پاکستان تے چین 2025 توں 2029 تئیں کیتے ہِک جامع مُشترکہ ایکشن پلان جاری کر ݙِتا

اسلام آباد۔ 24 نومبر (اے پی پی) پاکستان تے چین 2025 توں 2029 تئیں کیتے ہِک جامع مُشترکہ ایکشن پلان جاری کر ݙِتے جیندے اِچ سیاسی اعتماد، اقتصادی تعاون، سکیورٹی شراکت داری تے عوامی رابطیاں کوں وݙا کرݨ دا لائحہ عمل شامل اے۔ اے منصوبہ ݙوہیں مُلکاں وچال اسٹریٹجک شراکت داری کوں ہِک نویں مرحلے اِچ داخل کریسی۔ بیجنگ اِچ منعقدہ “تریجھی بیلٹ اینڈ روڈ انٹیگریٹڈ ڈیولپمنٹ آف کلچر اینڈ ٹیکنالوجی کانفرنس” دے دوران مقررین خطاب کیتا۔ چائنا انٹرنیشنل پریس اینڈ کمیونیکیشن سینٹر دے میڈیا فیلو محمد ضمیر اسدی خطاب کریندیں ہوئیں آکھیا جو پاکستان تے چین ہِک ݙوجھے کوں چنڳے ہمسایہ، دوست، شراکت دار تے بھائی قرار ݙیندے ہوئیں ہر موسم دی اسٹریٹجک شراکت داری کوں ٻیا مضبوط کرݨ دا عزم کیتے۔ اسدی آکھیا جو چین ݙو ٹوک موقف اختیار کیتا جو پاکستان اُندی خارجہ پالیسی دا اہم ستون اے تے بیجنگ دے طویل المدتی اسٹریٹجک وژن اِچ کلیدی حیثیت رکھیندے۔ چین دے بیلٹ اینڈ روڈ تعاون کیتے اعلان کرݨ آلے “اَٹھ وݙے اقدامات” دے تحت پاکستان اِچ گرین انرجی، ڈیجیٹل ٹیکنالوجی، اختراعات تے کمیونٹی لیول فلاحی منصوبیاں اِچ تعاون ودھݨ دی توقع اے۔ اسدی آکھیا جو وݙے انفراسٹرکچر منصوبیاں دے نال نال نِکے منصوبے وی شروع کیتے ویسن جیڑھے عوامی سطح تے سروسز، روزگار تے سماجی ترقی وِچ کردار ادا کریسن۔ اُنہاں آکھیا جو 2025 تا 2029 روڈ میپ دے آغاز نال ای پالیسی سازاں تے تجزیہ کاراں کوں توقع اے جو اے مُشترکہ ایکشن پلان ݙو پاسہ تعلقات کوں نویں توانائی ݙیسی، اقتصادی موقعیاں دا نواں باب کھولیسی، علاقائی رابطیاں کوں وسعت ݙیسی تے پاکستان تے چین کوں آپسی اعتماد تے مُشترکہ خوشحالی دے ہِک نویں دور اِچ داخل کریسی۔