عوام ضمنی انتخابات وچ بائیکاٹ دی کال مُسترد کر ݙتی، کہیں کوں حق رائے دہی توں رُوکݨ آئینی حق دی خلاف ورزی اے، وزیرمملکت طلال چوہدری

فیصل آباد ۔ 23 نومبر (اے پی پی)وزیرمملکت داخلہ سینیٹر طلال چوہدری آکھیے جو اڄ تھیوݨ آلے ضمنی انتخابات دا ساریں توں اہم نتیجہ اے ہے جو عوام بائیکاٹ دی کال کوں کُھلے لفظاں وچ مُسترد کریندے جمہوری عمل نال اپݨی وابستگی ثابت کر ݙِتی۔ این اے 96 وچ ووٹ کاسٹ کرݨ دے بعد میڈیا نال ڳالھ مہاڑ کریندے اُنہاں آکھیا جو ہِک سیاسی جماعت وَلوں ووٹراں کوں پولنگ توں پَرے رکھݨ دی کوشش دے باوجود پنجاب دے عوام بھرپور شرکت کر تے جمہوری روایت کوں مضبوط بݨایا۔اُنہاں آکھیا جو ہِک ہی ݙینھ ملک بھر وچ تھیوݨ آلے ضمنی انتخابات وچ ݙو مختلف اصول کیوں اپنائے ڳئے، خیبر پختونخوا وچ ووٹ ݙیوݨ دی اجازت ݙِتی ڳئی جَڈاں جو پنجاب وچ بائیکاٹ دا بیانیہ کھِنڈایا ڳیا۔ اُنہاں آکھیا جو شہریاں کوں اپݨے بنیادی حق رائے دہی توں رُوکݨ آئین دی کُھلی خلاف ورزی اے اَتے الیکشن کمیشن اِیں ”جمہوری حق تے حملے“ دا نوٹس کَݙاں گھِنسی۔اُنہاں آکھیا جو الیکشن کمیشن وَلوں مختلف نوعیت دے نوٹس جاری تھئن جِنہاں وچ ہِک اُنہاں کوں وی مِلیا، مسلم لیگ (ن) سارے نوٹسز دا جواب آئینی اَتے قانونی طریقے نال ݙیسی۔ اُتے اصل مسئلہ اِے ہے جو ہِک سیاسی جماعت ووٹراں کوں ووٹ ݙیوݨ توں رُوکݨ دی مہم چلیندی پئی اے۔ جے کوئی جماعت خود کوں عوامی نمائندہ اکھیندی اے تاں ول او آئینی حق دے بائیکاٹ دی کال کِیہڑی منطق دے تحت ݙے سڳدی اے۔وزیرمملکت آکھیا جو اڄ عوام ووٹ کہیں سیاسی نعرے یا احتجاجی مہم دے جواب وچ نئیں بلکہ وزیراعلیٰ پنجاب مریم نواز دی کارکردگی اَتے وزیراعظم شہباز شریف دیاں حکومتی پالیسیاں دے اعتراف وچ پاتے۔ اُنہاں آکھیا جو جڑانوالہ سودھے مختلف علاقیں وچ ٹرن آؤٹ روایتی ضمنی انتخابات توں وَدھ ݙِکھائی ݙِتا اَتے کہیں ہِک پولنگ اسٹیشن توں وی عملی بائیکاٹ دی رپورٹ سامݨے نی آئی۔ٹرن آؤٹ دے متعلق سوال تے اُنہاں آکھیا جو پَکے اعدادوشمار بعد وچ آسن مگر ابتدائی مشاہدات عام ضمنی انتخابات دے مقابلے وچ وَدھ ووٹر شرکت دی نشاندہی کریندِن۔ سکیورٹی انتظامات تے اطمینان دا اظہار کریندے اُنہاں آکھیا جو پولیس، رینجرز اَتے پاک فوج دے دستے الیکشن کمیشن دے آپریشنل کنٹرول وچ تعینات رہیے اَتے کہیں پاسوں وی کوئی ناخوشگوار واقعہ رپورٹ نی تھیا۔پولنگ اسٹیشناں دے اندر ووٹراں دیاں ویڈیوز بݨاوݨ جیھے معمولی اَتے انفرادی نوعیت دے واقعات تے ڳالھ کریندے اُنہاں آکھیا جو ایجھے نِکے واقعات پورے انتخابی عمل دی شفافیت تے سوال نی چا سڳدے، اُنہاں آکھیا جو پولنگ ایجنٹ موجود ہَن، بیلٹ دی رازداری برقرار رہی اَتے انتخابی ایس او پیز تے مجموعی طور تے مکمل عمل کیتا ڳیا۔ جے کہیں ضابطہ دی خلاف ورزی کیتی اے تاں کارروائی تھیوݨی چاہیدی اے لیکن مجموعی عمل منظم، صاف اَتے پُرامن اے۔اُنہاں الیکشن کمیشن توں مطالبہ کیتا جو او ”اصل خلاف ورزی“ یعنی انتخابات دے بائیکاٹ دی کوششاں تے توجہ ݙیوے کیوں جو اِیہوجے قدم جمہوریت کیتے حقیقی خطرہ اے۔ اُنہاں آکھیا جو مسلم لیگ (ن) الیکشن کمیشن دے نال مکمل تعاون کریسی اَتے اِے ثابت کریسی جو انتخابی مہم یا پولنگ دے دوران کہیں قسم دی قانونی یا ضابطہ جاتی خلاف ورزی نی کیتی ڳئی۔ وزیرمملکت آکھیا جو پنجاب کوں کہیں وی سیاسی امتیازی سلوک دا نشانہ نہ بݨایا ونڄے۔ اُنہاں آکھیا جو عوام ہِک واری ول ثابت کر ݙِتے جو او تقسیم پیدا کرݨ آلے بیانیے توں متاثر تھیوݨ دے بغیر جمہوریت دے نال کھڑن اَتے وَݙی تعداد وچ ووٹ پاتے اُنہاں اِیں وابستگی دا عملی ثبوت ݙِتے۔