ضمنی انتخاب وچ اکثریتی حلقیں وچ پی ٹی آئی دا بائیکاٹ اے، بائیکاٹ دا سیاسی طور تے ہمیشہ ضیان تھیندے، ان شاء اللہ مسلم لیگ (ن) کوں واضح برتری مِلسی، عطاء اللہ تارڑ

اسلام آباد۔ 23 نومبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو ضمنی انتخاب دے دوران اکثریتی حلقیں وچ پی ٹی آئی دا بائیکاٹ اے، سیاست وچ کوئی بائیکاٹ کائنی تھیندا، بائیکاٹ دا سیاسی طور تے ہمیشہ نقصان تھیندے۔ ضمنی انتخابات وچ لوکاں دا ووٹ ݙیوݨ کیتے نِکلݨ حکومت دی کارکردگی تے اعتماد دی نشانی اے، ان شاء اللہ مسلم لیگ (ن) کوں واضح برتری مِلسی۔ اِتھاں میڈیا نال ڳالھ مہاڑ کریندے وفاقی وزیر آکھیا جو اڄ دا ݙینھ مجموعی طور تے حوصلہ افزاء رہیا۔ لاہور وچ پولنگ کیمپاں تے غیر معمولی رش اے اَتے پولنگ اسٹیشناں تے عوام دی بھرپور آونڄ ݙٹھی ویندی پئی اے۔انہاں آکھیا جو دیرہ غازی خان وچ بزرگ شہری، نینگراں اَتے تریمتاں ساریاں وݙی تعداد وچ ووٹ کاسٹ کرݨ کیتے گھروں نِکلئن۔ ہر طبقے توں لوک ٻاہر نِکلِن اَتے اپݨا جمہوری حق استعمال کریندے پئِن۔ وفاقی وزیر آکھیا جو اکثریتی حلقیں وچ تحریک انصاف دا بائیکاٹ اے، سیاست وچ کوئی بائیکاٹ کائنی تھیندا، بائیکاٹ دا ہمیشہ سیاسی نقصان تھیندے۔ عطاء اللہ تارڑ آکھیا جو لاہور وچ مسلم لیگ (ن) دے امیدوار دی پوزیشن مضبوط اے اَتے پولنگ دے دوران پارٹی دیاں ٹیماں میدان وچ متحرک ہِن۔ لاہور، فیصل آباد، ساہیوال اَتے دیرہ غازی خان وچ مسلم لیگ (ن) دا ٹرن آؤٹ ٻہوں حوصلہ افزاء اے۔انہاں آکھیا جو ایجھے ووٹر وی گھروں نِکلن جیڑھے کافی عرصے توں چُپ ہَن۔ انہاں اِیندی وجہ حکومت دی کارکردگی کوں قرار ݙیندے آکھیا جو وزیراعظم شہباز شریف دی پرفارمنس کوں مُلکی اَتے عالمی سطح تے قبول کیتا ویندا پئے جَݙاں جو وزیراعلیٰ پنجاب مریم نواز صوبے وچ چنڳی کارکردگی ݙکھائی اے۔ پوری دنیا وچ پاکستان دیاں مسلح فوجاں دی صلاحیتاں کوں منیا ڳئے اَتے پاکستان دی اکانومی دی تعریف کیتی ڳئی اے۔ انہاں آکھیا جو میں سمجھداں جو اڄ دا الیکشن پرفارمنس اَتے ڈیلیوری دا الیکشن ہوسی۔ دبئی ایئر شو وچ بھارتی طیارے دے حادثے دے متعلق سوال تے وفاقی وزیر اطلاعات آکھیا جو اِیں واقعہ دی تحقیقات جاری ہِن اَتے انوسٹی گیشن دے بغیر کوئی پَکی رائے ݙیوݨ ویلھے توں پہلے ہوسی۔ انہاں آکھیا جو فی الوقت اِے آکھݨ اوکھا اے جو حادثہ ٹیکنیکل خرابی توں تھیے یا کہیں ٻئی وجہ توں۔