وزیرمملکت طلال چوہدری این اے 96 ضمنی انتخابات وچ اپݨا ووٹ کاسٹ کیتا

فیصل آباد۔ 23 نومبر(اے پی پی) وزیرمملکت داخلہ سینیٹر طلال چوہدری این اے 96 جڑانوالہ ضمنی انتخابات وچ پولنگ اسٹیشن تے ووٹ کاسٹ کیتا جِیندے نال حلقے وچ جاری ضمنی انتخاب دی سیاسی حرارت اَتے اِیندی اہمیت مزید وَدھ ڳئی۔ وزیرمملکت مقررہ ویلھے تے پولنگ اسٹیشن پُڄے جِتھاں اُنہاں منظم اَتے پُرسکون ماحول وچ اپݨا حق رائے دہی استعمال کیتا۔ اُنہاں دے ووٹ ݙیوݨ دے عمل نال الیکشن وچ عوامی شرکت دی حوصلہ افزائی تھئی۔ پولنگ اسٹیشن دے عملے موجب، حلقے وچ ووٹران دا تسلسل نال آوݨ اِیں ڳالھ دا ثبوت اے جو مقابلہ خاصا دلچسپ اے، خاص کر اِیں پس منظر وچ جو حلقے وچ سولہاں امیدوار میدان وچ ہِن جِنہاں وچ مسلم لیگ (ن) دے ٹکٹ تے وزیرمملکت دے بھرا بلال چوہدری وی شامل ہِن۔ انتخابی انتظامیہ ݙسایا جو حلقے وچ ہݨ تئیں پولنگ مکمل طور تے پُرامن رہی اے اَتے کہیں پاسوں وی کوئی ناخوشگوار واقعہ دی اطلاع نی ملی۔ سخت سکیورٹی اقدامات، مستقل نگرانی، جاہ جاہ تعینات اہلکاراں اَتے کنٹرول رومز توں کیتی ونجݨ آلی مانیٹرنگ انتخابی عمل کوں شفاف اَتے بِلا رُکاوٹ جاری رکھݨ وچ مرکزی کردار ادا کیتے۔ الیکشن کمیشن دے ترجمان دا آکھݨ اے جو پولنگ سویرے اَٹھ وَڄے ویلھے مقررہ تے شروع تھئی اَتے شام پنج وَجے تئیں بِلا تعطل جاری رہی۔ اُنہاں ووٹران تے زور ݙِتا جو او بِلا خوف و خطر اپݨے متعلقہ پولنگ اسٹیشنز پُڄن اَتے جمہوری حق استعمال کریندے انتخابی عمل کوں کامیاب بݨاوݨ۔