سکیورٹی فورسز اتے قانون نافذ کرݨ آلے اداریں دا بنوں اچ مشترکہ آپریشن، فتنہ الخوارج دے 8 خوارج ہلاک

راولپنڈی ۔22 نومبر (اے پی پی) سکیورٹی فورسز اتے قانون نافذ کرݨ آلے اداریں بنوں اچ مشترکہ آپریشن دے دوران بھارتی حمایت یافتہ فتنہ الخوارج دے 8 دہشتگرد ہلاک کر ݙتے گئن۔ پاک فوج دے شعبہ تعلقات عامہ (آئی ایس پی آر) توں جاری بیان موجب 21 نومبر کوں خفیہ اطلاعات دی بنیاد تے سیکورٹی فورسز اتے قانون نافذ کرݨ آلے اداریں ضلع بنوں اچ بھارتی پراکسی فتنہ الخوارج دے دہشت گرداں دی موجودگی دی اطلاع تے مشترکہ انٹیلی جنس بیسڈ آپریشن کیتا۔ آپریشن دے دوران سکیورٹی فورسز دہشت گرداں دے ٹھکاݨے کوں موثر انداز اچ نشانہ بݨایا، شدید فائرنگ دے تبادلے اچ بھارتی حمایت یافتہ فتنہ الخوارج دے 8 خوارج جہنم واصل کر ݙتے ڳئے۔ ماریے ڳئے دہشت گرداں توں اسلحہ اتے بھاری مقدار اچ گولہ بارود وی برآمد تھیا، دہشت گرد سیکورٹی فورسز، قانون نافذ کرݨ آلے اداریں اتے بے گناہ شہریاں تے ٻہوں سارے حملیں اتے ٹارگٹ کلنگ اچ ملوث ہن۔ کارروائی سیکورٹی فورسز اتے قانون نافذ کرݨ آلے اداریں وچال مضبوط تعاون اتے انٹیلی جنس تے مبنی آپریشنز دی تکھی رفتار مہم دا واضح ثبوت اے، انہاں مربوط سکیورٹی اقدامات دا مقصد خوارج دے نیٹ ورک کوں بھنݨ، انہاں دی نقل و حرکت کوں محدود کرݨا اتے انہاں دے سہولت کاراں دا خاتمہ کرݨا اے۔ آئی ایس پی آر موجب خطے اچ امن قائم کرݨ سانڳے کیتے ڳئے آپریشنز دے چنڳے نتیجے سامݨے آندے پئن جݙاں جو مزید امن و استحکام کیتے مسلسل کوششاں جاری رہݨ۔ علاقے اچ کہیں وی بھارتی حمایت یافتہ خارجی دی موجودگی دے خاتمے کیتے کلئیرنس اتے سینیٹائزیشن آپریشن وی جاری اے۔ “عزمِ استحکام” ویژن دے تحت، سیکورٹی فورسز اتے قانون نافذ کرݨ آلے اداریں دی انسدادِ دہشت گردی دی فیصلہ کن مہم بھرپور رفتار نال جاری اے اتے ملک اتے ٻاہرلے ملک توں حمایت یافتہ دہشت گردی دے مکمل خاتمے تئیں جاری رہسی۔