بین الاقوامی کرکٹ ٹیماں دی آونڄ دوران روٹ مہمان کھݙاریاں دی حفاظت اَتے ملک وچ عالمی کرکٹ دی بحالی دے تسلسل کیتے لاتے ویندِن، شہری معمولی دیر دی زحمت کوں چنڳے انداز وچ گھِنن، عطاء اللہ تارڑ

اسلام آباد۔ 23 نومبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو بین الاقوامی کرکٹ ٹیماں دی آونڄ دے دوران روٹ مہمان کھݙاریاں دی حفاظت اَتے ملک وچ عالمی کرکٹ دی بحالی دے تسلسل کیتے لاتے ویندِن، شہری معمولی دیر دی زحمت کوں چنڳے انداز وچ گھِنن۔ اِتھاں عالمی کرکٹ ٹیماں دی موومنٹ دے دوران لاتے ونجݨ آلے روٹ اَتے شہریاں کوں تھیوݨ آلی مشکلاں دے حوالے نال خاص ڳالھ مہاڑ کریندے وفاقی وزیر اطلاعات آکھیا جو جَݙاں ٻاہرلے ملک توں ٹیماں آندِن تاں سکیورٹی کلیئرنس دے تحت روٹ لاوݨ ضروری ہوندے، اکثر شہری اِیں صورتحال تے شکایت کریندِن، اڄ میں خود وی روٹ تے موجود ہاں اَتے ٹیماں اِتھوں لنگھدیاں پئِن۔ اُنہاں آکھیا جو کرکٹ وَݙی محنت اَتے کوشش دے بعد پاکستان وچ واپس آئی اے، اِیکوں اڳوں ودھاوݨ کیتے سانجھی مدد ضروری اے۔ وفاقی وزیر آکھیا جو سری لنکا وچ وی ایجھے مسئلے ہَن، اُتھاں ایل ٹی ٹی ای دی وجہ توں سَخت سکیورٹی انتظامات معمول ہَن۔وفاقی وزیر آکھیا جو اساکوں اکثر روٹ تے انتظار کرݨا پَوندے، اساں کنے اے رُجحان بݨ ڳئے جو اساں وقتی تنقید کرݨ شروع کر ݙیندوں، اساں کوں تنقید دی بجائے اِیکوں چنڳے تناظر وچ گھِنݨا چاہیدے۔ اُنہاں آکھیا جو حالات مسلسل چنڳے تھیندے پئِن، مستقبل وچ ایجھی زحمتاں گھٹ توں گھٹ تھی ویسن۔ شہری تھوڑی جِیھی تکلیف برداشت کریندے قومی کھیݙ دی بحالی اَتے مُلک دی مثبت شناخت کیتے تعاون جاری رکھن۔