ضمنی انتخابات دے موقع تے کہیں پولنگ اسٹیشن توں کوئی شکایت نی ملی، رانا ثنااللہ خان

فیصل آباد۔ 23 نومبر(اے پی پی) وزیراعظم دے مشیر سیاسی و عوامی امور سینیٹر رانا ثنا اللہ خان آکھیے جو فیصل آباد سودھے ملک دے مختلف شہراں وچ تھیوݨ آلے ضمنی انتخاب دے موقع تے مجموعی طور تے پولنگ ٻہوں پُرامن اَتے خوشگوار ماحول وچ منعقد تھئی اَتے کہیں پولنگ اسٹیشن توں کوئی شکایت نی ملی۔ صوبائی اسمبلی فیصل آباد دے حلقہ پی پی 116 وچ ووٹ کاسٹ کرݨ دے بعد میڈیا نال ڳالھ مہاڑ وچ اُنہاں آکھیا جو جَݙاں 10 ووٹ وی کاسٹ نہ تھئے ہَن اوں ویلھے آکھیا ڳیا جو ضابطہ اخلاق دی خلاف ورزی تھئی۔ اُنہاں دا آکھݨ ہئی جو امید اے جو عوام مسلم لیگ (ن) دا ساتھ ݙیسن۔ اُنہاں آکھیا جو بانی پی ٹی آئی سیاست کریندا ہی نی پیا ، او اقتدار وچ ہَن تاں وی اساں تے مقدمے بݨیندے ہَن مگر اساں اڄ وی سیاست داناں دے میز تے ٻہہ تے مذاکرات دے حق وچ ایسے۔رانا ثنا اللہ آکھیا جو بانی پی ٹی آئی اڄ وی ڳالھ مہاڑ کیتے تیار کائنی ، اُنہاں ہمیشہ ڈیڈ لاک پیدا کیتا۔ رانا ثنا اللہ آکھیا جو پورے حلقے وچ کوئی گرفتاری نی تھئی، مخالفین کوں پورے حلقے وچ شکایت دا موقع نی مِلیا، ترقی دا دور مریم نواز دی صورت وچ واقعی آ چُکیے۔ اُنہاں آکھیا جو 70 ارب روپے دا فیصل آباد وچ منصوبہ شروع تھیندا پئے ، اِیں حلقے وچ میرٹ دی بنیاد تے 7 الیکشن لَڑئے، 5 وچ جِیتم، ضمنی الیکشن وچ ٹرن آؤٹ 25 توں 30 فیصد تھیندے۔ اُنہاں دا آکھݨ ہئی جو 10 مئی 2025 کوں معرکہ حق وچ بھارت کوں مُنہ بھن جواب ݙِتا، اے پہلا موقع اے جَݙاں دنیا منیا جو پاکستان جنگ جِت ڳِھدی اے جیڑھا پاکستان ہݨ 99 وانگوں اڳواں وَدھݨ کیتے تیار اے۔