پشاور اِچ فیڈرل کانسٹیبلری ہیڈکوارٹر تے خود کُش حملہ، 3 اہلکار شہید، جوابی کارروائی اِچ 2 حملہ آور ہلاک

پشاور۔ 24 نومبر (اے پی پی) پشاور کینٹ اِچ فیڈرل کانسٹیبلری ہیڈکوارٹر دے گیٹ تے خود کُش حملے دے نتیجے اِچ ترائے اہلکار شہید تے ݙو زخمی تھی ڳئے۔ سی سی پی او پشاور ڈاکٹر میاں سعید احمد موجب پولیس فیڈرل کانسٹیبلری تے پاک فوج دے کمانڈوز انتہائی بہادری دا مظاہرہ تے ویلھے تے رسپانس کریندیں ہوئیں 2 حملہ آوراں کوں ہلاک کر ݙِتا، جائے وقوعہ تے کلیئرنس آپریشن جاری اے۔ سی سی پی او پشاور ڈاکٹر میاں سعید آکھیا جو سنہری مسجد روڈ تے فیڈرل کانسٹیبلری دے ہیڈ کوارٹر تے حملے دی وجہ توں صدر روڈ کوں ٹریفک کیتے بند کر ݙِتا ڳئے۔ دھماکہ سویل 8 وڄ تے 10 منٹ تے تھیا۔ خود کُش حملہ آور آپ کوں دھماکے نال اُݙا ݙِتا، دھماکہ اِتنا زور دار ہئی جو اُندی آواز دُور دُور تئیں سُݨی ڳئی۔ خود کُش دھماکہ دے بعد فائرنگ دِی آوازاں وی سُنڑی ڳئی جݙاں جو روڈ کوں ٹریفک کیتے بند کر ݙِتا ڳیا ۔ علاقے اِچ سکیورٹی ہائی الرٹ کر ݙِتی ڳئی اے تے ٻئی نفری موقع تے پُڄ ڳئی اے۔ ایں دے نال نال ریسکیو ٹیماں وی موقع تے پُہنچ ڳئن۔ پشاور کینٹ مرکزی سنہری روڈ تے ایف سی روڈ کوں ݙوہیں پاسوں توں بند کر ݙِتا ڳئے ، ایف سی ہیڈکوارٹر کوں کلیئر کرݨ تئیں صدر روڈ تے ٹریفک دی روانی معطل راہسی، ایں دوران بی آر ٹی سروس وی عارضی طور تے معطل کر ݙِتی ڳئی اے، جݙاں جو شہریاں توں وی سکیورٹی اداریاں دے نال تعاون کرݨ دی اپیل کیتی ڳئی اے۔ آئی جی خیبر پختونخوا پولیس ذوالفقار حمید میڈیا نال ڳالھ کریندیں ہوئیں ݙسایا جو فیڈرل کانسٹیبلری ہیڈکوارٹر صدر پشاور اِچ ݙو خود کُش دھماکے تھئن، ہِک دھماکا مین گیٹ تے تے ݙوجھا گیٹ دے اندر موٹر سائیکل سٹینڈ تے تھیے۔ آئی جی ݙسایا جو ݙو حملہ آور فائرنگ دے تبادلے اِچ ماریے ڳئن، پولیس دھماکے دی جاہ تے موجود اے تے کلیئرنس آپریشن جاری اے۔ سی سی پی او ݙسایا جو 3 خود کُش حملہ آوراں فیڈرل کانسٹیبلری تے حملہ کیتا، ہِک خود کُش حملہ آور آپ کوں مرکزی گیٹ تے اُݙایا جݙاں جو ݙو خود کُش حملہ آور فیڈرل کانسٹیبلری ہیڈ کوارٹر دے اندر داخل تھئے ۔ سی سی پی او پشاور میاں سعید ݙسایا جو فیڈرل کانسٹیبلری دے اہلکاراں ݙوہیں حملہ آوراں تے فائرنگ کیتی، ترائیں خود کُش حملہ آور ماریے ڳئن، فیڈرل کانسٹیبلری دے جواناں بہادری نال خود کُش حملے کوں ناکام بݨایا۔ ڈپٹی کمانڈنٹ فیڈرل کانسٹیبلری جاوید اقبال ݙسایا جو ترائیں خود کُش حملہ آور ماریے ڳئن، فیڈرل کانسٹیبلری دے جواناں بہادری نال دہشتگرداں دا مقابلہ کیتا، خود کُش حملے اِچ فیڈرل کانسٹیبلری دے 3 اہلکار شہید تھئے۔ ہسپتال ذرائع موجب حملے اِچ 5 بندے زخمی تھئے جنہاں کوں ہسپتال مُنتقل کر ݙِتا ڳئے، حملے اچ 2 اہلکار تے 3 شہری ہن، سارے زخمیاں کوں طبی امداد ݙِتی ویندی پئی اے اتے اُنہاں دی حالت تسلی بخش اے۔ ڈپٹی کمانڈنٹ فیڈرل کانسٹیبلری دا آکھݨ اے جو قانون نافذ کرݨ آلے اداریاں دے اہلکاراں علاقے کوں گھیرے اِچ ڳِھن ڳِھدے اتے کلیئرنس آپریشن جاری اے۔