وزارت اطلاعات دے سینیئر افسر اشفاق احمد خلیل وفاقی سیکرٹری اطلاعات تے نشریات مُقرر، نوٹیفیکیشن جاری

اسلام آباد۔ 24 نومبر (اے پی پی) وزارت اطلاعات تے نشریات دے سینیئر افسر اشفاق احمد خلیل (بی ایس۔ 21) کوں وفاقی سیکرٹری اطلاعات تے نشریات دے عہدے تے مُقرر کر ݙِتا ڳئے۔ وزیراعظم محمد شہباز شریف دی منظوری دے بعد کابینہ سیکرٹریٹ اسٹیبلشمنٹ ڈویژن نوٹیفیکیشن جاری کر ݙِتے۔ نوٹیفیکیشن موجب اشفاق احمد خلیل کوں ڈیپوٹیشن تے سول سرونٹس ایکٹ 1973ء دی شق 10 دے تحت فوراً تاحکم ثانی سیکرٹری اطلاعات تے نشریات مُقرر کیتا ڳئے۔ واضح رہے جو اشفاق احمد خلیل ایں توں پہلے وزارت اطلاعات تے نشریات اِچ ایڈیشنل سیکرٹری دے طور تے خدمات ݙیندے رہیے۔ اشفاق احمد خلیل وزارت اطلاعات واچ مختلف اہم ذمہ واریاں تے وی فائز رہ ڳئن۔ اُنہاں پریس انفارمیشن ڈیپارٹمنٹ پشاور اِچ ڈائریکٹر جنرل، پاکستان ایمبیسی ٹوکیو جاپان اِچ پریس قونصلر دی حیثیت نال وی خدمات انجام ݙِتی۔ ایں دے علاوہ او ڈائریکٹوریٹ آف الیکٹرانک میڈیا اینڈ پبلی کیشنز، پیمرا، انفارمیشن سروس اکیڈمی تے پی آئی ڈی اِچ مختلف اہم عہدیاں تے وی فائز رہ ڳئن۔ وزیراعظم محمد شہباز شریف وزارت اطلاعات دے سینیئر افسران طارق خان، ارشد منیر، اشفاق احمد خلیل، عمرانہ وزیر تے سعید احمد شیخ دے انٹرویو کیتے تے اُنہاں اِچوں اشفاق احمد خلیل دے ناں کوں شارٹ لسٹ کر تے عہدے کیتے مُنتخب کیتا۔ وزارت اطلاعات موجب، نویں تقرری دے بعد وزارت اِچ انتظامی تے پالیسی سطح تے تسلسل برقرار راہسی تے حکومتی رابطہ کاری ٻئی موثر تھیسی۔