیلاگ دا برسلز اچ انعقاد

اسلام آباد۔22 نومبر (اے پی پی) پاکستان اتے یورپی یونین 7 ویں سٹریٹجک ڈائیلاگ دا انعقاد برسلز اچ کیتا جیں دی مشترکہ صدارت نائب وزیراعظم اتے وزیرخارجہ سینیٹر محمد اسحاق ڈار اتے یورپی یونین دی اعلیٰ نمائندہ اتے نائب صدر کاجا کالس کیتی۔ پاکستانی وفد اچ سیکرٹری خارجہ آمنہ بلوچ، یورپی یونین، بیلجیئم اتے لکسمبرگ کیتے پاکستان دے سفیر رحیم حیات قریشی اتے سفارت خانے دے سینئر حکام وی شامل ہن۔ دفتر خارجہ موجب اجلاس اچ پاکستان-یورپی یونین تعلقات دا جامع جائزہ پیش کیتا ڳیا، اڄوکی اعلیٰ سطح دی مصروفیات اتے پائیدار ادارہ جاتی تعاملات دی مثبت رفتار کوں اڳوں ودھایا ڳیا۔ اجلاس اچ فریقین مشترکہ اقدار، اقوام متحدہ دے چارٹر، کثیر الجہتی اتے سانجھے احترام اتے تعاون دے اصولاں تے مبنی وݙے بنیاداں تے، کثیر الجہتی اتے مستقبل دے حوالے نال شراکت داری کیتے آپݨے عزم دا اعادہ کیتا۔ انہاں تجارتی اتے سرمایہ کاری دے تعلقات بشمول یورپی یونین دے جی ایس پی پلس انتظامات دے ذریعے پائیدار ترقی، برآمدی تنوع، روزگار دی تخلیق اتے سانجھے طور تے فیدہ مند اقتصادی موقعیں کوں مزید وسعت ݙیوݨ دی اہمیت تے زور ݙتا۔ سٹریٹجک ڈائیلاگ جنوبی ایشیا، افغانستان، مشرق وسطیٰ اتے وݙی جغرافیائی سیاسی پیش رفت سودھے علاقائی اتے عالمی پیش رفت تے ڳالھ مہاڑ دا موقع وی ݙتا۔ ݙوہیں فریقاں امن، استحکام، پائیدار ترقی اتے موسمیاتی تبدیلی اتے رابطے جیھے عالمی چیلنجز کیتے مربوط نقطہ نظر دی اہمیت تے زور ݙتا۔ انہاں سٹریٹجک انگیجمنٹ پلان دے تحت تعاون کوں مضبوط بݨاوݨ، جاری ڳالھ مہاڑ تے کم کوں اگوں ودھاوݨ اتے آوݨ آلے سالاں اچ تعاون کوں ودھاوݨ کیتے ٹھوس رستے دی نشاندہی کرݨ تے اتفاق کیتا۔ فریقین 2019 دے سٹریٹجک انگیجمنٹ پلان دے تحت جاری تعاون دا جامع جائزہ ڳھدا۔ اجلاس اچ پاکستان اتے یورپی یونین سٹریٹجک ہم آہنگی رکھݨ آلے شعبیں اچ تعاون کوں مزید ودھاوݨ دے عزم دا اعادہ کیتا ڳیا۔ یورپی یونین پاکستان اچ جمہوریت، گورننس، قانون دی حکمرانی، توانائی، تجارت، سرمایہ کاری اتے انسانی حقوق دے شعبیں اچ معاونت دا اعتراف کیتا۔ ݙوہیں پاسوں علاقائی اتے عالمی سلامتی دی صورتحال تے تفصیلی ڳالھ مہاڑ کیتی ڳئی ۔ جنوبی ایشیا دی صورتحال تے ڳالھ کریندے نائب وزیراعظم سینیٹر محمد اسحاق ڈار مذاکرات، سفارتکاری، بین الاقوامی قوانین اتے معاہدیں دی پاسداری تے پاکستان دے مؤقف کوں اُجاگر کیتا۔ پاکستان افغانستان دے نال سانجھے مفاد تے مبنی پُرامن اتے مستحکم تعلقات دی اہمیت تے زور ݙتا جݙاں جو افغان عبوری حکومت توں دہشت گردی دے خاتمے کیتے ذمے وارانہ کردار ادا کرݨ دی توقع دا اظہار کیتا ڳیا۔ اجلاس کوں ݙسایا ڳیا جو عالمی جھیڑے تے پاکستان دا مؤقف اے جو ڳالھ مہاڑ اتے سفارتکاری دے ذریعے مسئلیں دا حل ہی پائیدار رستہ اے۔ پاکستان دے اقوام متحدہ اتے ݙوجھے عالمی اداریں اچ تعمیری کردار تے وی ڳالھ مہاڑ تھئی ۔ وسطی ایشیا دے نال علاقائی رابطہ کاری اتے انضمام کیتے پاکستان دیاں کوششاں زیرِ بحث آئیاں۔ یورپی یونین دی طرفوں دہشت گردی دے خلاف پاکستان دی مستقل اتے سنجیدہ کوششاں اتے علاقائی و عالمی امن کیتے کردار دا اعتراف کیتا ڳیا۔ سفارتکاری، ملٹی لیٹرل ازم اتے جھیڑیں دے پُرامن حل کوں ودھاوݨ دے حوالے نال پاکستان اتے یورپی یونین دے مشترکہ عزم دا وی اعادہ کیتا ڳیا۔ سٹریٹجک ڈائیلاگ ڈو طرفہ تعلقات دا جائزہ گھنݨ اتے مختلف شعبیں اچ تعاون ودھاوݨ دے نویں رستے کھولے۔