پاکستان وچ دنیا دا بہترین ٹیلنٹ موجود اے، نینگراں اساݙا روشن مستقبل ہِن، سوئمنگ ہِک ایجھا کھیݙ اے جِیندے وچ پاکستان چنڳاں مقام حاصل کر سڳدے، عطاء اللہ تارڑ

اسلام آباد۔ 23 نومبر (اے پی پی) وفاقی وزیر اطلاعات و نشریات عطاء اللہ تارڑ نیشنل ایج سوئمنگ چیمپئن شپ وچ نوجوان تیراکیں دی کارکردگی دی تعریف کریندے آکھیے جو نینگر نہ صرف پاکستان بلکہ عالمی سطح تے سوئمنگ چیمپئن شپ دے حوالے نال اساݙا روشن مستقبل ہِن، پاکستان وچ دنیا دا بہترین ٹیلنٹ موجود اے، وزیراعظم شہباز شریف دی خاص ہدایت تے سوئمنگ پول دی مکمل تزئین و آرائش کیتی ویسی اَتے کھݙاریاں کوں عالمی معیار دیاں سہولتاں ݙِتیاں ویسن۔ اِے ڳالھ انہاں اِتھاں پاکستان سپورٹس کمپلیکس وچ 29 ویں نیشنل ایج گروپ سوئمنگ چیمپئن شپ 2025ء (بوائز) اَتے 24 ویں نیشنل ایج گروپ سوئمنگ چیمپئن شپ 2025ء (گرلز) دی انعام ونݙݨ دی تقریب توں خطاب کریندے آکھی۔وفاقی وزیر اطلاعات آکھیا جو سوئمنگ مقابلیں وچ نینگراں نہ صرف مقامی سطح تے بلکہ عالمی مقابلیں کیتے وی پاکستان دے روشن مستقبل دی جھلک پیش کیتی اے۔ انہاں ایونٹ دے چنڳے انتظام تے انتظامیہ کوں مبارخ ݙیندے آکھیا جو انڈر 10، انڈر 12، انڈر 14 اَتے انڈر 16 دیاں ساریاں کیٹیگریز وچ چھوہر اَتے چھوہریں بھرپور سپورٹس مین سپرٹ، محنت اَتے لڳن دا عملی ثبوت ݙِتا۔ انہاں والدین دی حوصلہ افزائی دی وی تعریف کریندے آکھیا جو اُنہاں دی مدد نال نوجوان تیراکیں دے اعتماد اَتے کارکردگی وچ چنڳاں کردار ادا کیتا۔وفاقی وزیر اطلاعات آکھیا جو پاکستان کنے عالمی معیار دا ٹیلنٹ موجود اے اَتے مقامی کوچز وی دنیا بھر وچ اپݨا لوہا منوائے۔ انہاں عالمی سطح تے شاندار کارکردگی ݙکھاوݨ آلی تیراک کرن خان دا خاص ذکر کریندے آکھیا جو سوئمنگ ہِک ایجھا کھیݙ اے جِیندے وچ پاکستان چنڳاں مقام حاصل کر سڳدے۔ انہاں امید ظاہر کیتی جو ملک دے باصلاحیت نینگراں مستقبل وچ سیف گیمز، ایشین گیمز اَتے اولمپکس تئیں پُڄسن اَتے پاکستان کیتے میڈل جِت تے دنیا وچ اپݨا ناں بݨیسن۔ عطاء اللہ تارڑ سوئمنگ پول وچ سہولتاں دے حوالے نال آکھیا جو سوئمنگ پول دے موجودہ انفراسٹرکچر کوں عالمی معیار موجب جدید سہولتاں نال لیس کیتا ویسی۔ انہاں اعلان کیتا جو وزیراعظم شہباز شریف دی خاص ہدایت تے سوئمنگ پول دی مکمل تزئین و آرائش کیتی ویسی اَتے کھݙاریاں کوں عالمی معیار دیاں سہولتاں ݙِتیاں ویسن۔ وفاقی وزیر آکھیا جو اِیں چیمپئن شپ وچ نوجواناں دا جذبہ، محنت، لڳن اَتے مقابلے دا حوصلہ تعریف دے لائق اے۔ انہاں آکھیا جو نوجوان کھݙاریاں دی شاندار کارکردگی دل جِت گھِدن اَتے پاکستان دا مستقبل اِنہاں ہتھاں وچ روشن ݙِکھیندے۔ اِیندے توں پہلے وفاقی وزیر اطلاعات سوئمنگ مقابلیں وچ چنڳی کارکردگی ݙکھاوݨ آلے نوجوان چھوہر تے چھوہریں کوں انعام ݙتے۔